InfoHub Logo

كۇنىنە 8 ساعات ۇيىقتاڭىز

ساپالى ۇيقى يممۋنيتەتتى كۇشەيتەتىنىمەن قاتار جاس، ءارى سەرگەك كورىنۋىڭىزدى قامتاماسىز ەتەدى. كۇنىنە 7-8 ساعاتتىق ساپالى ۇيقى ەستە ساقتاۋ قابىلەتى جانە ميدىڭ ساۋلىعى ءۇشىن دە ماڭىزدى.

وڭدەلگەن ازىقتاردى ازايتىڭىز

سالاۋاتتى ءومىردىڭ العاشقى قادامى ساپالى قورەكتەنۋ جۇيەسى. ماۋسىمىنا قاراي جەمىس-جيدەك، كوكونىستەردى تۇتىنىڭىز. ءداندى-داقىلدى جانە تالشىقتى ازىقتاردى تاڭداڭىز. مايلى تاعامداردان مەيلىنشە ۇزاق تۇرىڭىز. شۇجىق، سوسيسكا سەكىلدى وڭدەلگەن ازىقتاردى مۇمكىن بولسا، مۇلدەم اس مازىرىنەن شىعارىڭىز.

كۇنىنە 8 ستاقان سۋ ءىشىڭىز

كلەتكالىق دەڭگەيدە ورىن الاتىن مەتابوليكالىق قۇبىلىستار جانە دەنەنىڭ بۇكىل فۋنكسيالارى ءۇشىن جەتكىلىكتى دارەجەدە سۋ ءىشۋ قاجەت. شولدەمەسەڭىز دە 8-9 ستاقان سۋ نەمەسە 1-2 ليتر سۋ تۇتىنۋ كۇندىك سۋ قاجەتتىلىگىن قامتاماسىز ەتە وتىرىپ، تەرىنىڭ ساۋلىعىنا جاقسى ىقپال ەتەدى، اس قورىتۋ قيىندىعى، باس اۋرۋى جانە ۇمىتشاقتىققا قارسى جاقسى كومەكتەسەدى.

اشىق اۋادا جاياۋ ءجۇرىڭىز

سپورتپەن شۇعىلدانا الماساڭىز، ەڭ بولماعاندا كۇنىنە جارتى ساعات ءبىرقالىپتى، جىلدامىراق قادامدارمەن جاياۋ جۇرۋگە تىرىسىڭىز. وسىلاي جاياۋ ءجۇرۋ ءارى سالماقتى ءبىر قالىپتا ۇستاۋعا، ءارى وتتەگى سىيىمدىلىعىنىڭ ارتۋىنا، قان قىسىمىنىڭ رەتتەلۋىنە جانە سترەستىڭ ازايۋىنا ىقپال ەتەدى.

دارىگەرگە كورىنۋگە نەمقۇرايلى قاراماڭىز

جۇيەلى دارىگەرلىك تەكسەرۋ ارقىلى بەلگىسى كورىنە قويماعان كەسەلدەردى ەرتەرەك انىقتاپ، الدى الىنۋى مۇمكىن. اسىرەسە ارەكەتسىز ءومىر سالتىنداعىلار جانە تولىق ادامدار ىلگەرىدە قانت ديابەتى قاۋپىنە قارسى ينسۋلين توزىمدىلىگى بار جوعىن تەكسەرۋى قاجەت.

شەكەر مەن تۇزدى ازايتىڭىز

شەكەر مەن تۇزدىڭ كۇندىك مولشەرىن شامادان اسىرماۋ سالاۋاتتى ءومىر ءۇشىن وتە ماڭىزدى. قانداعى شەكەر مولشەرىن جىلدام كوتەرەتىن جانە جىلدام تۇسىرەتىن شەكەر مەن شەكەرلى ازىقتاردىڭ ورنىنا، ءبۇتىن استىقتى نان، جەمىس-جيدەك سەكىلدى تالشىقتى ازىقتاردى تۇتىنىڭىز. جەيتىن ازىقتارىڭىزدىڭ كوپشىلىگىنىڭ قۇرامىندا ونسىز دا تۇز بار ەكەندىگىن ەستەن شىعارماڭىز، قاتتى قاجەت بولماسا، قوسىمشا تۇز سەپپەۋگە تىرىسىڭىز. 

سترەسكە جول بەرمەڭىز

سترەس، كۇيزەلىس دەنساۋلىققا ءقاۋىپ كەلتىرەتىن فاكتورلاردىڭ الدىڭعى قاتارىندا ورىن الادى. سالاۋاتتى قورەكتەنگەنمەن تىنىمسىز ۋايىم، كۇيزەلىستەر جاسۋشالاردىڭ جۇمىسىن تەجەيدى. ءپوزيتيۆتى ەنەرگيامەن كۇن باستاپ، باقىتتى، قۋانىشتى كوڭىل كۇيدە بولۋعا داعدىلانىڭىز.   

جاقىندارىڭىزبەن بىرگە بولىڭىز

سترەس گورموندارى يممۋنيتەت جۇيەسىنە زيان كەلتىرەدى. جاس كورىنۋ جانە دەنىڭىز ساۋ بولۋى ءۇشىن وتباسىڭىزبەن، جاقىن ادامدارىڭىزبەن كوبىرەك ۋاقىت وتكىزىڭىز. جاقىن ادامدارمەن بىرگە بولۋ، سەرۋەندەۋ، ماسساج الۋ سترەسپەن كۇرەستە اسەرلى بولىپ تابىلادى.  

تەمەكى مەن ءسپيرتتى ىشىمدىكتەن ۇزاق تۇرىڭىز

تەمەكى مەن اراق – ولىمگە اپاراتىن كوپتەگەن اۋرۋلاردىڭ نەگىزىن قالايتىن جامان ىندەت ەكەنى ءاردايىم ايتىلىپ كەلەدى. سونىمەن قاتار دەنە مەن تەرىنىڭ تەز قاجىپ، قارتايۋىنىڭ ەڭ باستى سەبەپتەرىنىڭ ءبىرى ەكەندىگىن ۇمىتپاڭىز.

كۇننەن پايدالانىڭىز

د دارۋمەنىنىڭ كوزى بولىپ تابىلاتىن كۇننەن دۇرىس پايدالانۋ قاجەت. اسپان اشىق كۇندەرى تاڭەرتەڭ نەمەسە تۇستەن كەيىنگى ۋاقىتتاردا كۇنگە قىزدىرىنۋ يممۋنيتەت جۇيەسىن كۇشەيتەتىنىن ەسكەرىڭىز.

---