شەكتەۋلى جاعدايدا شەكسىز مۇمكىندىكتەر
13ءى ناۋرىز كۇنى نۇر-سۇلتان جانە الماتى قالالارىندا كوروناۆيرۋس ىندەتى العاش رەت انىقتالدى. وكىلەتتى ادامداردىڭ وپەراتيۆتى جۇمىسى ناتيجەسىندە، كوپتەگەن مەكەمەلەر جەدەل ونلاين فورماتقا كوشتى. ال 3 كۇننەن كەيىن بارلىق ءبىلىم بەرۋ مەكەمەلەرى قاشىقتىقتان وقىتۋدى باستادى. كەشەگى كوكتەمنەن بەرى باس اياعى 10 اي ءوتىپتى. بىرنەشە ايدان كەيىن كوروناۆيرۋستىڭ ءبىر جىلدىعىن تويلايتىنداي دا بوپ قالىپپىز. البەتتە، ءسوز اراسىندا تىلگە تيەك ەتتى دەمەسەڭىز، ۆيرۋس كەلگەلى جەتىسىپ جۇرگەن ەشكىم جوق!
ونلاين ءبىلىم جۇيەسىن باياعىدا-اق مەڭگەرىپ العاندار الەمنىڭ مۇنداي فورماتقا 2008 جىلى كوشكەنىن راستايدى. ءبىر سۇحباتىندا «Shonbay» ونلاين ۋنيۆەرسيتەتىنىڭ نەگىزىن قالاۋشى قۋانىش شونباي: «ءبىز تاعى 10 جىل قاشساق بولاتىن ەدى، ءبىراق كارانتين باستالىپ كەتتى» دەگەن ەدى. راسىندا، ۆيرۋس بىزگە باسقا شەشىم قالدىرمادى. ازامات دەنساۋلىعىن العاشقى ورىنعا قوياتىن مەملەكەت ءۇشىن ەلدە كارانتين جاريالاپ، قايعىلى وقيعانىڭ الدىن الۋ باستى شارت ەدى.
ءارىپ تانىعالى ءداستۇرلى ءبىلىم بەرۋدى عانا يگەرگەن وقۋشى مەن ستۋدەنت ءۇشىن ءبۇل جۇيە تىم تاڭسىق بولدى. كۇتپەگەن وزگەرىستەر سانادا سان سۇراقتى قالدىردى. نە بولسادا ونلايننىڭ ابىگەرىمەن العاش بوپ تانىسقان ۇستازدار قاۋىمى. ءبىلىم الۋشىلاردىڭ دەمالىسى كەزىندە-اق مۇعالىمدەرگە سايت جۇيەلەرىن يگەرۋ تاپسىرىلعان ەدى. وسى تۇستا تەحنيكالىق جاۋاپكەرشىلىكتى عانا ەمەس، شاكىرتىنىڭ ساباققا دەگەن قىزىعۋشىلىعىن دا قاتار باقىلاعان ۇستازدار ەڭبەگىن اتاپ وتپەسكە بولماس!
باستاپقىدا باياۋ ينتەرنەت، تەحنيكالىق اقاۋلار، ءبىلىم بەرۋ سايتتارىنداعى كەلەڭسىزدىكتەر دەگەن سىندى ماسەلەلەرمەن بەتپە-بەت كەلدىك. دەگەنمەن، جاڭا وقۋ جىلىندا جاڭا پلاتفورمالاردى ىسكە قوسىپ، تولىققاندى ءبىلىم الۋ مۇمكىن بولدى. نە بولسادا وزگەرىستەر تاجىربيە قورىن جيناقتاۋدىڭ باستى سەبەپكەرى.
قاشىقتىقتان ءبىلىم الۋعا كوپتىڭ ەتى ۇيرەندى. ەكراننىڭ ار جاعىنداعى ۇستازبەن بايلانىس نىعايدى، ستۋدەنتتىڭ وزىندىك جۇمىسقا دەگەن جاۋاپكەرشىلىگى ارتتى، ىزدەنىس بايقالدى. ءبىرازى، كومپيۋتەرلىك شەبەرلىگىن شىنىقتىرسا، ەندى ءبىر بولىگى ءبىلىمنىڭ قاينار كوزىن تاپتى. نە بولسادا، شەكتەۋلى جاعدايدا، شەكسىز مۇمكىندىكتەرگە يە ستۋدەنتتەر جاڭا فورماتتان كوپ دۇنيە مەڭگەرگەنىنە ەش ءشۇبا جوق!
اسەم جۋلداسوۆا 2 كۋرس، جۋرناليستيكا ماماندىعى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى
You Might Also Like
-
سان عاسىرلاردان بەرى اتا-بابالارىمىزدان ءتۇرلى جادىگەرلەر مەن قۇندى سالت-داستۇرلەر، ءتۇرلى تاريحي ەستەلىكتەر ميراس بولىپ، بىزگە جەتۋدە. سولاردىڭ ىشىندەگى ەڭ ەلەۋلى «التىن دىڭگەك» دەپ ۇلتت...
