قازاقستاندا 12 مىڭ ءمۇعالىم سيفرلىق ينكليۋزيۆتى وقۋ كۋرسىنان وتەدى
12 مىڭ قازاقستاندىق ءمۇعالىم سيفرلىق ينكليۋزيۆتى وقۋ كۋرستارىنان وتەدى.
بىرىككەن ۇلتتار ۇيىمىنىڭ بالالار قورىنىڭ (يۋنيسەف) قازاقستانداعى كەڭسەسى Astana Hub IT ستارتاپتار حالىقارالىق تەحنوپاركىمەن بىرلەسىپ، قازاقستان رەسپۋبليكاسىنىڭ 11 وبلىسىندا 12 مىڭنان استام ءمۇعالىمدى ارالاس فورماتتا سيفرلىق ينكليۋزيۆتى ءبىلىم نەگىزدەرىن وقىتۋدى جوسپارلاپ وتىر.
وقىتۋ ءبىلىم جانە عىلىم مينيسترلىگىنىڭ وبلىستىق باسقارمالارىمەن جانە ءبىلىم دەپارتامەنتتەرىمەن بىرلەسىپ جۇزەگە اسادى.
ترەنينگكە قالالىق جانە اۋىلدىق مەكتەپتەردىڭ مۇعالىمدەرى قاتىسادى. بۇگىنگى تاڭدا كۋرسقا ون مىڭنان استام تىڭداۋشىلار تىركەلدى.
«COVID-19 پاندەمياسى ەڭ وسال بالالارعا - ەرەكشە ءبىلىم بەرۋ قاجەتتىلىكتەرى بار بالالارعا بىلىمگە قولجەتىمدىلىكتى شەكتەۋ جانە قاشىقتىقتان وقىتۋعا كوشۋدەن ەڭ كوپ زارداپ شەگەتىنىن انىق كورسەتتى. ءبىزدىڭ باستى ماقساتىمىز – ولاردىڭ قاجەتتىلىكتەرىنە قاراماستان ءاربىر بالاعا بىردەي قولجەتىمدى ءبىلىم بەرۋ پروسەسىن قولداۋ. سيفرلىق تەحنولوگيالاردى قولدانىسىمەن جۇزەگە اساتىن ارالاس فورمات وقۋ ۇدەرىسىن يكەمدى جانە ءبىلىم بەرۋ ورتاسىن بەيىمدەلگىش ەتەدى. ءبىراق مۇندا مۇعالىمدەردىڭ بىلىكتىلىگى مەن ءبىلىمى باستى ءرول اتقارادى. سوندىقتان مەن Astana Hub-پەن بىرلەسە وتىرىپ، كوپتەگەن مۇعالىمدەردى جاڭا ساندىق قۇرالدارعا ۇيرەتە الاتىنىمىزعا قۋانىشتىمىن»، - دەدى يۋنيسەف-تىڭ قازاقستانداعى وكىلى ارتۋر ۆان ديزەن.
ارالاس فورمات – ارنايى اقپاراتتىق تەحنولوگيالاردى پايدالانا وتىرىپ، سىنىپتا وقىتۋدىڭ ءداستۇرلى فورمالارىن بىرىكتىرۋدى كوزدەيتىن زاماناۋي ءبىلىم بەرۋ ءتاسىلى. قازاقستاندىق مۇعالىمدەرگە ارنالعان ارالاس فورماتتاعى سيفرلىق ينكليۋزيۆتى ءبىلىم بەرۋ كۋرسى Okoo.kz ءبىلىم بەرۋ پلاتفورماسىندا وتۋدە.
كۋرس تىڭداۋشىلاردىڭ ءبىرىنشى توبى «ينكليۋزيا» تەرمينىن، قالىپتاسقان ستەرەوتيپتەر مەن قاتە تۇسىنىكتەردى زەرتتەي باستادى.
وعان قوسا ولار ەرەكشە ءبىلىم بەرۋ قاجەتتىلىكتەرى بار بالالاردى وقۋعا تارتۋدىڭ جاڭا تەحنولوگيالارىمەن تانىسادى.
