InfoHub Logo

ءبىر باي ولەر ۋاقىتىندا ۇلىن شاقىرىپ الىپ:

— ۇلىم، مەن ولگەن سوڭ جۇما سايىن قىز الىپ، قالا سايىن ءۇي سال. اس جەسەڭ، بال جە، – دەپ، وسيەت ايتىپتى. باي دۇنيەدەن ءوتىپ، ۇلى اتاسىنىڭ وسيەتىن ورىنداي باستايدى: جۇما سايىن قىز الىپ، قالا سايىن ءۇي سالادى. اس ىشسە، بال ءىشىپ، اقشاسىن بىتىرەدى. ءسويتىپ، جىگىت جارلى بولادى. ءبىر كۇنى جىگىت دالاعا شىعىپ ءبىراز ءجۇرىپ، ءبىر ۇيىلگەن تاستىڭ تاساسىنا وتىرىپ، بوركىن قولىنا الىپ باسىن ۇستاپ وتىرعان ۋاقىتتا، ءبىر جاقتان ءبىر شال كەلىپ جىگىتكە سالەم بەرەدى. جىگىت سالەمىن العان سوڭ، ول ادام جانىنا وتىرادى دا جىگىتكە:

— نەعىپ وتىرسىڭ؟ – دەيدى.

جىگىت:

— ءجاي وتىرمىن، – دەپ جاۋاپ بەرەدى.

شال:

— شىنىڭدى ايت! – دەپ قىسا باستايدى. جىگىت ەش نارسە ايتپايدى.

شال:

— سىرىڭدى جاسىرما! مەن ساعان جاقسىلىق كورسەتەمىن، – دەيدى.

جىگىت:

— مەنىڭ اتام باي ادام ەدى، سول اتامنىڭ ولەر الدىندا ايتقان وسيەتىن ورىندايمىن دەپ، كەدەي بولدىم، – دەيدى. شال:

— قانداي وسيەت ايتىپ ەدى؟ – دەيدى. جىگىت:

— اۋەلگى وسيەتى: «مەن ولگەن سوڭ جۇما سايىن قىز ال»، – دەپ ەدى، مەن اتامنىڭ سول وسيەتىن تۇتىپ، جۇما سايىن قىز الدىم. ەكىنشى وسيەتى: «قالا سايىن ءۇي سال»، – دەپ ەدى. مەن قالا سايىن ءۇي سالدىم. ءۇشىنشى وسيەتى: «اس ىشسەڭ، بال جە»، – دەپ ەدى. مەن بۇل وسيەتىن دە ورىنداپ، ءار كۇنى بال جەدىم. سولاي ەتىپ، ءۇش جىلدا بارلىق اقشام تاۋسىلدى، – دەيدى.

شال تۇرىپ جىگىتكە:

— سەن اتاڭنىڭ وسيەتىن ۇقپاعان ەكەنسىڭ، ويتكەنى اتاڭنىڭ: «جۇما سايىن قىز ال» – دەگەنى: «ايەلىڭمەن سىيلاس بول، ءقادىرىڭدى كەتىرمە. سوندا عۇمىر بويى ءتاتۋ-تاتتى ءومىر سۇرەسىڭ» – دەگەنى. «قالا سايىن ءۇي سال» دەگەنى: «قالا سايىن دوستارىڭ بولسىن، بارعاندا تۇسەتىن» – دەگەنى ەدى. «اس ىشسەڭ بال جە» – دەگەنى: «ەڭبەك ىستەپ اس ىشسەڭ، بالدان ءتاتتى بولادى» – دەگەنى ەدى، – دەپ، قارت ءوز جونىنە كەتىپتى.

جىگىت اكەسىنىڭ تەرەڭ ماعىنالى وسيەتىنە سوندا عانا ءتۇسىنىپتى.

---