InfoHub Logo

جوعارى قان قىسىمى — بۇگىنگى كۇنى كەڭ تاراعان جۇرەك-قان تامىر اۋرۋى. ەرەسەك ادامداردىڭ 20-30 پايىزى وسى سىرقاتتان زارداپ شەگەدى. جاس ۇلعايا كەلە بۇل اۋرۋدىڭ جيىلىگى ارتىپ، 65 جاستان اسقان ادامداردىڭ 50-65 پايىزىندا بايقالادى.

بۇل سىرقات مي ينسۋلتىنە، ميوكارد ينفاركتىنە سوقتىرۋى مۇمكىن، سوندىقتان دا اسا ءقاۋىپتى. جوعارى قان قىسىمى بارلىق اعزالار مەن تىندەردى زاقىمدايدى: ەڭ الدىمەن جۇرەك، باس ميى، بۇيرەكتەر زارداپ شەگەدى. سول سەبەپتەن دە بۇل اعزالاردى نىسانا-اعزالار دەپ اتايدى.

جوعارى قان قىسىمىن ەمدەۋ قان قىسىمىن رەتتەۋگە عانا ەمەس، مىندەتتى تۇردە اتەروسكلەروزدىڭ الدىن الۋعا دا باعىتتالۋى ءتيىس.

نەگىزگى ءقاۋىپ فاكتورلارى: تەكتىك بەيىمدىك، تەمەكى تارتۋ، ءسپيرتتى ىشىمدىك تۇتىنۋ، ارتىق دەنە سالماعى، دۇرىس تاماقتانباۋ، از قيمىلداۋ، ۇنەمى سترەسكە ۇشىراۋ.

دارى-دارمەكپەن ەمدەۋدىڭ نەگىزگى پرينڭيپتەرى: تۇزدى شەكتەۋ؛ دەنە سالماعىن ءتۇسىرۋ؛ دەنە قيمىلىن ارتتىرۋ؛ الكوگولدى شەكتەۋ؛ تەمەكىدەن باس تارتۋ؛ ەموسيالىق سترەستى جەڭۋ.

ەگەر سىزدە جوعارى قان قىسىمى انىقتالسا، مىنا كەنەستەرگە قۇلاق تۇرگەنىڭىز ءجون: دارىگەر تاعايىنداعان تەكسەرۋلەردەن ءوتۋ؛ اسقىنۋلار ءقاۋپىن انىقتاۋ؛ ءتيىمدى تاماقتانۋ ەرەجەلەرىن ساقتاۋ؛ زياندى ادەتتەردەن (تەمەكىدەن، ىشىمدىكتەن باس تارتۋ، تۇزدى شەكتەۋ) ارىلۋ؛ كاليي تۇزدارى بار ازىق-تۇلىكتەردى كوبەيتۋ؛ دەنە كيمىلىن ارتتىرۋ.

تۇراقتى دەنە قيمىلدارىنىڭ قان قىسىمىن تومەندەتەتىندىگى انىقتالعان. ول ارتىق سالماق تۇسىرۋگە دە پايدالى، ال ارتىق دەنە سالماعى قان قىسىمىنىڭ كوتەرىلۋىنە اسەر ەتەدى.

قان قىسىمىنىن كوتەرىلۋىنە سترەسس تە ىقپال ەتەدى، سوندىقتان جۇمىس پەن دەمالىس ءتارتىبىن ساقتاپ، ۇيىقتاۋعا، تازا اۋادا جاياۋ سەرۋەندەۋگە، جىلى بۇلاۋعا تۇسۋگە دە كوڭىل بولگەن ءجون. جاتار الدىندا تويا تاماق جەمەڭىز، تەلەديدار دا كاراماعانىڭىز دۇرىس، تىنىشتاندىراتىن شوپتەردەن دايارلانعان جىلى شاي ءىشىڭىز. قاراپ وتىرسانىز، قان قىسىمىنىڭ كوتەرىلۋىنە جول بەرمەۋ نەگىزىنەن ءوزىڭىزدىن قولىڭىزدا.

قان قىسىمى كۇرت جوعارىلاسا، قان قىسىمىن ولشەپ، داپتەرگە جازىپ قويىڭىز، جەدەل جاردەم شاقىرتىڭىز، ءتىل استىنا تەز اسەر ەتەتىن نيفەديپين (كورينفار — 10 مگ)، كاپتاپريل (كاپوتەن — 25-50 مگ) سالىڭىز؛ قالعان ارەكەتتەردى دارىگەر بەلگىلەيدى.

ەڭ باستىسى، كوڭىل-كۇيىڭىزدى تۇسىرمەڭىز، كوبىرەك كۇلىڭىز، ءار تاڭدى قۋانا قارسى الىڭىز، سوندا بۇل دەرتتى جەڭىپ شىعاسىز.

ر. داۋرەنبەكوۆا، تەراپيەۆت

---