InfoHub Logo

وتكەن اپتا باسىندا جازۋشىلار وداعىنىڭ قىزمەتكەرلەردىڭ ءبىرى تەلەفون شالىپ، الماتى وبلىسىنىڭ جاڭادان تاعايىندالعان اكىمى سەرىك ۇمبەتوۆ مىرزانىڭ جەتىسۋ وڭىرىندە تۋىپ-وسكەن ءبىر توپ قارىمدى قالامگەرلەردى ارنايى قابىلداۋعا شاقىرىپ وتىرعانىن، سولاردىڭ ىشىندە مەنىڭ دە بارىمدى ايتىپ، سەيسەنبى كۇنى ەرتەلەتىپ ءجۇرىپ كەتۋگە ءتيىس ەكەنىمىزدى ەسكەرتكەن.

سەرىك ۇمبەتوۆتىڭ اتىنا دا، زاتىنا دا بۇرىننان قانىقپىن. ازدى-كەم تانىس-بىلىستىگىمىز دە بار، ونىڭ ۇستىنە، ەل قۇلاعى ەلۋ، جامبىل وبلىسىن باسقارىپ وتىرعان جىلدارى سول ءوڭىردىڭ اقىندارى مەن جازۋشىلارىنا جاساعان قامقورلىعى، شىنايى تالانت يەلەرىنىڭ جەكەلەگەن شىعارمالارىنىڭ باسىلىپ شىعۋىنا قول ءۇشىن بەرگەنى، قالامى قاۋقارلى ءبىرقاتار وداق مۇشەلەرىنە ارنايى سىيلىق تاعايىنداعانىنان دا حاباردار بولاتىنبىز. سونداي-اق ونىڭ مادەنيەتتىڭ ءارتۇرلى سالالارىنا، اۋىل سپورتىن كوتەرۋگە ايرىقشا كوڭىل بولەتىنى جايىندا دا ەستىپ-بىلىپ جۇرگەنبىز. ەل باسقارىپ وتىرعان ازاماتتىڭ سول يگىلىكتى ىس-ارەكەتىنە سىرتتا ءجۇرىپ ءبىز دە سۇيسىنەتىنبىز.

ەندى، مىنە، سول سەرىك ۇمبەتوۆ ارنايى ات جىبەرىپ الدىرىپ وتىرسا، ءبىزدىڭ تاقىمىمىز قىشىماي ءقايتسىن. كونە ءبىر باتىرلار جىرلارىندا:

قابانباي ساۋىن ايتتى دەگەننەن سوڭ
توقپاقتان كەلگەن ەكەن ەر قاساباي، —

دەيتىن جولدار بولۋشى ەدى، سول ايتقانداي، ونىڭ ۇستىنە ءوزىمىز اۋدان اكىمى اتاۋلىنىڭ الدىنا ەمىنە بارىپ كورمەگەن باسىمىز، كەيبىر وبلىس دەڭگەيىندە ەل بيلەپ، جۇرت شۇيلەپ جۇرگەن ازاماتتاردىڭ الدەبىر جەڭىل-جەلپى بۇيىمتايمەن الدىنا بارا قالعان اقىن-جازۋشىلاردى اۋىز ۇيىندە ساعاتتار بويى سارعايتىپ وتىرعىزىپ قويادى ەكەن دەگەندى دە ەستىپ، "اپىر-اي، ءا!" دەسىپ، باس شايقايتىنىمىز بولاتىن.

سونىمەن ايتىلعان كۇنى قۇلان يەك تاڭنان تۇرىپ، ايتىلعان ساعاتىڭدا ۋاعدالى جەرگە جەتتىك. ءبىزدى باستاپ شىققالى تۇرعان قازاقستان جازۋشىلار وداعى باسقارماسىنىڭ ءتوراعاسى نۇرلان ورازالين، تالدىقورعاننان ءبىزدى ادەيىلەپ الىپ جۇرۋگە كەلگەن وبلىستىق ءتىل باسقارماسىنىڭ باستىعى، اقىن ءىنىمىز احمەت كەندىربەكۇلىنا قوسىلىپ جەدەل ءجۇرىپ كەتكەنبىز. ءوز كولىگىمەن شىققاندار بار، اكىم جىبەرگەن ارنايى كولىككە مىنگەسكەندەرىمىز بار، ءارتۇرلى اڭگىمەمەن وتىرىپ، وبلىس اكىمشىلىگى عيماراتىنىڭ الدىنا تابان تىرەگەنىمىزدى بايقاماي دا قالعانبىز.

قۇرامىندا الىس-جاقىن اعايىنعا اتى ءمالىم، اتاق-ابىرويدان دا قۇرالاقان بولىپ كورمەگەن تۇمانباي مولداعالييەۆ، ساين مۇراتبەكوۆ، مارفۋعا ايتحوجا، قاستەك بالاباي، وسىنى جازىپ وتىرعان پاقىرىڭىز، بەك توعىسبايەۆ، بەكسۇلتان نۇرجەكە، باققوجا مۇقاي، ۇيعىردىڭ ايدىك جازۋشىلارى شايىم شانايەۆ پەن احمەتجان ءاشىروۆ، تاعى باسقا ءبىراز ساڭىلاقتار بار توپتى وبلىس اكىمى كوپ كۇتتىرمەي قابىلدادى.

