تۇياق ءولى كىسى
تۇلكىباي مىرزا كوشەدە كەلە جاتقان مومىنباي موللاعا جولىعىپ: "ءيا، مولداكە، جاقسى كەز كەلدىڭ. ...سالاۋمالەيكۋم، — مىنا ءبىر داستەبرنەگە (ۋدوستوۆەرەنيە بولۋى كەرەك) قول قويىپ بەرە قويىڭىزشى!" دەدى.
موللا: — ول نەنىڭ داستەبرنەسى؟
تۇلكىباي: — مەنىڭ تۇياق دەيتىن اعام قاتتى ناۋقاس ەدى. سوعان كيىم الۋعا اۋىلنايدان العان داستەبرنە عوي، كوميتەتكە الىپ بارىپ ەم، ۋكازىنا موللا قول قويماسا بولمايدى دەپ بەرمەي شىعاردى. سونىمەن ءسىزدى ىزدەپ ءجۇر ەدىم.
موللا: — ويپىرماي، كەشە دە بىرەۋ، باعانا دا بىرەۋ قول قويعىزىپ الىپ ەدى، ءسىرا ءبىزدىڭ ەلدىڭ ولەيىن دەپ جاتقان كىسىسى تىم كوبەيىپ كەتىپ جۇرمەسە!
تۇلكىباي: كوبەيمەيدى. مولداكە، بولىڭىزشى، بىردەڭە قىپ بەرە قويىڭىزشى!
موللا: — ءاي، بىلمەيمىن، مەنىڭ سىرتىمنان دا قول قويىپ العان ءبىرسىپىرا كىسى بار-اۋ دەيمىن.
تۇلكىباي: — تاقسىر-اۋ، ءسويتىپ ايلا-شارا قىلماسا، بولاتىن ەمەس، قاعازسىز ءبىر شارشى — پۇل، ءبىر شيرەك ءشاي بەرۋدى قويعان جوق پا؟! ءتىپتى بۇگىن، بىردەن ارتىق داستەبەرنەسى بار كىسىگە ءشاي دە بەرمەي شىعاردى.
موللا: — ونىڭ ءمانىسى بار. وسىندا قولى قالام بىلەتىن كەيبىر ەپتى جىگىتتەر ەلدەن كەلگەن "بيلەتتى" اۋىلنايلاردىڭ مورىمەنەن ارزان ءشاي الىپ، قىمباتقا ساتىپ جۇرگەندەرىن كوميتەت ءبىلىپ قويىپ، سونىمەن قاعازدى بايقاپ بەرەتىن بولىپ تۇر دەپ ەستىدىم.
تۇلكىباي: — باسە، بولسا بولار، تۇنەۋكۇنى ولاي ەمەس ەدى. ەندى مىنانى بىتىرە قويىڭىزشى.
موللا: — ءاي، تۇكە-اي! ءسوزىڭىزدىڭ ءتۇرى: وسى كىسىنىڭ سىرقاتى ارتىق قاتاڭ ەمەس-اۋ!
تۇلكىباي: — ويباي، قاتاڭ بولماعانمەن ءولى كىسى دەيمىن، ءوزى ءتىپتى ۇيدەن شىعا المايتىن قارت ادام.
موللا: — قارت بولسا دا اجال كەلمەسە، ءسىز ولتىرەم دەگەنگە تۇياقتىڭ ءوزى ريزا بولا قويار ما ەكەن؟
تۇلكىباي: — ونى شىن ولتىرەيىك دەپ تۇرسىز با، ءتاڭىرى، اشەيىن مىنا پۇلعا زارۋلىكتەن قىلىپ تۇرعان دالباسالىق ەمەس پە؟!
موللا: — جارايدى ەندەشە، بۇگىن ولمەگەنمەن تۇبىندە ءبىر ولەر، ءوزىنىڭ دە 10 كەز اق باتەستەن ارتىق نەسى قالدى دەيسىڭ؟! اپكەل قاعازىڭدى!— دەپ قول قويىپ بەرگەن سوڭ ەكەۋى امانداسىپ ايىرىلىستى.
You Might Also Like
-
مەنىڭ قارت اتام بار ەدى. مەن ول كىسىنىڭ جالعىز ۇلىمىن. سوندىقتان دا مەن اۋىرىپ، سىرقاتتانسام، اتامنىڭ دەگبىرى كەتە باستايتىن. ول كىسى ىستىقتان وتە قورقاتىن ەدى. ىستىق شىلدەدە اياعىنا شۇلعاۋ، ءماسى كي...
-
ەلدىڭ كاسىبىنىڭ تۇرىنە وراي اڭگىمەلەرى دە وزگەرىپ وتىرادى. ەگىن، پىشەن، جوق بولسا، ەل اشارشىلىققا بەت السا، ءورىس الاتىن اڭگىمە — ۇرىلاردىڭ ەپتىلىگى، ەتى ءتىرى جىگىتتەردىڭ ەلدەن ولجا تۇسىرگىشتى...
