ۋوررەن باففەتتىڭ 5/25 ەرەجەسى ەڭ ماڭىزدى ىستەرگە كوڭىل بولۋگە كومەكتەسەدى

ماقساتتار ءتىزىمىن قۇرىڭىز

ۋوررەن باففەتتىڭ وزىندە 10 جىل جۇمىس ىستەگەن ۇشقىش مايك فلينتكە قالاي كومەكتەسكەنى تۋرالى ءبىر وقيعا بار. ءبىر كۇنى ول فلينتتەن قانداي مانساپتىق ماقساتى بار ەكەنىن سۇرايدى. «سەنىڭ ءالى كۇنگە دەيىن ماعان جۇمىس ىستەپ جۇرگەنىڭ، مەنىڭ ءوز جۇمىسىمدى دۇرىس اتقارماعانىمدى بىلدىرەدى»، - دەپ ازىلدەگەن ەكەن. ول فلينتكە ماقساتتى انىقتاۋعا ارنالعان جاتتىعۋلاردى ورىنداۋدى ۇسىنادى.

ەڭ اۋەلى فلينت بولاشاقتا قول جەتكىزگىسى كەلەتىن 25 نارسەنىڭ ءتىزىمىن جاساۋى كەرەك بولدى. سودان كەيىن ولاردى ماڭىزدىلىعىنا قاراي باعالاپ، ەڭ باستى بەسەۋىن تاڭداپ الۋى كەرەك. ءبىراق سودان كەيىن فلينت قالعان جيىرما بولىممەن نە ىستەيتىنىن سۇرادى.

«مەن باستاپقى بەس ماقساتىما كوبىرەك كوڭىل بولەمىن. ءبىراق باسقا بولىمدەر دە مەن ءۇشىن ماڭىزدى، - دەپ ءتۇسىندىردى فلينت. – مەن ولارمەن ماڭىزدى بەس ماقساتىما جەتكەنشە اقىرىنداپ جۇمىس ىستەي بەرەمىن». بۇعان باففەت: «جوق، دۇرىس تۇسىنبەدىڭ. سەن بەلگىلەمەگەن ماقساتتىڭ ءبارى «قالايدا جولاماۋ كەرەك» دەگەن تىزىمگە اينالدى. باستاپقى بەس ماقساتىڭا قول جەتكىزگەنشە ولارعا مۇلدەم نازار اۋدارما» دەپ جاۋاپ بەردى.

ءبىر عانا نارسەگە نازار اۋدارۋ نەگە ماڭىزدىراق

ءبىزدىڭ ۇنەمى كوڭىلىمىز باسقا نارسەگە اۋىپ كەتەدى. سول سەبەپتى كوپ ادامدار قانداي دا ءبىر سالاداعى شەبەرلىككە قول جەتكىزە المايدى. جاڭا ءبىر نارسەگە كوڭىل اۋدارعان سايىن، جىبەرىپ العان پايدانىڭ شىعىنىن وتەۋگە تۋرا كەلەدى. بۇل ءبىزدىڭ ۋاقىتىمىزدى جانە زەيىنىمىزدى الادى دا، شىن مانىندە ماڭىزدى بولعان نارسەگە كوڭىل اۋدارۋعا مۇمكىندىك بەرمەيدى.

ءسىز ءبىر عانا ماقساتقا ويىڭىزدى شوعىرلاندىرعان كەزدە، تابىسقا دەگەن مۇمكىندىك ارتا تۇسەدى. ەڭ ماڭىزدى نارسەگە جيناقتالىڭىز جانە سول ءىستىڭ مايتالمانى بولۋعا تىرىسىڭىز.

سانگە اينالعان باعىتتارعا نازار اۋدارماڭىز جانە ءبىر قىزىعۋشىلىقتان ەكىنشىسىنە تەز اۋىسىپ كەتپەڭىز. 5/25 ەرەجەسىن تەك مانساپ جولىندا عانا ەمەس، ءومىردىڭ باسقا سالالارىندا: دەنساۋلىقتا، قارىم-قاتىناستا، جەكە ماقساتتاردا پايدالانىڭىز.