اكىمنىڭ ءوزى سياقتى ءبىزدىڭ ءبارىمىز دە بۇل جاقتىڭ ۇڭعىل-شۇڭعىلىن، ەكونوميكاسى مەن مادەنيەتىن ءبىر كىسىدەي بىلەتىندىكتەرىمىزدەن دە بولار، ول اسا ءبىر كوسىلە قازبالاپ جاتپاي، جەتىسۋ جەرىنىڭ بۇگىنى مەن ەرتەڭى جايلى قىسقاشا ايتىپ كەلدى دە، ادەيى باسىمىزدى قوسىپ وتىرعان كەزدەسۋدىڭ ءمانىڭ ءتۇسىندىرىپ، نەگىزىنەن ءبىزدى تىڭداعىسى كەلەتىنىن اڭعارتتى.

اڭگىمەنى جازۋشىلار وداعىنىڭ باسشىسى نۇرلان ورازالين باستاپ، قازاق جازۋشىلارىنىڭ قازىرگى حال-احۋالىنان حاباردار ەتتى دە، الدا كەلە جاتقان پرەزيدەنت سايلاۋى الدىندا بۇرىنعىدان دا بەرىك ءبىراۋىزدىلىق كەرەگىنە، سول باعىتتا جازۋشىلار ۇيىمى دا ۇجىمداسا وتىرىپ، ورتاق مۇددەگە وراي ءبىرقاتار ءىستىڭ باسىن قايىرىپ وتىرعانىن ايتتى. بۇگىنگى كەزدەسۋ دە سونىڭ ءبىر كورىنىسى دەگەندى ءبىلدىردى.

جوعارىدا اتتارى اتالعانداردان دا باسقا بۇل ساپارعا ارنايى شاقىرىلعان ءسماعۇل ەلۋباي، ورازاقىن اسقار، نەسىپ ءجۇنىسباي ۇلى، جۇماباي شاشتاي ۇلى، ىرىم كەنەنبايەۆ، قايرات الىمبەك، شايمەرگەن الديبەكوۆ، قىسقاسى كەزدەسۋگە قاتىسقانداردىڭ بارلىعى دەرلىك سويلەپ، بۇكپەسىز ويلارىن ورتاعا سالدى. ءبىرقاتار ۇسىنىس-پىكىرلەر ايتىلدى. ايتساق دەگەن، ايتىلۋعا ءتيىستى ءسوزىمىزدى ىرىكپەي، ىركىلمەي تۇگەل اقتاردىق-اۋ دەيمىن. وسىناۋ رياسىز اشىق اڭگىمەنىڭ ءوزى سوعان ءبارىمىزدى دە جەتەلەي تۇسكەندەي بولدى.

ىشىمىزدەگى جاسى ۇلكەنىمىز — ارداگەر سەيدالىم تانەكەيەۆ ەدى، ول كىسى دە ادەتتەگى كىسىلىكتى كىشىپەيىلدىلىككە باعىپ، ءبىراز قوماقتى ويدىڭ باسىن قايىردى. وسىناۋ باسقوسۋ سياقتى يگى ءداستۇردىڭ باستالا بەرە تۇيىقتالىپ قالماي، الداعى ۋاقىتتا وبلىس، اۋدان ورتالىقتارىڭدا ناتيجەلى جالعاسىن تاۋىپ وتىرسا دەگەن تۇرعىداعى تىلەگىن ءبىلدىردى.

سونداي-اق وسى كەزدەسۋگە ارنايى شاقىرىلعان تالدىقورعاندىق قالامگەرلەر — اقىن ابەن داۋرەنبەكوۆ، ءالي ىسقاباي، تۇرسىن ابدۋالييەۆتەر دە ءوز لەبىزدەرىن ءبىلدىرىپ جاتتى.

ەكى ءۇش ساعاتقا سوزىلعان اسەرلى اڭگىمەنى تۇجىرىمداي كەلىپ، سەرىك ۇمبەتوۆ وبلىس ورتالىعىندا جازۋشىلار وداعىنىڭ بولىمشەسى اشىلا قالسا، ءۇي-جاي، دۇنيە-مۇلىك جاعىنان قارايلاساتىنىن، سونداي-اق ءوز قولىنداعى بيلىك دەڭگەيىندە تالانت-دارىنىن ەل ابدەن تانىپ بولعان، ءقازىر قوعامدىق قىزمەتتەن ەرىكسىز قول ءۇزىپ قالعان ءبىر توپ قالامگەرگە ازدى-كوپتى ارنايى ستيپەنديا تاعايىندايتىنىن، جىل سايىن ءۇش جازۋشىنىڭ ۇزدىك شىعارمالارىن باسىپ شىعارۋعا قارجىلاي كومەك كورسەتەتىن ايتتى. مۇنداي شىنايى پەيىل، شىن ىقىلاسقا ءوز تاراپىمىزدان ءبىز دە العىس ايتىپ تاراستىق.

قايتار جولداعى اڭگىمەمىزدىڭ نەگىزگى ارقاۋى وسى كەزدەسۋ جايىندا بولدى. سەرىك ۇمبەتوۆ بىزدەن ماداق كۇتىپ، ماقتاۋ ەستيىن دەپ شاقىرماعان بولار، وسى ءوڭىردىڭ ءسوز ۇستار ازاماتتارى بولعاندىقتان ورىندى پىكىر، وقشاۋ وي كۇتكەن بولار دەگەنگە توقايلاستىق. كورگەندى ازاماتقا ءتان كوشەلى ىستەردىڭ ءبىر كورىنىسى دە وسى-اۋ دەپ تۇيدىك ءبارىمىز.

مىنا ءبىر توپ شاعىن ماقالالار "پاراسات " جۋرنالىنىڭ تاپسىرماسىمەن جازىلىپ، جاريالانىپ ەدى. وسى كىتاپقا قوسۋدى ءجون كورگەن جايىم بار.

---