InfoHub Logo

س.تورايعىروۆ اتىنداعى وبلىستىق كىتاپحانانىڭ بالالار ادەبيەتى ءبولىمى كۇردەلى جوندەۋدەن ءوتىپ، قولدانىسقا قايتا بەرىلدى. بۇگىن قايتا جاڭارتىلعان كىتاپحاناعا وبلىس اكىمى ءابىلقايىر سقاقوۆ ارنايى كەلىپ، اتقارىلعان جۇمىسقا وڭ باعا بەردى.

-جوندەۋ جۇمىستارىنىڭ ساپالى اتقارىلعانى كوزگە بىردەن كورىنىپ تۇر. پاندەميا اياقتالعان سوڭ بۇل جەردە بالالار الاڭسىز ءبىلىم الاتىن بولادى. جۇمىسىن تەز ءارى تياناقتى اتقارعان مەردىگەر كومپانياعا ريزاشىلىق بىلدىرەمىن، -دەدى ءا.سقاقوۆ.
ايتا كەتەرلىگى، وبلىستىق كىتاپحانانىڭ بالالار ادەبيەتى بولىمىنە قازاقستان جازۋشىلار وداعىنىڭ مۇشەسى، اقىن، قالامگەر، بالالار ادەبيەتىنىڭ كورىنەكتى وكىلى، جەرلەسىمىز سۇلەيمەن بايازيتوۆتىڭ ەسىمى بەرىلدى.

ەلۋ جىلدان استام جوندەۋ كورمەگەن نىساندا جاس جەتكىنشەكتەردىڭ ءبىلىم الۋىنا، ۋاقىتتارىن ءتيىمدى وتكىزۋىنە بارلىق جاعداي قاراستىرىلعان. كىتاپحانانىڭ قىزمەت كورسەتۋ جۇيەسى بىرنەشە ايماققا بولىنگەن.

ماسەلەن، «ءبىلىمپاز» ايماعىندا ابونەمەنت پەن وقۋ زالى بار. بۇل جەردە وقىرماندار ءۇشىن ۇيگە كىتاپ الۋعا نەمەسە وقۋ زالىندا وتىرىپ كىتاپ، گازەت-جۋرنالدار وقۋعا مۇمكىندىك بار. «بالدىرعان» وقۋ ايماعىندا مەكتەپكە دەيىنگى جانە باستاۋىش مەكتەپ جاسىنداعى بالالارعا ارنالعان تانىمدىق ويىندار ايماعى شوعىرلانعان. «وركەن» ۇلتتىق شىعارماشىلىق ايماعىندا بالالاردىڭ وقۋعا دەگەن قىزىعۋشىلىعىن ۇلتتىق سالت-داستۇرلەر ارقىلى دامىتۋعا، شىعارماشىلىققا باۋلۋعا باسىمدىق بەرىلمەك. «IT-بالا» مەديا ايماعى جاس وقىرمانداردى كومپيۋتەرلىك ساۋاتتىلىققا باۋلۋ، اقپاراتتىق مادەنيەتتى قالىپتاستىرۋعا ارنالعان. «زەردە» ينتەللەكتۋالدىق ايماعىندا ءتۇرلى تاقىرىپتارداعى سەمينارلار، كونفەرەنسيالار، پرەزەنتاسيالار، ترەنينگتەر، ويىن-ساۋىق شارالارى وتەتىن بولادى. زاماناۋي تەحنيكالار ارقىلى وقىرماندارعا بەينەفيلمدەر كورسەتىلەدى.

س.تورايعىروۆ اتىنداعى وبلىستىق كىتاپحانا باسشىسى شولپان شاحمەتوۆا بالالار ادەبيەتى بولىمىندە 86 مىڭنان استام كىتاپ قورى بار ەكەندىگىن اتاپ ءوتتى. ءىشى جارىق ءارى جىلى كىتاپحانا تولىقتاي زاماناۋي تەحنيكالىق قۇرالدارمەن جابدىقتالعان. جاڭارتىلعان نىسان بالالار ءۇشىن قىزمەت كورسەتۋگە دايىن.

---