InfoHub Logo

تاربيە، ءتالىم - كىتاپتا.
تاربيە ماسەلەسىن ءسوز ەتكەندە بالالارىمىزدىڭ كىتاپ وقۋدان قول ءۇزىپ بارا جاتقانى جانعا باتادى. وقۋشىلاردىڭ كوپشىلىگىندە سامارقاۋلىق باسىم، قىزىعۋشىلىق جەتىمسىز. ءتىپتى اشىعىن ايتساق، كوركەم تۋىندى وقىمايتىن، كوركەمدىك الەمىنە قىزىقپايتىن، ودان گورى تەلەديدار، كينو كورگەندى حوش سانايتىن وقۋشىلار قاتارى جىلدان - جىلعا كوبەيىپ كەلەدى، اششى دا بولسا، شىندىق وسى. بۇل جاعدايدا ورتا جانە جوعارى مەكتەپتەر ۇستازدارى، ءبارىمىزدىڭ دە قاتىسىمىز بار. قاي قايسىمىز دا شاكىرتتەرىمىزدەن جەتكىلىكتى دەڭگەيدە تالاپ ەتە بىلەمىز بە؟ ماكسيم گوركيي:«اشىققان ادام اسقا قانداي وبىر بولسا، مەن كىتاپ وقۋعا سونداي وبىرمىن...» دەگەن ەكەن.
ال، بۇگىندە وسىنداي جاستار كەزدەسە مە...

كىتاپ - ادام بالاسى اقىل - ويىننان تۋعان رۋحاني بايلىقتى ساقتاپ، ونى ۇرپاقتان - ۇرپاققا جەتكىزىپ وتىراتىن، ءبىلىم مەن تاربيە بەرەتىن قۇرال. ول - ادامزات جاساعان ەڭ ۇلى كەرەمەتتەردىڭ ءبىرى. مەنىڭ ويىمشا، بالالار تەلەديدار مەن كومپيۋتەر ويىندارىنا اۋەس سياقتى. ولار سول كوگىلدىر جاشىكتەردەن (اۋديو، ۆيدەو، ينتەرنەت) ءبارىن دايىن كۇيىندە قابىلداپ جاتىر. نەلىكتەن ءبىزدىڭ حالىق كىتاپ وقىمايتىن دەرتكە ۇشىرادى. كىتاپحاناشىنىڭ، اتا - انا مەن ءمۇعالىمنىڭ بەلسەندى كومەگى قاجەت. ولارعا بارلىق ءبىلىم كىتاپتا ەكەنىن الىدە بولسا جەتە ءتۇسىندىرىپ كومەكتەسۋىمىز قاجەت. ول ءۇشىن ونى مەكتەپ تابالدىرىعىن اتتاعان بۇلدىرشىندەردەن باستاساق. «ارتىق عىلىم كىتاپتا، ەرىنبەي وقىپ كورۋگە» دەپ اباي اتامىز ايتقانداي، كىتاپتى بالاعا جاستايىنان وقۋعا باۋلۋ كەرەك. ءبىراق، ەشقاشان دا بالانى وقۋعا ماجبۇرلەمەۋىمىز قاجەت. وقۋشىنى ءوز بەتىمەن كىتاپ وقۋعا ۇيرەتىپ، ونى قالىپتاستىرۋ ءۇشىن جۇيەلى جۇمىستار جۇرگىزە ءبىلۋ كەرەك. كىتاپپەن شىنداپ جۇمىس ىستەي الماۋ بىرەۋلەردىڭ كىتاپقا دەگەن سۇيىسپەنشىلىگىن مۇقالتسا، ەندى بىرەۋلەردى جۇيەسىز، ويلانباي وقۋعا اكەلىپ سوقتىرادى. وسى باستان الدىن الماساق، بارار - بارا رۋحاني الەمگە ءاتۇستى قارايتىن ىندەتكە جولىعامىز. شىنىمەن دە ادام بالاسىنىڭ ساناسىن رۋحاني ادامگەرشىلىكتەن گورى كۇيكى تىرلىك باسىپ كەتسە، وندا ونىڭ ومىرىنە اقاۋ تۇسەتىنى بەلگىلى. ورىستار كىتاپ وقىمايتىن حالگە جەتكەنىن زەرتتەپ، زەردەلەپ كۇرەسۋدە. بىزدە جۇمىس جوق دەۋدەن اۋلاقپىن. قول جەتكىزگەن جەتىستىكتەرىمىزدە جەتەرلىك. ارينە، بارلىق وقۋشىلاردىڭ ادەبي تۋىندىلاردى وقىمايدى، جالقاۋ، ونەرگە قىزىقپايدى دەپ كىنالاۋ دا دۇرىس بولماس. ىزدەنىش، كىتاپتى ءسۇيىپ وقيتىن، مەكتەپتە وقىپ ءجۇرىپ ءتۇرلى پاندىك وليمپيادالارعا، عىلىمي جوبالارعا قاتىساتىن، جۇلدەلى ورىنداردى يەلەنىپ جۇرگەن وقۋشىلار دا بارشىلىق. بۇلار ءبىراق، ازشىلىق. دەسەك تە، ۇلتتىڭ رۋحاني الەمگە ءبىر تابان جاقىن بولۋى ءۇشىن مۇمكىندىك جاساۋىمىز كەرەك. شىنىمەن دە، ەرتەڭىن ويلاعان ەل ەڭ الدىمەن رۋحاني الەمنىڭ ەشقانداي توسقاۋىلعا ۇشىراماي، ناتيجەلى جۇمىس ىستەۋىنە جاعداي جاسايدى. سەبەبى، ۇلتتىڭ ۇلت بولىپ قالۋى ءۇشىن، حالىقتىڭ ورەسى باستى ورىندا تۇرۋى كەرەك. ويتكەنى، ادام مەن ادامدى، ەل مەن ەلدى تەڭەستىرەتىن - ءبىلىم. قازاقستان بيىك بەلەستەرگە عىلىمىن وركەندەتۋ ارقىلى جەتەدى. سوندىقتان ءبىلىمدى بولماي، العا قويعان ماقساتىمىزعا جەتە المايمىز. ورىستىڭ تانىمال پەداگوگى ۆ. سۋحوملينسكييدىڭ مىنا ءبىر ءسوزى، ءسوزى ەمەس - اۋ، تالابى دەيىكشى، بۇگىنگى مەكتەپ ومىرىندە ەتەك الىپ وتىرعان الگىندەي كەمشىلىكتەردىڭ سەبەبىن انىق اڭعارتقانداي.