سوسيالدىق ەكپىن
ەكپىن ەدىلدى ورلەپ، جايىقتى جالپاعىنان باسىپ، ورالدىڭ ەتەگىندەي بۇرق-سارق ەتىپ، دالاعا بەت الدى.
ءور كوكىرەكتەنگەن ەكپىننىڭ ۇلى قيمىلى تيان-شان ەتەگىن باسىپ، ءدال توبەسىنەن ءبىر-اق سەكىردى.
ەڭبەكتى ەڭىرەتىپ، ەردىڭ ەرلىگىن سىناپ، قۇرعاقتى – ءشول، ءشولدى كولگە اينالدىرىپ اۋىلدى ەكىنشى تۇرگە تۇسىرەيىن دەدى. دابىلداعان دولى ەكپىنگە اياۋسىز اسقارلار مەن كەرتەلى كەزەڭدەر ەرىكسىز سىزىلىپ قول بەردى. قارسى شاپقان قاسكۇنەمدەردىڭ تاۋالىن شاعىپ، تارىسىن ۇكتىردى.
جەكە باتىرسىنعانداردى جەلكەسىنەن باسىپ، تىزەسىن بۇكتىردى. جەلدى جەندەت قىپ، بورانىن بوراتىپ، داۋىلىن سوقتىردى. ءالسىز پارازيتتەردى ۇشىرىپ اكەتىپ، تۋلاعان تولقىنعا تىعىپ جىبەرگەندە كۇرە تامىرلارى پىتىر-پىتىر ەتتى. جىندى تولقىن ۇستى-ۇستىنە سابالاڭ قىرعيداي قاعىپ، اعىزىپ اكەتىپ جاتتى.
بۇل كەزدە ەكپىن ەڭبەك كورىگىن باسقان ساحاراداعى سانسىز كولحوزدى اۋىلدىڭ ورتاسىنا بارىپ، ەڭبەكتى ءوربىتىپ ىستەرىن، ءونىمىن ارتتىرعان ەدى.
ۇيىمداسقان ەلدەن بىلەگىن سىبانىپ مىڭداعان بولاشاق پرولەتارياتتار ساپقا ءتىزىلدى.
اۋىلدا ەڭبەك ازانى تارتىلعاندا وندىرىسكە بولات بالعالار مينۋتىندا مىڭ رەت سوعىلدى. ەكپىنگە ەكپىن، قايراتقا قايرات جالعاسىپ ميلليون بىلەك جۇبىن ايىرماي، توپتانعان كۇيىندە قيمىلداپ ەدى. توپتى جەتەكتەپ قيمىلدى قىزدىرىپ، وندىرىسكە قاراي الا-اق جونەلدى. قىزىل تۋلار جەلبىرەپ اسپاندا شارپىدى. تاباندا ەڭبەك قازانى قايناپ، ەڭبەكشىلەر بۇلاعىنىڭ كۇمىس سۋى كۇنگە شاعىلىسىپ، سۋساعاننىڭ سۋسىنىن، شولدەگەننىڭ ءشولىن باسقانداي بولدى. ەڭگەزەردەي دەنە، جوتالى جاۋىرىندار مەن مىقتى بىلەكتەر بۇگىن عانا كۇرەسەتىن جاۋىن، الىساتىن ەڭبەگىن تاۋىپ، قۇرىشى قانىپ، ستال شپۋردى قايتا-قايتا سوققاندا جىمىڭداسقان تاستى كۇل-تالقان ەتىپ، وپىرىپ، جەرگە تۇسىرگەندەي بولدى. ءبارىنىڭ دە قايراتتارى قايناپ، جۇزدەرى جايناپ، كۇشكە كۇشتى جانىپ، ىنتالى كوڭىل، قۋانىشتى ايقايمەن ءبىز جاڭا پرولەتاريات ءوندىرىسى بەس جىلدىقتىڭ بولات ءتۇيىنىن كۇشتى قولمەن شەشىپ، ۇلى ەكپىنمەن قابىرعاسىن قالايمىز. ءبىزدىڭ قايلا كەندى قوپارسا، بالعا تەمىردى بۇيىرادى. ءبىز قازاقستان پرولەتارياتى!
ساتىر-سۇتىر ەتىپ، بىردەن جەر استى قاڭعىرىپ جايلاعاندا، سانسىز قيمىل، ساپالى ەڭبەك ۇلى كوپكە شىداماي، تاسپەن جىمىڭداسقان مەتالدىڭ قۇيقالارى وپىرىلىپ، جاتاعان اربالار لەزدە ارتىلىسىپ، سىرتقا شىعارىلىپ جاتتى.
قارقىنعا قارقىن قوسىلىپ، قارعا قىستىرىلعان وتكىر شپۋرلاردىڭ ميلليونى ءبىر قالىپپەن تاسقا قادالعاندا شاحتى استى نايزاعايدىڭ وتىنداي تۇتانىپ، ستال شپۋردىڭ ۇشى تيگەن كوك تاستاردان ۇشقىن جارق-جۇرق ەتتى. ۇشقىن ەرىلگەن ەڭبەككە يە بولعان، ەن دالاعا ەڭبەك دۇكەنىن ورناتقان، بىرلەسىپ ءىس، تىزەلەسىپ كۇش جۇمساعان، ورىس، قازاق جۇمىسشىلارىنىڭ قايتپاس جىگەرى ەكىلەنگەن ەكپىننىڭ ۇشقىنى ەدى.
سەكۋند مينۋتتى، مينۋت ساعاتتى، اي جىلدى قۋىپ، بىرلەسكەن بىلەكتەردەن ىرگەلى قارقىن تۋدى.
جۇمىسشىلاردىڭ جۇرەگى ءوندىرىس تىلەگى بەس جىلدىقتى ءتورت جىلدا ورىنداۋ بولدى. سوسيالدىق جارىسپەن ۇدەتپەلى جوسپاردى، شارتتاسقان ساعات، قابىلدانعان كۇنگە جەتكىزبەي ورىنداۋ ءۇشىن جانتالاسىپ قيمىلداعان قارقىننان ونگەن ولشەۋسىز ونىمدەر، جوعارعى قالىپپەن سىرتقا شىعارىلىپ ۇلكەن اۋىزدى «دومنا» پەشىنىڭ ىشىنە كىرىپ ارالاس كۇيىنەن ايىرىپ، قورىتقان قورعاسىنداي قورىتىلىپ، ەڭبەك سارايىنا ءۇيىلىپ جاتتى.
جۇمىسشىلار بارلىق مايداننىڭ كورىگىن باسىپ، تەمىرىن قىزدىرعاندا «وڭشىل» «سولشىل» ەلىرگەن وپپورتۋنشىلار استىندا قالىپ، زيانكەستەردىڭ تامىرىنا بالتا شابىلىپ جاتتى. ەكپىن قىزىپ، بىلەك بىلەۋلەنىپ الىپ، كۇشتەر بارلىق مايدانداردا دا سوسيالدىق قۇرىلىس جەڭەتىنىنە سەنىم بەرگەندە، وندىرگەن ونىمدەرى كەپىل بولدى.
ۇلاسقان ەڭبەك، بىرلەسكەن بىلەك، كۇشتى قارقىن، جولباسشىمىز كوممۋنيست پارتياسى باستاعان سوسيالدىق قۇرىلىستىڭ قارقىنى ەدى.
You Might Also Like
