InfoHub Logo

قازاقتا توي دەسە قارا باس دومالاعان. قازاق حالقى بار كەزدە توي دا جالعاسىن تابا بەرمەك. قازىرگى كەزدە ۇلان-اسىر توي جاساۋ ۇلكەن ماڭىزعا يە جانە ول حالىق اراسىندا باسەكەگە اينالعان. سالتاناتتى توي ءراسىمىن وتكىزۋ ءۇشىن ادامدار، ءتىپتى، نەسيە-قارىز الۋعا داعدىلانعان. ءسالت-داستۇر بارىنە ورتاق بولسا دا، ءار قالانىڭ وزىنە ءتان ەرەكشەلىگى بار. مىسالى، وڭتۇستىكتە بەتاشار ءراسىمى ۇلتتىق اسپاپ دومبىرامەن اشىلسا، باتىستا ەسترادامەن وتكىزۋ ادەتكە اينالعان. 

ءقازىر ءسانى مەن سالتاناتى كەلىسكەن ءزاۋلىم مەيرامحانالار، شوۋمەن-اسابالار جانە ءار ءتۇرلى ءان-بي انسامبلدەرىنىڭ كاسىبىنىڭ دومالانىپ تۇرعان زامانى. توي وتكىزۋدە بۇلاردىڭ ءبىرى تىزىمدە جوق بولسا، حالىق اراسىندا اڭگىمە بولاتىن دارەجەگە جەتتى. مۇنايلى ولكە اتىراۋدا توي ءراسىمىن وتكىزۋ قالاي، وسىعان توقتالاتىن بولامىز. 

قازاقتىڭ شاتتىقتان شارشاعانىن كورگەن جوقپىز. قالاي دەسەك تە، الىس-بەرىسى، بارىس-كەلىسى ۇزىلمەگەن، جىل ون ەكى اي توي جاسايتىن حالىقپىز. كەڭ پەيىل، كەرەمەت دارحان بولمىستىڭ ارقاسىندا مەيرامحانالاردىڭ دا مەرەيى اسىپ، تابىسى ارتىپ، كاسىبى ىلگەرىلەۋدە.

نۇرتىلەك، باعدات، قۋاندىق، دامير. بۇلار ءقازىر ابىرويى دا، اقشاسى دا اسپانداپ تۇرعان، اتىراۋعا اتاعى شىققان ايگىلى اسابالار. قازىرگى توي يەلەرى تويعا كەلگەن قوناقتاردىڭ كوڭىلىن كوتەرىپ، جوعارى دارەجەدە وتكىزگىسى كەلسە، وسى اسابالارعا جۇگىنەدى. ولاردىڭ ءبىر كۇندىك گونورارى 300 مىڭنان باستالادى. اتىراۋداعى ەڭ قىمبات اسابا – نۇرتىلەكتى ءوز تويىڭىزدا كورگىڭىز كەلسە، قورجىنىڭىزدا 1000$ بولۋى ءتيىس. 

«كەشىڭىزدىڭ شىرايىن كەلتىرەتىن شىرايلىم!». قازىرگى تاڭداعى ەڭ كوپ  سۇرانىسقا يە «شىرايلىم» توبى وسى ۇرانمەن كوپ تويدىڭ شىرايىن كەلتىرىپ ءجۇر. مىڭ بۇرالعان بيشىلەرىمەن، كوزدىڭ جاۋىن الار قازاقى ناقىشتاعى ادەمى كويلەكتەرىمەن ەرەكشەلەنەدى. ولار سالت-داستۇرىمەن قوسا، زاماناۋي باعىتتاعى قىز ۇزاتۋ، كەلىن ءتۇسىرۋ، قۇدا كۇتۋ راسىمدەرىن وتكىزەدى. بۇل توپ لازەرلىك شوۋ باعدارلاماسىمەن حالىق اراسىندا ۇلكەن تانىمالدىلىققا يە. ەڭ ءبىرىنشى ورىندا تۇرعان ءانسامبلدىڭ ءبىر تويعا قىزمەت ەتۋ باعاسى – 150 مىڭ بولسا، باسقا انسامبلدەردىڭ دە سۇرار باعاسى وسىدان كەم ەمەس. سونىمەن قاتار بۇل ءتىزىمدى «شولپان-اي»، «ءىنجۋ-مارجان»، «التىن عاسىر»، «بەيمارال» جانە ت. ب. توپتار تولىقتىرادى. 

سونىمەن قاتار، اتىراۋلىق تويلار ونەر جۇلدىزدارى ەڭ كوپ توبە كورسەتەتىن ورتاعا اينالعان. ۇنەمى سۇرانىسقا يە انشىلەر قاتارىندا ەركە ەسماحان، تورەعالي تورەالى، ءابدىجاپپار ءالقوجا، جانبولات پەن جازيرا، نۇربولات ابدۋللين جانە ت. ب. بار. ولاردىڭ ءبىر تويعا كەلىپ ءان سالۋى 5000$ مەن 7000$ ارالىعىندا.

قازاقتىڭ تويى – تاربيەنىڭ قۇرالى، جەرگىلىكتى مادەنيەتتىڭ كورسەتكىشى. بۇرىندارى ادەت-عۇرپىمىزدى، ءسالت-داستۇرىمىزدى ناسيحاتتاپ، ونەر جارىستىراتىن تورقالى تويدىڭ ءوزى بولعان. ال، قازىرگى تويدىڭ ءمان-مازمۇنى دا، ماڭىزدىلىعى دا مۇلدەم باسقاشا. جاڭاشالاندى دەيسىز بە، ءوزىڭىز بىلەسىز.

---