ءتىزىم
بىزبەن ءبىر عيماراتتا ورنالاسقان ءبىر باسقارمانىڭ بەلگىلى قىزمەتكەرى شىمبەرگەندى كوپتەن تانيتىنمىن. ويتكەنى، ول كوپشىلىككە اۋداندىق گازەتتىڭ شتاتتان تىس ءتىلشىسى رەتىندە تانىلعان-دى. ونى تىلشىلىككە تارتقان دا ءوزىم. حابار-وشار ماقالا جازدىرىپ، ونى وڭدەپ بەرىپ، گازەتىمىزدە جاريالانۋىنا ىقپال ەتەتىنمىن. ىزدەگەنگە سۇراعان دەگەندەي، ءبۇل جولعا ءتۇسىپ العان شىمەكەڭ ەندى كىشكەنتاي جاڭالىق حابار جازۋدان قۇلاش-قۇلاش ماقالاعا كوشتى. كۇن قۇرعاتپاي رەداكسياعا ءبىر سوعاتىن ول، بىردە اپتا بويى حابارلاسپاي كەتتى. "ياپىر-اي، بۇل شىمەكەڭە نە بولدى ەكەن" دەپ جۇرگەنىمىزدە ول كىرىپ كەلدى. شارشاڭقى كۇيدە، ەڭسەسى ءتۇسىپ كەتكەن. "وۋ، شىمەكە، نە بولدى، امانشىلىق پا، ايتەۋىر"، دەپ جاتىرمىز. "قوي قۇرىسىن، ءبارى وزىمنەن بولدى"، — دەيدى ول كوزىمەن جەر شۇقىپ. وقيعا بىلاي بولىپتى.
شىمەكەڭ كۇندەگى داعدىسىمەن جۇمىسقا كەلگەنى سول-اق ەكەن، كابينەتىنە ءبىر ارىپتەسى كەلىپتى دە:
— شىمبەرگەن، ءسىز ەستىگەن بولارسىز، باستىق ءبىر ءتىزىم جاساتىپ جاتقان كورىنەدى عوي؟ — دەيدى.
— جوق ەستىگەن ەمەسپىن، ول قانداي ءتىزىم؟ — دەيدى بۇل.
— مەرەكە جاقىنداپ قالدى، بالكىم، سىياقى شىعار، — دەگەن ارىپتەسى جونىنە كەتەدى.
ارىپتەسىنىڭ سوزىنە ويلانىپ قالعان شىمبەرگەن ايتىلعان اڭگىمەنىڭ انىق-قانىعىن بىلمەككە باستىقتىڭ كابينەتىن جاعالايدى. جان جوق. ەسىك اشىق تۇر. اياعىنىڭ ۇشىمەن باستىقتىڭ ستولىنا جاقىندايدى. شىنىندا دا جازۋ ماشينكاسىنا باسىلعان ءتىزىم جاتىر. كوز جۇگىرتسە، باس-اياعى ون ءبىر ادامنىڭ ءاتى-جونى جازىلعان، اراسىندا شىمبەرگەن جوق. ءوزىنىڭ "ىمىرتبايەۆ" دەگەن فاميلياسىن ءبىر پاراق قاعازدى قالاي اۋدارسا دا تابا المايدى. سودان كوڭىل كۇيى ءتۇسىپ، جۇمىسقا ىقىلاسى بولمايدى."ۇنەمى وسىندايدا شەتتەتەدى، وتكەندە كاسىبي مەرەكە قارساڭىندا دا سىيلىقتان قاعىلعانى بار، سوندا ءبىز توقالدان تۋدىق پا؟" — دەگەن وي دەگبىرىن قاشىرادى. باستىققا تىكەلەي بارىپ ايتۋعا ۇرسىپ تاستاي ما دەپ، باتىلى بارمايدى. ءتىزىم ءالى تولىق ەمەس شىعار، بالكىم مەنى دە قوسار دەگەن ەسەك دامە دە جوق ەمەس-تى. شىداپ ورنىندا وتىرا الماي، باستىق جاقتى تاعى جاعالادى. جىم-جىرت. باستىقتىڭ الدىنداعى ماناعى ءتىزىم سول كۇيدە. "نارتاۋەكەل! وسىلار مەنى ۇمىتىپ جۇرگەن شىعار"،- دەيدى دە، قالامدى قولىنا الىپ، ون ءبىر ادامنىڭ سوڭىنا ون ەكىنشى عىپ ءوزىن قوسادى دا، شىعا جونەلەدى. ورنىنا كەلىپ ءالىپتىڭ ارتىن باعادى. بايقاپ وتىر باستىق كەلدى، تەلەفونمەن بىرەۋلەرمەن سويلەستى، كابينەتىنە بىرەۋ كىرىپ، بىرەۋ شىعىپ جاتىر. مۇنىڭ باعاناعى ارەكەتىنە باستىق تا، باسقا دا ءمان بەرمەگەن سياقتى. جۇمىس كۇنى اياقتالۋعا تاياپ بارادى. ورنىنان كوتەرىلىپ، باستىقتىڭ كابينەتىنە تاياق تاستام قالعاندا ونىڭ شىعىپ بارا جاتقانىن كوردى. بۇعان كوز قيىعىن دا سالار ەمەس. كابينەتىنىڭ ەسىگى باياعىشا ايقارا اشىق. اياعىن ساناپ باسىپ باستىقتىڭ ستولىنا تايادى. ءتىزىم سول كۇيى... جو..جوق! قىزىل قارىنداشپەن مۇنىڭ ءاتى-جونىن ءبىر-اق سىزىپتى. ەرەگەسكەندەي بۇل كورنەكىلەۋ عىپ قايتا جازادى دا، شىعا جونەلەدى. جۇمىستىڭ اياعىندا باستىقتىڭ سىرتقا شىققانىن كۇتىپ تۇرىپ، تىزىمگە كوز جۇگىرتسە، مۇنى تاعى سىزىپ تاستاپتى. بۇل تاعى ءوزىن قوسادى الگى تىزىمگە. ءسويتىپ، باستىق ءۇش رەت سىزىپ، بۇل دا قالىسپاي ءۇش رەت قوسادى!...
ەرتەڭىنە قىزمەتكە كەلسە كەشەگى ءوزى بىرنەشە رەت كورگەن ءتىزىمدى ءىلىپ قويىپتى، جۇرت ءبىرىن-بىرى كيمەلەپ وقىپ جاتىر. الىپ-ۇشىپ بۇل دا جەتەدى. "باسقارمانىڭ قايتا قۇرىلۋىنا وراي باستىقتىڭ بۇيرىعىمەن جۇمىستان قىسقارعاندار" دەپتى دە قىزمەتكەرلەردىڭ ءاتى-جونىن ءتىزىپتى. ەڭ سوڭىندا ون ەكىنشى بولىپ ىمىرتبايەۆ شىمبەرگەننىڭ ءاتى-جونى تۇر. مىنە بار-جوعى وسى.
نە دەيمىز، ايتەۋىر، ارتى جاقسى بولعاي...
You Might Also Like
-
اقتاۋدا حالقىمىزدىڭ اتاقتى اقىن-جىراۋى قاشاعان كۇرجىمان ۇلىنىڭ 150 جىلدىق تويى ءوتىپ جاتقان-دى. جاڭاوزەننەن كەپ، قوناقجاي ىزدەپ سابىلماي-اق بۇرىننان تانيتىن ءارى باجالىعى بار بەردىباي دەگەن ازاماتتىڭ ...
