InfoHub Logo

Qazaqstandaǵy aýyldyq eldi mekenderdi ınternetpen qamtý jumysy kezeń-kezeńimen jalǵasyp jatyr. Úkimettiń baspasóz qyzmeti taratqan málimetke sáıkes, 2027 jyldyń sońyna deıin 3 781 aýylǵa joǵary jyldamdyqty ınternet jetkizilmek.

Búgingi tańda respýblıka boıynsha 6 179 aýyl bar, olardyń 42%-y ǵana joǵary jyldamdyqty derekterdi taratý tehnologıasymen qamtamasyz etilgen. Úkimet usynǵan jańa joba aıasynda optıkalyq-talshyqty baılanys jelileri júrgizilip, qamtý deńgeıi 90%-ǵa deıin arttyrylady.

«Nátıjesinde ınternet jelisiniń jalpy uzyndyǵy 160 myń shaqyrymnan asady. Bul – aýyl turǵyndarynyń sıfrlyq ınfraqurylymǵa qol jetkizýin edáýir jaqsartýǵa múmkindik beredi», – delingen resmı habarlamada.

Sonymen qatar, el ishindegi kúre joldardy mobıldi baılanyspen qamtý deńgeıin 99%-ǵa jetkizý jospary da bar. Bul – jol qaýipsizdigin arttyrýmen qatar, shalǵaı eldi mekenderdegi turǵyndar úshin baılanys sapasyn jaqsartýǵa baǵyttalǵan shara.

Atalǵan jobalar sıfrlyq teńsizdikti azaıtyp, memlekettik qyzmetter men bilimge qoljetimdilikti arttyrýǵa baǵyttalǵan.