قاتىگەزدىك
سەنبى. توسەكتە جاتىپ بۇگىن نە ىستەيتىنىمدى ويلادىم. تۇرامىن، شاي، تەليەۆيزور، تاعى شاي، تاعى تەليەۆيزور، شاي، تەليەۆيزور... كەلىنشەگىم بازارعا كەتكەن.
دالادا كوكتەم. تورعايلار جانۇشىرا شىرىلداسىپ، اشىق اسپان، جىلى كۇنگە قۋانۋدا. كوشەگە شىعىپ سەرۋەندەۋگە دە بولادى. ءبىراق ءدال ءقازىر ەش نارسەگە زاۋقىم جوق.
كوزىمدى جۇمىپ قالعۋعا ارەكەت جاسادىم. ماشينالاردىڭ سىپىرىلىسقان ءۇنى مەن تەرەزە ماڭىنداعى قۇستار تىرشىلىگى ادەتتەن تىس جارقىن. كوكتەم. كەنەت ساۋلە ءتۇستى ەسىمە. ارينە، ساۋلە. نۇرعا تولعان جانارى، كۇلكىگە تولى سوزدەرى وسىنداي ماعىناسىز سەنبىلەرگە ماعىنا بەرۋ ءۇشىن جاراتىلعان.
ورنىمنان تۇرىپ تەلەفون ءنومىرىن تەرە باستادىم.
— اللو؟
كىشكەنتاي بالانىڭ داۋىسى.
— ساۋلەنى بولا ما؟
— ساۋلە جوق.
— قاشان كەلەدى؟
ول ءۇنسىز قالدى.
— اللو؟
— ساۋلە ءولىپ قالدى.
— قالاي؟ قاشان؟
— ءبارى ونى كومۋگە كەتتى. ۇيدە ەشكىم جوق.
بالانىڭ داۋىسى سونشالىقتى جايباراقات.
تەلەفون تۇتقاسىن ورنىنا قويىپ كيىنۋگە كىرىستىم. كەشە عانا كەزدەستىك. ساپ-ساۋ بولاتىن. الدە ماشينا باسىپ كەتتى مە ەكەن؟ كەنەت ونىمەن كەشە ەمەس ارعى كۇنى كەزدەسكەنىم ءتۇستى ەسىمە. ءبارىبىر ساپ-ساۋ بولاتىن. كوشەگە شىقتىم. جىپ-جىلى. ۇزاق قىستان سوڭ كۇننىڭ جىلۋى سيقىر، ەرتەگى سياقتى. كوكپەڭبەك اسپان ەنتەلەي تونەدى، دۇنيە جاپ-جارىق. كەۋدەمە كەپتەلگەن كەسەك ۇرەي تارقاي باستادى. مۇنداي كۇنى الدەكىمنىڭ، اسىرەسە ساۋلەنىڭ ءولۋى مۇمكىن ەمەس. كىسىسى قايتىس بولعان ۇيگە كىشكەنتاي بالانى تاستاپ، ۇلكەندەر و زاماندا بۇ زامان ادام كومۋگە كەتە مە؟ باسىمدى شايقاپ جىميدىم. ءبارىن ساۋلەنىڭ ءوزى ىستەپ وتىر. ودان شىعادى. ۇنەمى كۇلكى شاشىپ تۇراتىن جانارىن ەلەستەتتىم. نە دەگەن قىز. ەسىك قوڭىراۋىن باستىم.
— كىم؟
— مەن جاڭا زۆونداعان اعامىن.
اشتى. بەس-التى جاسار توپ-تومپاق بالا. ار جاعىنان ەرەسەكتەۋ قىز كورىندى.
— ساۋلە قايدا؟
— ءولىپ قالدى.
تاق-تاق ەتەدى.
— قاشان؟
— كەشە.
— قالاي ءولىپ قالدى؟
— كوپ ءدارى ءىشىپ، ءىشى اۋىرىپ. ال سىزگە مىنا حاتتى تاستادى. ماعان ەشكىمگە ايتپاي، سىزگە، ءوز قولىنا بەر دەدى. ايتپەسە مەنىڭ تۇسىمە كىرەمىن دەدى.
