قوسمەكەندىلەر
قوسمەكەندىلەر — حوردالىلار ءتيپى، ومىرتقالىلار تيپ تارماعىنىڭ ءبىر كلاسى. قوسمەكەندىلەردىڭ 2 كلاسس تارماعى: دوعاومىرتقالىلار، جۇقاومىرتقالىلار، 3 وتريادى (قۇيرىقسىز قوسمەكەندىلەر، قۇيرىقتى قوسمەكەندىلەر جانە اياكسىز قوسمەكەندىلەر)، 25 - 30 تۇقىمداسىنا بىرىگەتىن 4 مىڭنان استام ءتۇرى بەلگىلى.
تروپيكتىك، سۋبتروپيكتىك جانە قوڭىرجاي ايماقتاردا تارالعان. كوپشىلىك تۇرلەرى سىرتتاي ۇرىقتانادى، ال دەرناسىلدەرى سۋدا تىرشىلىك ەتەدى. دەرناسىلدەرىنىڭ اناتوميالىق قۇرىلىستارى (جۇرەگىنىڭ ەكى كامەرالى بولۋى، جەلبەزەكتەرىمەن تىنىس الۋى، ت.ب.) بالىقتارعا ۇقساس. بۇلاردىڭ جەردە جۇرۋگە بەيىمدەلگەن بۋىنى شار ءتارىزدى، بىرنەشە بولىمدەردەن تۇراتىن، 5 ساۋساقتى جۇپ اياقتارى بولادى. باس قاڭقاسى اۋتوستيليالىق (ۇستىڭگى جاكسۇيەگى باسسۇيەككە ءبىتىسىپ كەتكەن). قوسمەكەندىلەردە ۇلكەن قان اينالۋ شەڭبەرىنەن باسقا كىشى (وكپەلىك) قان اينالۋ شەڭبەرى پايدا بولعان. جۇرەگى ەكى جۇرەكشە مەن ءبىر قارىنشادان تۇرادى. دەنەسىنىڭ ۇزىندىعى 2-3 سم-دەن 1،8 م-گە دەيىن جەتەدى. تەرىسى جۇمساق، جالاڭاش دەنەسى شىرىش بەزدەرى بولەتىن شىرىشتان دىمقىلدانىپ تۇرادى.
تىرشىلىگىنە قاجەتتى وتتەكتىڭ ەداۋىر بولىگىن تەرىسى ارقىلى سىڭىرەدى. كوپشىلىك قوسمەكەندىلەردىڭ سەروز بەزدەرى بار، ول كەيبىر تروپيكتىك تۇرلەرىندە وتە ۋلى كەلەدى. بالىقتاردان ايىرماشىلىعى تەرى بەزدەرى ءىرى، كوپ كلەتكالى بولادى. ەرەسەك قوسمەكەندىلەر، نەگىزىنەن، جاڭدىكتەرمەن، ال دەرناسىلدەرى سۋ وسىمدىكتەرىمەن دە قورەكتەنەدى. قازاقستاندا قوسمەكەندىلەردىڭ 12 ءتۇرى كەزدەسەدى، ونىڭ 3 ءتۇرى (جەتىسۋ اياقتى بالىعى، داناتا قۇرباقاسى، قىزىلاياق باقا) قازاقستاننىڭ "قىزىل كىتابىنا" ەنگىزىلگەن.
وقۋعا كەڭەس بەرەمىز:
برازيليادا 7 جاڭا "ميني-باقالار" انىقتالدى
You Might Also Like
-
قۋىسمۇيىزدىلەر — سۇتقورەكتىلەر كلاسى جۇپتۇياقتىلار وتريادىنىڭ كۇيىس قايىراتىندار توبىنىڭ ءبىر تۇقىمداسى. تابيعاتتا كەڭ تاراعان، اۆستراليا مەن انتاركتيدادا عانا كەزدەسپەيدى. مەكەندەيتىن جەرلەرى &...
-
قوڭىزدار، قاتتى قاناتتىلار جاندىكتەر كلاسىنىڭ ەڭ ءىرى وتريادى. قازبا قالدىقتارى پەرم كەزەڭىنىڭ شوگىندىلەرىنەن تابىلعان. قوڭىزدار جەر شارىندا، اسىرەسە، تروپيكتىك ايماقتاردا كەڭ تاراعان. بۇلار انتاركت...
