InfoHub Logo

باياعىدا ەلگە سىيلى، بىلىكتى قارت ۇستاز عۇمىر كەشىپتى. ەرەكشە ءىلتيپاتقا بولەنگەن تالىمگەرگە بار ايماقتىڭ تۇرعىندارى كەلىپ، اقىل سۇراپ، كەڭەستەرىن تىڭداپ، رۋحاني ءلاززات الىپ قايتادى ەكەن. ءبىر كۇنى قارت ۇستاز دورباسىن اسىنىپ، اۋىل-ايماقتى شارلاپ، اقىل-كەڭەس بەرۋگە جينالىپتى. ومىرلىك ساباق بەرۋدى ماقسات تۇتقان تالىمگەر- شاكىرتتەرىن دە جانىنا الىپ، ءبىراز سىناپ كورۋدى ءجون دەپ تاۋىپتى. شاكىرتتەرى دە ۇستازىنىڭ ۇسىنىسىنا ءدان ريزا ەدى.

وسىلاي جەتى كۇن دە وتە شىعادى. جول بويى تارىنى عانا تالعاجاۋ ەتكەن شاكىرتتەرى ارىپ-اشىپ، كوڭىلدەرى قۇلازىپ كەلە جاتادى. ال، عۇلاما ءبارىن بايقاپ، ءىلىم-عىلىمعا باۋلۋدى جالعاستىرىپ، كوڭىلىن اۋدارماي ءجۇرىپ كەلەدى. ارادا ءسۇت پىسىرىمدەي ۋاقىت وتكەن سوڭ عۇلامانىڭ شىدامسىزداۋ شاكىرتى ءسوز باستايدى:

— ۇستاز، ءبىز شارشادىق. ادامدارعا اقىل-كەڭەس بەرگىڭىز كەلەدى ەكەن. ءبىراق، وعان ءبىزدىڭ نە قاتىسىمىز بار؟ وسى جەردە سۇيەگىم قالسىن دەمەسەڭىز، ءبىر جۇتىم سۋ بەرىڭىزشى،-دەپتى.

عۇلاما شاكىرتىنە كوز تاستاپ، اڭگىمەسىن قايتا جالعاپتى. ءبىر ساتتە الگى شاكىرت:

— ۇستاز، مەنىڭ شىدامىم تاۋسىلدى،-دەپ الگى شاكىرتى جەرگە وتىرا كەتتى. عۇلامانىڭ باسقا شاكىرتتەرى جولداستارىنىڭ بۇل قىلىعىنا اڭ-تاڭ بولىپ، اشىققانىن دا ۇمىتىپ، سابىرعا شاقىرا باستادى. قارت ۇستاز ۇزاق ويلانىپ، شاكىرتىنە ءتۇبى تەسىك شولمەك ۇسىنىپ:

— مىنانى ال دا، بىزگە بۇلاقتان سۋ اكىلەپ بەر،-دەيدى. شاكىرتى اشۋعا ءمىنىپ:

— ءسىز مەنى مازاق قىلىپ تۇرسىز با؟! الدە بۇل قىلجاق پا؟ مەن قالاي ءتۇبى تەسىك شولمەكپەن سۋ اكەلمەكپىن؟!

— مىنە، كوردىڭ بە،  ءار ءىستىڭ بايىبىنا بارا المايتىن ادامداردىڭ شىدامسىزدىعى نەگە اكەلىپ سوعارىن؟! ول دا وسى ءتۇبى تەسىك شولمەك سەكىلدى، ايتقان اقىلىڭدى قۇلاعىنا ءىلىپ جاتپايدى. ەشكىمگە دە، ەشتەڭەگە دە پايداسى جوق. سابىرسىزدىق-كۇللى دۇنيەنىڭ دۇشپانى،-دەپ ءسوزىن تۇيىندەپتى.

ارۋجان ساميدين

---