ەرەسەك قىزدىڭ ەكى كوزى قىپ-قىزىل. ۇرەيگە تولا. تەزىرەك حاتتى بەرىپ قۇتىلعىسى كەلىپ تۇر. تۇڭعيىقتان كۇلكى باس كوتەرىپ، تاماعىمدى قىتىقتادى. قاباعىمدى شىتىپ، ءتورت بۇكتەلگەن قاعازدى اشىپ وقىدىم:
سالەم…
سول كۇنى سەن تىم جايباراقات بولدىڭ. جۇزىڭە كوزىم تۇسكەن سايىن جۇرەگىمدى ۋ شارپىدى. سودان كەيىن قوشتاساتىن ۋاقىت جەتتى. "ساۋ بول" دەدىم مەن. سەن باسىڭدى يزەدىڭ. نەگە وسىنشاما جەڭىل قوشتاستىق؟ نەگە كوزدەرىمىز ءتۇيىسىپ ءبىر ساتكە كىدىرمەدى؟ بىردە "ماعان كۇز ۇنايدى" دەگەنسىڭ. مەن سەنگەن جوقپىن. كۇزدىڭ ادامدارى سەن سياقتى ەمەس. باسقا. سەن تىم شولاق بولاتىنسىڭ. تىم جەڭىلتەك. سەنىڭ قاسىڭدا ءوزىمدى اۋىر سەزىنەتىنمىن. ءومىر — مەن ءۇشىن ۇرەي، قۇپيا. ماحابباتتىڭ دا باقىتتان گورى قورقىنىشى، ادالدىعىنان گورى ارامدىعى باسىم. سەنىڭ ماحابباتىڭنىڭ... ءقازىر قايداسىڭ؟ مۇمكىن مەنىڭ قاسىمدا شىعارسىڭ. تاڭدانعان كەيىپپەن قاباعىڭنىڭ استىمەن قاراپ وتىرعان بولارسىڭ ءدال ءقازىر. وندا نەگە ءوزىمدى مۇنشا جالعىز سەزىنەمىن بۇل الەمدە؟ مەنى ويلايتىنىڭا سەنىمدىمىن. ارينە، ويلايسىڭ. ءبارىن قايتارۋ، قايتادان باستاۋ مۇمكىن بولسا نە ىستەر ەدىڭ. تاعى دا قاۋىرسىن كەيپىڭە ەنىپ جىلاتار ما ەدىڭ، الدە مەنىڭ ويسىز باقىتىم ءۇشىن مۇڭدى قابىلدار ما ەدىڭ. ماحاببات مەنى قاتىگەز ەتىپتى. سەنىڭ وكىنەتىنىڭدى ەلەستەتىپ كۇلىمسىرەيمىن. ەشقاشان ەشكىم كورمەگەن كوز جاسىڭ جانارىڭدى تالاي شىلايتىن شىعار ەندى. ءبىراق بۇل دۇنيەدەن وتكەن ادام ورالمايدى. مەن ورالمايمىن...
... سىرتقا شىقتىم. كۇن دە، اسپان دا ءوز ورنىندا. كوكتەم دە. ءوز ورنىندا. تەك ساۋلە جوق.
You Might Also Like
-
بۇل جولى ءبىزدىڭ ارعى جاققا ءوتۋ ساپارىمىز ىسكەر ادامداردىڭ سۋىت ءجۇرىسى سەكىلدى ەش بوياۋسىز، سۇرعىلت جۇزەگە استى. بەسەۋمىز جۇبىمىز جازىلماعان كۇيى تاڭ اتپاستان كول جاعاسىنداعى توقال تامعا كىردىك. ەركە...
-
مەن بۇلبۇلدىڭ سايراعانىن ەشقاشان ەستىگەن ەمەسپىن. ەستىگەن كۇننىڭ وزىندە قاسىمدا ونىڭ باسقا ەمەس بۇلبۇل ەكەنىن تۇسىندىرەتىن ادام بولماسا، تانىماسىم انىق. ءبىراق ماعان ءبارىبىر بۇلبۇل ۇنايدى. ابدەن جاۋ...
