InfoHub Logo

ءبىر كۇنى جولبارىس تاماق ىزدەپ شىعىپ، ءبىر تورعا ءتۇسىپ قالسا كەرەك. سول توردان شىعا الماي جاتىپ، سو ارادا ءبىر جاياۋ ادام ءوتىپ جۇرسە كەرەك، جولبارىس ونى كورىپ جالىنادى. «ءاي، سەن، ادام بولساڭ، مەنى وسى توردان بوساتساڭ، مەن وتەپ بەرەمىن، كوپ قايىرىم ساعان قىلامىن». جاماندىقتى ويلاماعان ادام تورعا كەلىپ، جولبارىستى بوساتىپ شىعاردى. جولبارىس بوسانىپ شىققان سوڭ، ادامعا ايتتى: «مەن بولسام بىرنەشە كۇن تاماق كورمەي، ابدەن قارنىم اشتى. مەن سەنى جەيمىن». سوندا ادام ايتتى: «وۋ، سەنىڭ مەنى جارىلقايمىن دەگەنىڭ كانە؟ ەندى ءوستىپ، مەنى جەيمىن دەپ تۇرعانىڭ بولا ما؟ بۇل ءىستى بىرەۋگە بارىپ ايتىپ جۇگىنەيىك»، – دەدى ادام. سوندا جولبارىس «ماقۇل، بىرەۋگە سىناتساق» دەپ، ۇلكەن اعاشقا كەلىپ، اعاشتان سۇرادى: «ءاي، اعاش، سەن بىلسەڭ، بىزگە ايت، جاقسىلىقتى جاقسىلىقپەن وتەي مە، جوق، قاستىقپەن وتەي مە؟». سوندا اعاش ايتتى: «قاستىقپەنەن وتەيدى. سەندەر ءوزىڭ تەكسەر، سەندەرگە ايتايىن. وسى مەنىڭ قالقاما ادام دەگەن كەلىپ كولەڭكەلەپ تۇرىپ، ەندى جۇرەردە، مەنىڭ بۇتاعىمدى كەرەك-جاراققا قيراتادى، كەسىپ الىپ كەتەدى. سونىسى ماعان قىلعان قاستىق ەمەي نە دەپ ايتاسىڭ؟» – دەپ، وسى ءسوزدى اعاش ايتتى. سوندا جولبارىس ادامعا ايتتى: «ال، مەن سەنى جەيمىن». ادام ايتتى: «ءۇش سۇراتىپ، ودان سوڭ مەنى جە!»، – دەيدى. «قۇپ، جارايدى»، – دەپ، جولبارىس ءبىر كۇنى كەلە جاتسا، ءبىر كارى سيىر جايىلىپ تۇرسا كەرەك. سول سيىردان ادام سۇرادى: «ءاي، سيىر، بىزگە ايتىپ بەر، جاقسىلىقتى جاقسىلىقپەن وتەي مە، الدە قاستىقپەنەن وتەي مە؟» سوندا سيىر ايتتى: «قاستىقپەنەن وتەيدى. سەبەبى، بۇرىن ءوزىم جاس بولعاندا، ءسۇتىم مول بولعاندا، مەنى جاقسى كورىپ ءجۇردى. ەندى مەن قارتايدىم، ءسۇتىم از بولدى، ەندى يەم سويايىن دەپ تۇرسا، قاستىق ەمەي نە؟» سوندا جولبارىس ادامعا ايتتى: «ال، مەن سەنى جەيمىن». ادام ايتتى: «ەندى ءبىر جولى سۇرايىق». ءسويتىپ كەلە جاتسا، ءبىر شيەبورى ولاردى كورىپ قاشتى. سوندا جولبارىس ايقايلايدى: «ءاي، اعايىن، سەن قاشپا، ءبىز ساعان قاس قىلمايمىز، سەنەن سۇرار ءسوزىمىز بار!». سوندا شيەبورى توقتاپ تۇرا ايتتى: «مەن دە بولسام تاڭ قالدىم: تەگى جولداس بولمايتۇعىن ەكى جان بىرىگىپ كەپ تۇرعانى». سوندا ادام ايتتى: «ءاي، شيەبورى! وسى جولبارىس تورعا ءتۇسىپ، شىعا الماي ماعان جالىندى. مەن بولسام ونى بوساتتىم. ەندى بولسا، مەنى جەيمىن دەپ تۇر». سوندا شيەبورى ادامعا ايتتى: «سەن بولساڭ، وتىرىك ايتىپ تۇرسىڭ. جولبارىس - اڭنىڭ پاتشاسى، ول بولسا، قانداي تورعا تۇسسە دە شىعا الادى». سوندا جولبارىس ايتتى: «ادامنىڭ ايتقانى راس». سوندا شيەبورى: «سەندەردىڭ ايتقان ءسوزىڭنىڭ ءبارى وتىرىك، ءوز كوزىممەن كورمەي، مەن سەندەرگە نانبايمىن»، – دەدى شيەبورى. سوندا جولبارىس ايتتى: «ءجۇر، سەن ءبىزدىڭ ايتقانىمىزعا سەنبەي تۇرسىڭ، ءوز كوزىڭمەن كور. مەن سول تورعا سەنىڭ كوزىڭشە ءتۇسىپ، ساعان كورسەتەيىن»، – دەپ، ۇشەۋى قايتا سول تورعا باردى. جولبارىس: «مىناداي، مەن وسى تورعا ءتۇسىپ قالعان ەدىم»، – دەپ، تورعا ءتۇسىپ، ورالىپ قالدى. «مىنە، كوردىڭ بە؟» – دەپ، جولبارىس شيەبورىگە ايتتى. سوندا ادام قايتا جولبارىستى بوساتايىن دەپ ۇمتىلدى. سوندا شيەبورى ادامعا اقىرىن ايتتى: «سەن بولساڭ، بۇدان كەيىن تورعا تۇسكەن جولبارىستى تەگى بوساتۋشى بولما. ەندى بولسا ۇيگە قايت، مەن دە كەتەيىن»، – دەپ، ەكەۋى قاشىپ كەتتى. جولبارىس سول ورالعان كۇيى قالدى. سوندا اڭشى جەتىپ كەلىپ، جولبارىستى اتىپ  تاستاپ، تەرىسىن سويىپ الدى. تەگى، كۇش كەيدە ادال تابىس، قۋلىققا قارسىلىق قىلا المايدى، الداۋعا كونسە، تۇتىلىپ قالادى. بۇ دا بولسا ءبىر جۇمباق.

---