InfoHub Logo

ۇيقى بەزى قاتەرلى ىسىگىنىڭ ناقتى نەدەن پايدا بولاتىندىعى ازىرگە بەلگىسىز. ءبىراق وبىرعا اكەلەتىن بىرنەشە فاكتور بار.

ستاتيستيكاعا سۇيەنسەك، ۇيقى بەزى وبىرىمەن 100 مىڭ ادامنىڭ ىشىندە توعىزى اۋىرادى. سىرقاتتاناتىنداردىڭ ورتا جاسى — 68-69. دەرت ەر ادامدار اراسىندا ءجيى كەزدەسەدى. حالىقارالىق ستاتيستيكاعا توقتالساق، ادام قارتايعان سايىن ۇيقى بەزى وبىرى بولۋ ءقاۋپى ارتا تۇسەدى. جاڭا دياگنوزداردىڭ 97،5%-ى 45 جاستان اسقان ادامدارعا قويىلادى. سونىڭ 89%-ى — 55 جاستان، 66،5%-ى — 65 جاستان اسقاندار.

سونداي-اق ۇزاق ۋاقىتتان بەرى تەمەكى شەگەتىندەر، سپيرتتىك ىشىمدىك تۇتىناتىندار، سەمىزدىككە شالدىققاندار، جاقىن تۋىسىنىڭ ۇيقى بەزىندە پروبلەما بولعاندار، ەكىنشى ءتيپتى ديابەتى بارلار، سوزىلمالى پانكرەاتيتپەن اۋىراتىندار دا وبىردىڭ وسى تۇرىنە بەيىم كەلەدى.

ادەتتە ۇيقى بەزى وبىرىنىڭ العاشقى بەلگىلەرى بىلىنبەيدى نەمەسە باسقا اۋرۋلاردىكىنە ۇقساس بولىپ، شاتاستىرۋعا بولادى. ەگەر ءىش نەمەسە ارقا اۋىرسا، سالماق تەز تۇسسە، كوز نەمەسە تەرى سارعىش تارتسا، قىشىسا، تاماققا زاۋقىڭ سوقپاسا، جۇرەك اينىپ، ءناجىستىڭ ءتۇسى وزگەرسە، پانكرەاتيت نەمەسە ديابەت پايدا بولسا — مىندەتتى تۇردە تەز ارادا دارىگەرگە كورىنىپ، تەكسەرىلگەن ءجون.

نەيروەندوكريندىك وبىرعا سيرەك دياگنوستيكا جاسالادى. ول بارلىق راك اۋرۋلارىنىڭ 7%-ى عانا بولادى. دەرت پايدا بولعاندا ۇيقى بەزى ادەتتەن تىس گورمون بولەدى. قاندا بۇل گورمونداردىڭ كوبەيۋىنەن ادامنىڭ سالماعى ازايادى، قۇسقىسى كەلىپ، السىزدىك سەزىنەدى، تەرىسى بورتەدى.

ۇيقى بەزى وبىرىنىڭ ەڭ العاشقى بەلگىلەرى

ءىشتىڭ ۇرلەنۋى — اسيت. ىشتە ارتىق سۇيىقتىق جينالىپ، ىسەدى، ۇرلەنەدى. ءىشتىڭ جوعارى جاعى نەمەسە ارقا اۋىرادى. بۇل ىسىكتىڭ ۇلكەيىپ سول جەردەگى نەرۆ تالشىقتارىنا نەمەسە جاقىن ماڭداعى باسقا ورگاندارعا قىسىم تۇسۋدەن پايدا بولادى.

تابەتتىڭ بولماۋى، اسقازاننىڭ قورىتپاۋى، قۇسقىسى كەلۋ — بۇلار ۇيقى بەزى وبىرىنا ءتان بەلگىلەر. ىسىك اسقازاندى نەمەسە اش ىشەكتىڭ باسىن قىسقان كەزدە پايدا بولادى. مۇندايدا ىشكەن اس اسقازاندا قالىپ، ادامدى قۇستىرادى. اسقورىتۋ ۇيقى بەزىنىڭ فەرمەنت جۇرەتىن جولى بىتەلگەندە دە بۇزىلادى.

تەرى مەن كوزدىڭ سارعىش تارتۋى — ءوت كومپونەنتى ءبيليرۋبيننىڭ قان قۇرامىندا ارتۋى. ۇيقى بەزىنىڭ باسىنداعى ىسىك ءوت جولىن جاۋىپ، ءوتتىڭ اش ىشەككە تۇسۋىنە مۇمكىندىك بەرمەۋىنەن بولادى. سالدارىنان بيليرۋبين مولشەرى ارتادى. سارى اۋرۋ پايدا بولعاندا ادامنىڭ دەنەسى دە قىشۋى مۇمكىن. ءزارى قارايىپ، ءناجىسى اعارادى.

