قاڭعىباستىڭ وكىنىشى
اناشىم! مەنى ادامدار ۇنەمى «قاڭعىباس» دەپ مۇسىركەيدى. مىنا ءبىر قاراڭ قالعان وكىنىشتەردەن عانا تۇراتىن ءومىرىم ماعان ۇنامايدى. قىزىق، ءا؟ ەشكىمنەن دە تومەن تۇرعىم كەلمەيتىن ەدى عوي. ال مىنا ءجۇرىسىم نە؟ نەگە تۇيىققا تىرەلدىم؟ نەگە تىعىرىقتان شىعار وزگە جول ىزدەمەدىم ەكەن؟
اپتالداي ازاماتتىڭ ءبىر شيشا شولمەكتىڭ الدىندا سونشالىق تومەندەگەنى نە دەگەن ايانىشتى ەدى...سول ءبىر قۇرىعىر شولمەكتى قولىما العان كۇنىمدى قارعىس اتسىن. ءيا، راسىمەن ول مەنىڭ بار قايعىمدى، بار قيىندىعىملى ۇمىتتىردى. تاڭەرتەڭ تىپتەن ءوز ۇيىمە قالاي كەلگەنىمدى بىلمەيتىندەي جاعدايعا دا جەتتىم. ءسىز دە، بالىم دا، بار جاناشىرىم دا ماعان بار اقىلدارىن ءۇيىپ – توكتى. سوندا دا مەنى شايتاننىڭ سۋىنان وزگە ەشتەڭە قىزىقتىرا قويمادى. قانشاما جاقىندارىما ايتقان سوزدەرىم ەسىمە تۇسە قالسا، كىرەرگە تەسىك تاپپايمىن. ال ون جىل وتاسساق تا، بىردە – ءبىر رەت ءشاي دەسىپ كورمەگەن جان جارىم بالىمعا قول كوتەرگەنىم تىپتەن يتتىك قوي.
بايعۇس انام... قولىنان تۇك كەلمەيتىن، جىگەرسىز ۇلىڭدى كەشە گور. مەن ءسىزدى ەڭ باقىتتى انا ەتەمىن دەپ ءجۇرىپ، ەڭ سورلى انا ەتتىم-اۋ. سىزگە كورىنۋگە بەتىم دە جوق. ەسىڭىزدە مە؟ ءسىز كەزىندە «جاس بولسا دا باس بولىپ، اكەسىنىڭ جوقتىعىن بىلدىرتپەي، مەنى الاقانىنا سالىپ باعىپ وتىر» دەپ كورشى ايەلدەرگە جەر-كوككە سىيعىزباي ماقتاۋشى ەدىڭىز عوي مەنى. سونى ەسىمە السام، وزەگىم ورتەنەدى. ءسىز سەنىپ ەدىڭىز عوي ماعان. ال مەن نە ىستەدىم؟
تەنتەك ىنىممەن ءبىر كورىسىپ ءسىزدى تاپسىرعىم كەلەدى. مەنىڭ ورنىما ەڭ باقىتتى انا ەت، سەنىڭ قولىڭنان كەلەدى دەگىم كەلەدى. ءبىراق مىنا تۇرىممەن ىنىمە قالاي كورىنەمىن. مەنى كورسە شوشىناتىن شىعار. ايتپاقشى، وتكەن جولى ونى بازاردىڭ ماڭىنا كوردىم. باياعى تەنتەكتى ەمەس، ەرەسەك ازاماتتى كورگەندەي بولدىم. ەسەيىپ كەتكەندەي مە ءوزى؟
كىشكەنتاي جۇگىرمەگىمنىڭ حالى قالاي؟ كىشكەنتاي دەپ قويامىن. ول الدەقاشان ءوسىپ كەتكەن بولار. كورمەگەنىمە ەكى جىلدان اسىپ بارادى. ونى دا قۇشاعىما الىپ، كەشىر دەگىم كەلەدى. دەگەنمەن، كەشپەيتىنىنە سەنىمدىمىن. ءقايتىپ كەشىرسىن؟ مەن ونى تىرىلەي جەتىم ەتىپ، اكەسىز وسۋگە ءماجبۇر ەتتىم عوي. ءوزىم اكەسىز وسكەندىكتەن، ۇلىمنىڭ اكەسىز وسكەنىن مۇلدە قالاماعان ەدىم. قايتەيىن ەندى؟ سورلى ۇلىڭىزدىڭ قولىنان ول دا كەلمەدى. بىلەسىز بە؟ ول كىشكەنتاي بولعانىنا قاراماستان سونداي وجەت ەدى. مەن وعان ەركەكتەرگە جىلاۋعا بولمايدى دەگەنمىن. ونىڭ سودان كەيىن كوزىنە جاس العانىن كورگەن ەمەسپىن. ۇلىمدى وسى ءبىر قايسارلىعى ءۇشىن ماقتان ەتەمىن. مەن ونى جاقسى تۇسىنەمىن. ونىڭ ماعان دەگەن وكپەسى ىشىندە. سوندىقتان مەنى كورسە جانىما جولاماستان وتە شىعاتىنىنا سەنىمدىمىن. مەنى كورمەسە ەكەن دەپ كۇنى-تۇنى تىلەيمىن. ونىڭ دا، ءوزىمنىڭ دە جۇرەگىمدى اۋىرتقىم كەلمەيدى.
بىرنەشە كۇن بۇرىن، بالىم مەنى تاۋىپ الدى. نەگە ىزدەدىڭ؟ – دەپ ەدىم. ول ىزدەمەگەنىن، كەزدەيسوق كەزدەستىرىپ قالعانىن ايتتى. ءجۇزى سولىپ، جۇدەپ قالىپتى. مەن ودان ەندىگارى مەنى كورە قالسا بۇرىلىپ تا قاراماۋىن ءوتىندىم. بۇل ءىسىم قاتىگەزدىك بولار، ءبىراق ول ءۇشىن دە، مەن ءۇشىن دە وسى دۇرىس ەمەس پە، اپا؟ كەلىنىڭىزگە اقىلىڭىزدى ايتىڭىزشى! ارى قارايعى ءومىرىن مەنى كۇتىپ قور قىلماسىن....
اناشىم! كەزدەيسوق كەزدەستىرىپ قالعاندارى بولماسا، ەكى جىلدان بەرى ەشكىم دە مەنى ىزدەمەدى. مەنىڭ مىنا تۇرىممەن ەشكىمگە كورىنگىم كەلمەيدى. ايتشى ولارعا، ەشقايسىسى دا مەنى ىزدەمەسىن، ەسىنە دە الماسىن، كورسە دە كورمەگەندەي وتە شىقسىن. ۋادە ەتەيىن، مەن ەشقايسىسىنا دا رەنجىمەيمىن. ءوز قاتەلىگىمنىڭ ازابىن ءوزىم عانا تارتقىم كەلەدى... جالعىز... تەك ءوزىم عانا...
You Might Also Like
-
شىعىس قازاقستان وبلىستىق ءبىلىم باسقارماسىنىڭ «تارباعاتاي كوللەدجى» كوممۋنالدىق مەملەكەتتىك مەكەمەسى دايىنداعان: ءىىى كۋرس ستۋدەنتى سەرىكبەكوۆ الىبەك جەتەكشىسى: اراپبايەۆا شاربات بەيسەن...