ولار مەكتەپتە قولايلى جاعداي جاساۋ ءۇشىن ءارتۇرلى سيفرلىق قۇرالداردى پايدالانا وتىرىپ، قاشىقتىقتان جانە ينتەراكتيۆتى ساباقتاردى ۇيىمداستىرۋ ادىستەرىن زەرتتەيدى.
«سيفرلىق تەحنولوگيالار سيفرلىق ءبىلىم بەرۋدى قولجەتىمدى جانە ينكليۋزيۆتى ەتۋ سياقتى جاھاندىق ماسەلەلەرگە اسەر ەتە الاتىنى - ەرەكشە قۋانتاتىن جايت. بولاشاقتا IT-تەحنولوگيالار ەرەكشە ءبىلىم بەرۋ قاجەتتىلىكتەرى بار بالالاردىڭ وقۋ باعدارلاماسىنا قاتىسۋىنا كەدەرگى كەلتىرەتىن بارلىق كەدەرگىلەردى تولىعىمەن جەڭۋگە كومەكتەسەدى دەپ سەنەمىز. ءبىز قۇزىرەتتەرىمىز بەن كۇش-جىگەرىمىزدى يۋنيسەف-پەن بىرىكتىرۋدىڭ ارقاسىندا ءبىز وسىنداي الەۋمەتتىك ماڭىزدى ماسەلەنى شەشۋگە ىقپال ەتە الاتىنىمىز جانە ەڭ باستىسى، ايتارلىقتاي سەرپىن بەرە الاتىنىمىز كەرەمەت»، - دەدى Astana Hub IT-ستارتاپ تەحنوپاركىنىڭ باس ديرەكتورى ماعجان مادييەۆ.
تەوريالىق بولىمنەن باسقا مۇعالىمدەرگە ونلاين رەجيمىندە ءتيىمدى وقىتۋ ءۇشىن پراكتيكالىق ءبىلىم بەرىلەدى.
كۋرس اياسىندا مۇعالىمدەر Mural، Padlet، ZOOM، Canva، Kahoot جانە ت.ب. قۇرالداردى پايدالانۋدى ۇيرەنەدى.
«وسىنداي كۋرستار ۇيىمداستىرعانىڭىز ءۇشىن العىسىمىز شەكسىز. ترەنينگىمىز 3 كۇنگە سوزىلدى، وسى ۋاقىت ىشىندە ءبىز كوپ نارسەنى ۇيرەندىك: بۇرىن بىلمەگەن ادىستەرمەن، تەحنولوگيالارمەن تانىستىق، ءبىلىمىمىزدى تەرەڭدەتتىك. Padlet جانە Canva سياقتى قۇرالدارمەن جۇمىس ىستەۋ اسىرەسە قىزىقتى بولدى. العان ءبىلىمىمدى الداعى ۋاقىتتا مىندەتتى تۇردە ساباقتا قولدانامىن»، - دەپ ءبولىستى باتىس قازاقستان وبلىسى تەرەكتى اۋدانى جاڭا ءومىر اۋىلىنداعى شاعان ورتا مەكتەبىنىڭ ءمۇعالىمى جۇپار تاڭاتاروۆا.
ءبىلىم جانە عىلىم مينيسترلىگىنىڭ رەسمي مالىمەتتەرىنە سايكەس، 2020 جىلدىڭ 1 قاڭتارىنداعى جاعداي بويىنشا قازاقستاندا 161 826 مىڭنان استام ەرەكشە ءبىلىم بەرۋدى قاجەت ەتەتىن بالا تۇرادى، ولار ءۇشىن 99 ارنايى مەكتەپ قۇرىلدى، وندا 15 مىڭ بالا وقيدى.
سونداي-اق، 42 مەكتەپكە دەيىنگى ارنايى ۇيىم بار. قالعان بالالار ينكليۋزيۆتى ورتادا جالپى ءبىلىم بەرەتىن مەكتەپتەردە وقىتىلادى.
You Might Also Like
