InfoHub Logo

باۋكەڭ (ب.مومىش ۇلى) قۇپيا جازبالاردى دىنگە، سەنىمگە، ۇلتقا قاتىستى دۇنيەلەردى ورىسشا ەمەس، اراب ارپىمەن جازىپ وتىرىپتى.ول تۋرالى كەلىنى زەينەپ اپا دا راستايدى: «مەن ءشاي ءمازىرىن سالعان ىدىسىمدى كوتەرىپ اتانىڭ بولمەسىنە باردىم. الاسا ۇستەلدىڭ ۇستىندەگى تەمەكى قالدىقتارىنا تولىپ قالعان كۇلسالعىشتى الا بەرگەنىمدە، اشىق جاتقان داپتەردىڭ بەتىنە ءىرى اراب ارىپتەرىمەن جازىلعان قىسقا ءۇش جولعا كوزىم ءتۇستى، ءبىراق وقىمادىم. كۇلسالعىشتى تازارتىپ الىپ كەلسەم، اتام داپتەرىن ءالى الماپتى. تاعى دا جازۋعا ەرىكسىز كوزىم ءتۇستى، شىدامىمدى تەجەمەي وقىپ ۇلگەردىم.

نايزانى ۇشىنا قاراماعىن،

ونىڭ تۇتقاسىن ۇستاعان

قولدىڭ كۇشىنە قاراعىن، — دەگەن جولدار ەكەن.

— كوزىمە تۇرا قارا! — وقىستان شىققان داۋىستان جۇرەگىم جارق ەتتى.

— شىنىڭدى ايت اراب ارىپتەرىن وقي الاسىڭ با؟

— ءي-ي-ا، — دەدىم، نەگە ەكەنىن، اياق اسىتانان كەكەشتەنىپ.

— شەكەم قىزعان ەكەن! — ماڭدايىن الاقانىمەن سارت ەتكىزدى.

مەن ساسقالاقتاپ قالدىم.

— سورىم قايناعان ەكەن! قۇپيالارىمدى جازعاندا وسى ارىپتەردى پايدالانۋشى ەدىم، ەندى ءقايتتىم؟ — دەگەندە امالىم تاۋسىلىپ جۇزىنە قاراسام، اتام مۇرتىنان كۇلىپ وتىر ەكەن. ءازىل ەكەنىنە كوزىم جەتكەن سوڭ:

— كەشىرىڭىز، باقىرايىپ تۇرسا... ەرىكسىز وقىدىم، دەپ شىنىمدى ايتتىم.

— بالام، ەگەر ءسوزدىڭ جونىنە كوشسەك، بۇل ءارىپتى بىلگەنىڭ وتە جاقسى ەكەن. مەنىڭ جازبالارىمنىڭ اجەپتاۋىر بولىگى اراب ارىپتەرىمەن جازىلعان. بالا كەزىمدە ساۋاتىمدى وسى ارىپتەرمەن اشقانعا ما، قول وڭاي جۇگىرەدى. كەيىن باقىتجان (بالاسى) قولجازبالارىمدى وزگەنىڭ كومەگىنسىز وقي المايدى-اۋ دەپ ويلاۋشى ەدىم، ەندى قاراسام سەن بار ەكەنسىڭ، دەدى».

باتىردىڭ اراب ارىپتەرىمەن جازعان كوپ جازبالارى ءالى دە تولىقتاي باسپا بەتىن كورمەسە كەرەك. ويتكەنى باۋىرجانتانۋشى عالىم مەكەمتاس مىرزاحمەتوۆ باتىردىڭ 30 تومدىق جيناعى جاريالانعاندا، ءالى دە 15 تومداي مۇرا قالعانىن تىلگە تيەك ەتكەن بولاتىن.

---