InfoHub Logo

مۇكەي مەن جايىر جورتۋىلدا ءجۇرىپ ءبىر بايدىڭ قىز ۇزاتۋ تويىنا قاتىناسىپ قالادى. ولار وزدەرىنىڭ ءاتىن-جونىن قۇپيا ساقتاپ، وتاۋ ۇيىندە بولىپ جاتقان جاستاردىڭ ساۋىعىنا كىرەدى.

ولار جاستار اراسىندا بىرەۋلەردىڭ مۇكەيدىڭ «تەلقوڭىر» كۇيىن بۇزىپ شەرتىپ وتىرعانىن كورەدى دە، ونىڭ دومبىراسىن سۇراپ الىپ، «بۇل كۇي مەنىڭ بىلۋىمدە بىلاي ەدى»، — دەپ شەرتىپ بەرەدى. قۇربىلارىنىڭ قالاۋىنشا كۇيشى جالعاستى ءبىر قاۋىم كۇيلەردى ورىندايدى. قىزا تۇسكەن دومبىرا ساۋىعىنىڭ بۇل سالتى ۇلكەندەردىڭ دە قۇلاعىنا شالىنىپ، توي يەسى ولاردى اۋىل اقساقالدارى وتىرعان شاڭىراققا شاقىرتىپ كۇي شەرتكىزەدى.

توپ اراسىندا وتىرعان ورتا جاستاردان اسقان ءبىر تاقىس ساۋداگەر ساۋدا ىستەپ ءجۇرىپ مۇكەي اۋىلدارىنا قونىپ كەتكەنى ەسىنە ءتۇسىپ، مۇكەيدى تانيدى دا:

— وي، ءىنىم، سەن الگى جورتۋىلشى، كۇيشى مۇكەي ەكەنسىڭ عوي! اۋىل-ايماعىڭ امان با؟—دەپ سۋىرىلا امانداسادى. مۇكەي شاراسىزدان ساۋداگەردىڭ تانۋىن مويىندايدى. توي يەسى مۇكەيدى قۇرمەتتەپ قوناق ەتەدى. ەرتەڭىندە اتتانار الدىندا مۇكەيگە ەل اقساقالدارى اقىل ايتىپ:

— الاشتىڭ ونەرلى ازاماتى ەكەنسىڭ، مۇنىڭا جۇرت ريزا. اتىڭدى سىرتتاي ەستۋشى ەدىك، بۇگىن كوزىمىزبەن كوردىك. ال جورتىپ ءجۇرىپ جىلقى قۋاتىن ونەرىڭ دە بار ەكەن، مۇنىڭا جانىمىز قاس. ەكى اياعىڭدى ەگىز باسپا، الدىڭعى ونەرىڭدى العا سۇيرە، سوڭعىڭدى سۋ تۇبىنە تاستا، — دەپ شاپان كيگىزىپ، اق تىلەكپەن اتتاندىرىپتى. مۇكەي وسىدان سوڭ ەل تىلەگىن ءجون كورىپ، جورتۋىلىن دا قويىپتى. ەلىنە ورالعاننان كەيىن «قوس باسقان» كۇيىن جاساپتى.

---