InfoHub Logo

قازاقستاندا ۇلتتىق جاساندى ينتەللەكت پلاتفورماسى قۇرىلماق،دەپ جازادى Infohub.kz.

ءماجىلىس «جاساندى ينتەللەكت تۋرالى» زاڭ جوباسىن ىلەسپە تۇزەتۋلەرىمەن بىرگە ءبىرىنشى وقىلىمدا ماقۇلدادى. قۇجات مەملەكەت باسشىسىنىڭ تاپسىرماسىمەن ازىرلەنىپ، جاساندى ينتەللەكت (جي) تەحنولوگيالارىن دامىتۋعا قۇقىقتىق نەگىز قالىپتاستىرۋدى كوزدەيدى.

زاڭ جوباسى جاساندى ينتەللەكتتى قولدانۋدا ازاماتتاردىڭ قاۋىپسىزدىگىن قامتاماسىز ەتۋ، ەكونوميكانىڭ ءتۇرلى سالالارىندا ءجي-دى ەنگىزۋدەگى مەملەكەتتىڭ ءرولىن ناقتىلاۋ جانە ازىرلەۋشىلەر مەن ينۆەستورلار ءۇشىن تۇسىنىكتى ەرەجەلەر ورناتۋعا باعىتتالعان.

قۇجاتتىڭ باستى جاڭالىعى – ۇلتتىق جاساندى ينتەللەكت پلاتفورماسىن قۇرۋ. بۇل ينفراقۇرىلىم جي ونىمدەرىن ازىرلەۋگە ارنالعان دەرەكتەر كىتاپحانالارى مەن مودەلدەردى وقىتۋ جۇيەلەرىن بىرىكتىرەدى. سونىمەن قاتار، جي سالاسىنداعى زەرتتەۋلەرگە، ءبىلىم بەرۋ باعدارلامالارىنا جانە حالىقارالىق ىنتىماقتاستىققا مەملەكەتتىك قولداۋ كورسەتىلمەك.

زاڭ جوباسى جاساندى ينتەللەكتكە قاتىسى بار بارلىق تاراپتاردىڭ قۇقىقتارى مەن مىندەتتەرىن ايقىندايدى. جۇيە يەلەرى ءوز ونىمدەرىن پايدالانۋعا قاتىستى شارتتاردى بەلگىلەپ، تاۋەكەلدەردى باسقارا السا، پايدالانۋشىلار جەكە دەرەكتەرىن قورعاۋعا جانە اۆتوماتتاندىرىلعان شەشىمدەرگە قارسىلىق بىلدىرۋگە قۇقىلى بولادى.