تۋعان ەلگە سوڭعى ءسوز
"كەشەگى وتكەن عابيدەن دوسقا: "ەندى ەكى جىل جۇرسەك جەتپەي مە؟! " دەگەنىم بار ەدى. سول مولشەرىم مولشەر بولدى. قوينى سۋىق قاسيەتتى قارا جەر قۇشاعىنا، مىنە، مەن دە كەتكەلى جاتىرمىن.
ۇمىتپەن، كۇرەسپەن، سەنىممەن وتكىزگەن ۇزاق عۇمىرىمدى قورىتا قاراسام قۋانىشىم دا، رەنىشىم دە مول ەكەن. جاڭا قازاق مەملەكەتىنىڭ بيىك تۋى مەنىڭ كوز الدىمدا كوتەرىلدى. بۇگىندە كۇللى الەم نازارى اۋعان ىرگەلى ەلگە اينالدىق. ءبىراق ادەبيەت پەن ونەر ۇلى بولماعان جاعدايدا ۇلت ۇلى بوپ ەسەپتەلمەيتىنىن ۇمىتپايىقشى. جان سۇيسىنتەر بىرلىك جوق جەردە سانالى تىرلىك تە جوق. كەيدە مىستىڭ التىنعا، قىراننىڭ قارعاعا تەلىنىپ جاتاتىنى وسىنىڭ كەسىرى. ۇلكەن ونەردىڭ ۇلكەن، تازا مىنەزى بولۋعا كەرەك. ءوزىم ىرگەتاسىن قالاسقان قازاقتىڭ اتا ادەبيەتىنىڭ اتىنان، وزدەرىڭ ءقادىر تۇتقان الىپتار توبىنىڭ اتىنان وتىنەمىن: مەنى سوڭعى ساپارعا شىعارىپ سالاردا وسى اقتىق تىلەگىمدى ەسكە الىڭدارشى.
قالام ۇستاۋعا ءحالىم بولماعاندىقتان، حاتتى ءالجاپپار مەن مۇحتارعا ايتىپ جازدىردىم.
ال، قاسيەتتى ەلىم، جەرىم، قيىسپاس دوس - جاراڭ، اعايىن-تۋىس، ساۋلەلى جاس ۇرپاق، حوش، حوش بولىڭدار!
You Might Also Like
-
ايدار التى ساباقتان شىعىپ، ىشەك-قارنى شۇرقىراپ، ۇيگە ءولدىم-تالدىم دەپ بۇراتىلىپ جەتكەنىندە، بۇرىنعىداي سىرتقى اۋلادان كوز ىلەسپەيتىن جىلدامدىقپەن زىپ بەرىپ كىرە سالا، «مام-ما-اااۋ!» دەپ...
