InfoHub Logo

ساكەن ءجۇنىسوۆ 1934 جىلى 11 اقپاندا كوكشەتاۋ (قازىرگى اقمولا) وبلىسىنىڭ قىزىلتۋ اۋدانى، كىشكەنەكول اۋىلىندا تۋعان. قازاق مەملەكەتتىك ۋنيۆەرسيتەتىن ءتامامداعاننان كەيىن ەڭبەك جولىن “پيونەر” (قازىرگى “اق جەلكەن”) جۋرنالىندا ادەبي قىزمەتكەر بولىپ باستادى. م. اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىندا ادەبيەت ءبولىمىنىڭ مەڭگەرۋشىسى، كسرو ادەبي قورى قازاق بولىمشەسىنىڭ ديرەكتورى، قازاقستان جازۋشىلار وداعىنىڭ حاتشىسى قىزمەتتەرىن ابىرويلى اتقاردى.

ساكەن ءجۇنىسوۆ ءبىرىڭعاي جازۋشىلىقپەن اينالىسقان جارتى عاسىرعا تاياۋ شىعارماشىلىق ومىرىندە قازاق ادەبيەتىن وركەندەتۋگە ولشەۋسىز ۇلەس قوستى. “اقان سەرى” ديلوگياسى، “جاپانداعى جالعىز ءۇي”، “زاماناي مەن اماناي” روماندارى قالىڭ وقىر¬مان قاۋىمنان دا، ادەبي سىننان دا جوعارى باعا الدى. “اجار مەن اجال”، “تۇتقىندار”، “قىزىم، ساعان ايتام”، “جارالى گۇلدەر”، “قوس انار”، تاعى باسقا پە¬سالارى رەسپۋبليكا تەاترلارىندا تابىسپەن قويىلدى. “ءولىارا” پەساسىنا 1986 جىلى قازاقستان رەسپۋبليكاسىنىڭ مەملەكەتتىك سىيلىعى بەرىلدى.

كوپتەگەن شىعارمالارى شەت تىلدەرگە اۋدارىلدى. ءوزى دە ل. تولستويدىڭ، س. سۆەيگتىڭ، و. گونچاردىڭ اڭگىمەلەرى مەن روماندارىن قازاق تىلىنە ءساتتى ءتارجىمالادى.

س. ءجۇنىسوۆتىڭ قالامىنان تۋعان تاڭداۋلى شىعارمالارى قازاق ادەبيەتىنىڭ التىن قورىنان بەرىك ورىن العان قۇندى دۇنيەلەر بولىپ تابىلادى.
ول ءوز زامانداستارىنىڭ اراسىندا اۋقىمدى شىعارماشىلىق قارىمىمەن دە، ءبىرتۋار ازاماتتىق بولمىسىمەن دە ەرەكشەلەنەتىن. تۋعان حالقى تالانتتى پەرزەنتىن سان قىرلى ونەرى ءۇشىن ساكەن سەرى اتاپ، ايالاپ ەركەلەتتى.

اياۋلى ازامات، ۇلكەن قالامگەر ساكەن ءجۇنىسوۆتىڭ جارقىن بەينەسى ءاردايىم ەل جۇرەگىندە ساقتالادى. ونىڭ وزىق تۋىندىلارى حالقىنىڭ رۋحاني قازىناسىنا اينالىپ،  بولاشاق ۇرپاقتارمەن بىرگە جاساي بەرەدى.

ساكەن تىرلىگىندە كوپ ەڭبەكتەندى، مول جازدى. ادەبيەتتىڭ قاي جانرىندا دا كوسىلە قالام تەربەگەن ساكەن نۇرماق ۇلى ءجۇنىسوۆ جازىپ قالدىرعان التىن قازىنا بىلايعى ۋاقىتتا جۇرتىمەن بىرگە جاسايتىنىنا كۇمان جوق.

ءبىر قازاق ساكەندەي-اق بولسىن، حالقىن، ۇلتىن سۇيۋدەن اينىماي وتكەن ساكەن سەرىگە بۇل جالعان دۇنيە رازى بولۋعا دا ءتيىستى.

ەلدەن ەرەك، باسقاشا سىر اقتارىساتىن عازيز دوس، الاش دەسە ىشكەن اسىن جەرگە قوياتىن ساكەن، قازاق ونەرىن دامىتۋدان كۇشىن اياماعان سەرى، ۇلت ادەبيەتىنىڭ كوشىن دۇزەۋگە جەگىلگەن ءجۇنىسوۆتىڭ، ءتورت اياعى تەڭ تۇلپار-تالانتتىڭ ەندىگى جەردە ارادا جۇرمەۋى وكىنىش.

وقۋعا كەڭەس بەرەمىز:

ساكەن ءجۇنىسوۆتىڭ تۋىندىلارى

---