ۇيقى بەزى وبىرىنىڭ تاعى ءبىر بەلگىسى — ديارەيا نەمەسە ءىش قاتۋ. ىشەكتە ۇيقى بەزى فەرمەنتتەرىنىڭ جەتكىلىكتى دەڭگەيدە بولماۋى ديارەياعا اكەلەدى، ياعني تاماق دۇرىس قورىتىلماي، بىردەن اسقورىتۋ جولى ارقىلى وتەدى. ال اۋرۋدى باسۋ ءۇشىن اۋىرتپايتىن ءدارى ىشەتىندەردىڭ ءىشى قاتۋى مۇمكىن. بۇل پرەپاراتتار استىڭ ىشەك ارقىلى ءوتۋىن باياۋلاتادى. اس قورىتۋ جۇيەسى باياۋ جۇمىس ىستەگەندە ءناجىس قاتايىپ، دارەت الۋ قيىندايدى.

تەز سالماق جوعالتۋ نەمەسە وبىر كاحەكسياسى. مۇندايدا اعزاداعى كالوريي ادەتتەگىدەن تەز ءبىتىپ، بۇلشىقەتتى بۇزادى، تابەتتى ازايتادى. اۋىرعان ادام تابەتىنىڭ بەلگىلى ءبىر تاعامدارعا عانا تارتاتىنىن بايقايدى.

وبىر ادام قانىن وزگەرتەدى، ترومبتار پايدا بولۋى مۇمكىن. ۇيىعان قان بايقالماي، كەيدە بەلگىلەرى دە كورىنبەيدى. ءبىراق ول ىسىكپەن، زاقىمدانعان ورگاننىڭ اۋرۋىمەن بايلانىستى كەلەدى.

ۇيقى بەزى وبىرىن انىقتاۋ ءۇشىن قانداي تەكسەرىستەردەن وتكەن ءجون؟

وبىردى باستاپقى ساتىسىندا انىقتاۋ قيىن، سوندىقتان بۇل دياگنوستيكانى قيىنداتادى. ادەتتەگى زەرتتەۋلەرمەن بىرگە ۋلترادىبىستىق سكانەرلەۋدەن وتكەن دۇرىس. بۇل ءتاسىل اۋىرتپايدى، جوعارىجيىلىكتى دىبىستىق تولقىندار قولدانىلادى. ءبىراق كەيدە راكتى كورسەتپەۋى مۇمكىن.

كومپيۋتەرلىك توموگرافيا رەنتگەن تۇسىرىلىمدەرى ارقىلى ىشكى قۇرىلىستىڭ بەينەسىن بەرەدى. دارىگەر ول ارقىلى قانداي دا ءبىر اۋىتقۋشىلىقتى بايقاي الادى، ىسىكتىڭ ولشەمىن كورەدى.

ماگنيتتى-رەزونانستى توموگرافيا دا ورگاننىڭ بەينەسىن بەرەدى، ءبىراق مۇندا كۇشتى ماگنيتتى جانە راديوتولقىندار قولدانىلادى. دارىگەر بۇل ءتۇسىرىلىم ارقىلى مەتاستازا بار-جوعىن كورەدى.

پوزيتروندى-ەميسسيوندى توموگرافيا وبىردىڭ قاي جەردە ورنالاسقانىن جانە ونىڭ دەنەگە تارالعان-تارالماعانىن كورسەتەدى.

ەندوسكوپتى-رەتروگرادتى حولانگيوپانكرەاتوگرافيا تەرى سارعىش تارتقان جاعدايدا پلاستيك تۇتىكشە نەمەسە ستەنت ءوت جولىنا جىبەرىلەدى.

لاپاروسكوپيا — حيرۋرگيالىق ءتاسىل. قۇرساق قۋىسىنا كىشكەنتاي تىلىك جاسالىپ، سول ارقىلى لاپاروسكوپ — جىڭىشكە يىلگىش ميكروسكوپ ىشكە ەنگىزىلەدى. بۇل ءادىس ارقىلى حيرۋرگ وبىردى كەسىپ الىپ تاستاماس بۇرىن، ونىڭ جان-جاعىنا تارالماعانىن كورەدى.

ال بيوپسيا جاساۋ ارقىلى ءتىن الىنىپ، ونىڭ قاتەرلى ىسىك نەمەس جوقتىعى انىقتالادى.

قالاي ەمدەلەدى؟

باسقا وبىرلار سەكىلدى. ءۇش نەگىزگى ەمى بار: وپەراسيا، حيميوتەراپيا جانە ساۋلەلى تەراپيا.

وقۋعا كەڭەس بەرەمىز:

ۇيقى بەزىنىڭ قابىنۋى نەدەن بولادى؟

ءجىتى پانكرەاتيت – ۇيقى بەزىنىڭ ءقاۋىپتى سىرقاتى

---