شاقىردى قاراشەكپەن قويدى سوتقا،
كۇيمەي مە بىرەۋ ءۇشىن بىرەۋ وتقا،
بەلگىلى قويدىڭ تاۋىق جەمەيتىنى،
جازىقسىز جازا تارتقان پەندە جوق پا؟
تۇلكى ەكەن سۋدياسى «تەڭشىل» دەگەن،
اتاقتان ساۋ ەمەس دە «جەمشىل» دەگەن.
ءبىر كۇنى تالاپكەر مەن جاۋاپكەرگە
شاقىرۋ قاعاز شىقتى «كەلسىن» دەگەن.
ەكەۋى ايتقان كۇنى سوتقا كەلدى،
تۇلكىەكەڭ قويدى كورىپ كوڭىلدەندى.
تەكسەرىپ، ارلى-بەرلى جاۋاپ الىپ،
تەز ءىستى بىتىرمەككە جاھيدتەندى.
تالاپكەر مۇجىق ايتتى: «پالەن كۇنى،
قوتاندا قويدىڭ جالعىز قالعان ءتۇنى.
جوق بولىپ ەكى تاۋىق ەرتەڭىنە،
سۇيەگى، بۇرقىراعان جاتىر ءجۇنى.
دەر ەدىم «سىرتتان ۇرى كەلگەن شىعار»،
شىقپادى ءتۇنى بويى ءيتتىڭ ءۇنى.
ويىما سالىستىرىپ قارادىم دا:
«قوي ەكەن جەگەن، - دەدىم، - شاكسىز مۇنى».
قوي ايتتى: «شوپكە تويىپ كۇنى بويىن،
قوزعالماي جاتتىم ۇيىقتاپ ءتۇنى بويىن.
بىلەدى ايماعىمنىڭ ءبارى، تاقسىر،
جوقتىعىن بۇزىق كوڭىل، ارام ويىم.
قۇدايعا ايان ۇرلىق ەتپەگەنىم،
ورنىمنان تۇرىپ تۇندە كەتپەگەنىم.
جالعىز-اق تاۋىقتاردىڭ تۇسىندا ەمەس،
اسلان ومىرىمدە ەت جەمەدىم».
ال سوندا تۇلكى قالاي حۇكىم ەتگى:
«ۇرلاعان تانۋعا دا، - دەدى، - ەپتى. -
وزگە ۇرى كەلمەگەنىن سونان بىلەم،
وقيعا بولمىس كۇنى يت ۇرمەپتى.
كەلمەسە سىرتتان ۇرى، بۇل جەمەسە،
جوعالىپ ەكى تاۋىق، قايدا كەتتى؟!
جان بەرسە، نانىپ بولماس، جاقىن جاتىپ،
«جەمەدىم» دەگەنىنە ءدامدى ەتتى.
تەكسەرگەن ءىس تۇرىنە قاراعاندا،
مۇعابىن تاۋىقتاردى وسى جەپتى.
وبال جوق، ورتەسە دە مۇنى وتقا،
اپارىپ ولتىرىڭدەر، بايلاپ وققا.
تەرىسىمەن تالاپكەردى ريزا ەتىپ،
اپ كەلىپ تاپسىرىڭدار ەتىن سوتقا!».

* * *
كىنالى بىرەۋ ويدان، بىرەۋ تىلدەن،
احمەت، وسى ايتقانىڭ جەتەر، توقتا!
كوردىڭ بە، ءسوزىڭ ونشا اجارلى ەمەس،
ۇيالماي سىناتارعا سالىپ توپقا.
الايدا تىڭداعاندار ءبىر ويلانار:
تۇلكىدەي تورە بەرۋ بار ما، جوق پا؟

---