InfoHub Logo

Qazaqstan Respýblıkasynyń Prezıdenti Nursultan Ábishuly Nazarbaevtyń 1996 jylǵy Jarlyǵy boıynsha 1 mamyr Qazaqstan halyqtarynyń birligi kúni retinde atalyp ótýde. 100-den astam ult turatyn Qazaqstan halqy úshin bul merekeniń orny bólek. Qazaqstan Respýblıkasynyń Prezıdenti Nursultan Nazarbaevtyń 1995 jylǵy 1 naýryzdaǵy Jarlyǵy negizinde Elbasy janynan keńesshi-qatysýshy organ retinde dúnıe júzine úlgi bolyp otyrǵan, ultaralyq tatýlyq pen turaqtylyqtyń fenomeni – Qazaqstan halyqtary Assambleıasy quryldy. Bul eshbir elde bolmaǵan erekshe, saıası mańyzy zor qurylym.

Assambleıa 365 múshesi, 471-den astam respýblıkalyq, óńirlik, oblystyq, qalalyq ulttyq-mádenı birlestikteri 500-ge jýyq kishi assambleıa músheleriniń bastaryn biriktirip, bizdiń ortaq úıimiz – Qazaqstanda shynaıy dostyqty qamtamasyz etip keledi. Búginde árbir ultqa salt-dástúrlerin jańǵyrtýǵa, mádenıeti men ádebıetin damytýǵa, tiliniń jetilýine qamqorlyq kórsetilýde. Osynyń bári Elbasynyń qoǵamdaǵy azamattyq yntymaqtastyq pen ishki saıası turaqtylyqty saqtaý strategıasyn durys tańdap, ultaralyq qatynastardy retteýdiń tıimdi tetikterin jasaı bilýiniń arqasynda múmkin bolýda.

Ózara túsinistik, ustamdylyq, ár túrli ulttar ókilderiniń rýhanı jáne mádenı qundylyqtaryna qurmetpen qaraý ádebi barlyq etnostarǵa ortaq jalpy halyqtyq ıdealdar men qasıetterdi qalyptastyrýǵa áser etti. Nátıjesinde árbir ult konstıtýsıalyq-quqyqtyq zańnama negizinde ózine tán etnostyq ereksheligin saqtaı otyryp, Qazaqstannyń qoǵamdyq qurylymyna úılesti.

Elbasynyń Qazaqstan halqyna Joldaýynda aıtylǵan máseleler qatarynda erekshe kórsetilip ketken baǵyttyń biri — Qazaqstan halyqtary Assambleıasynyń rólin nyǵaıtýǵa baılanysty “Qoǵamdyq kelisimdi jáne turaqtylyqty ári qaraı nyǵaıtý úshin Qazaqstan halyqtary Assambleıasynyń rólin arttyrý” máselesi. Baǵyttyń bulaı atalýynyń ózi ózindik etnosaralyq jáne konfesıaaralyq kelisimniń jetildirilgen modeli qalyptasqan Assambleıanyń ultaralyq qarym-qatynasty nyǵaıtýdaǵy erekshe organ bolyp tabylatyndyǵyn kórsetedi. 

---