مۇنىڭ ءبارى كوڭىلسىز، ءبىرتوعا ءومىر ءسۇرۋ دەگەندى بىلدىرمەيدى. تەك بوساڭسىپ كەتپەڭىز. نەگىزگى بەس ماقساتقا جەتكەننەن كەيىن كەلەسى ماقساتتارعا قاراي جىلجىڭىز.

بۇل ومىردە قالاي كورىنىس تابادى

ىستەگىڭىز كەلەتىن نارسەلەر جايلى ويلانىڭىز. شەت ءتىلىن ۇيرەنۋ. مۋزىكا اسپابىن يگەرۋ. ءوز ءىسىڭىزدى اشۋ. الەمدى ارالاۋ. كوپ ادام العا قويعان ماقساتىنا ەشقاشان جەتە المايدى. دەمەك، ول ادام ءۇشىن ماقساتتارى شىن مانىندە ماڭىزدى ەمەس. ادەتتە ونداي ماقساتتاردى تەك پايدا اكەلەتىن بولعاندىقتان تاڭدايدى. ءبىراق بۇل وعان ۇمتىلۋ ءۇشىن جەتكىلىكسىز.

مىسالى، ون شەت تىلىندە ەركىن سويلەسەڭىز كەرەمەت بولار ەدى. ءبىراق بارلىق دەمالىس كۇندەرىن گرامماتيكانى ۇيرەنۋمەن وتكىزۋ كوڭىلگە قونبايدى. شەت تىلدەرى ءبىزدىڭ ارتىقشىلىقتار تىزىمىندە جوعارىدا بولمايدى، ادەتتە ءبىز ءۇشىن جۇمىس پەن وتباسى ماڭىزدىراق. سول سەبەپتى ولاردى تەك بوس ۋاقىتىمىزدا عانا وقيمىز دا، ءبىر ءتىلدى ۇيرەنۋ ءۇشىن بىرنەشە جىلىمىز كەتەدى.

ناتيجەسىندە ءبىز ەشقاشان قول جەتكىزە المايتىن ماقساتتاردىڭ ءتىزىمىن الامىز. سول سەبەپتى كۇيزەلىسكە ءتۇسىپ، ءوزىمىزدى كىنالى ساناي باستايمىز. بەس نەگىزگى ماقساتتىڭ قاتارىنا كىرمەگەن ماقساتتار ءسىزدىڭ ومىرىڭىزگە از اسەر ەتەتىن سياقتى. وزىڭىزگە ۇنەمى ماقسات قوسىپ الا بەرگەنشە، ەڭ دۇرىسى، ولاردى قىسقارتا بەرىڭىز. 5/25 ەرەجەسى قاراپايىمدىلىقتىڭ ءومىردى جاقسارتا تۇسەتىنىن تاعى ءبىر رەت دالەلدەدى.

ءوزىڭىز ءۇشىن ماڭىزدى نارسەمەن كوبىرەك اينالىسىڭىز

ۋاقىت پەن زەيىن – ەڭ ماڭىزدى ەكى قور. ءبىراق ەكەۋى دە شەكتەۋلى. جاقسى مۇمكىندىكتەر ولارعا دەگەن ۋاقىتتان كوبىرەك بولادى. ونىڭ ءارقايسىنا جارماسا بەرۋدىڭ قاجەتى جوق. مۇمكىندىك قانشا تارتىمدى بولسا دا، ەگەر ول ءنومىرى 25-ماقساتقا جىلجۋعا عانا كومەكتەسەتىن بولسا، وعان ۋاقىتىڭىزدى كەتىرمەڭىز.

ماقساتىڭىزدى قىسقارتىپ وتىرىڭىز. سول كەزدە ءسىز ءوزىڭىز ءۇشىن شىن مانىندە نەنىڭ ماڭىزدى ەكەنىن تەز تۇسىنەتىن بولاسىز. ۋاقىتىڭىزدىڭ كوبىن سوعان ءبولىپ، باسقا نارسەلەرگە نازار اۋدارماڭىز.

دەرەككوزى: Warren Buffett’s 5/25 Rule Will Help You Focus On The Things That Matter