InfoHub Logo

Jetisý oblysynda úsh boıjetken er adamdy bopsalady degen kúdikpen ustaldy. Kúdiktiler "Drýg Vokrýg" áleýmettik jelisinde qaqpan quryp, ańqaý jigitti 800 myń teńge talap etý arqyly torǵa túsirmek bolǵan.

Barlyǵy aqpan aıynda bastaldy. B. esimdi azamat atalǵan jeli arqyly A. esimdi qyzben tanysyp, biraz ýaqyt sóıleskennen keıin ol jigitti úıine qonaqqa shaqyrǵan. Jas jigit romantıkalyq keshti elestetip, kezdesýge asyǵa jetedi. Biraq páterge kirgende jaǵdaı múldem basqa senarımen órbigen.

Úıde A. jalǵyz bolmaı shyqty – qasynda taǵy eki boıjetken otyrǵan. Biraz ýaqyttan soń qyzdardyń biri jigitti jeke bólmege shaqyrady. Ekeýi ońasha qalǵanda, kútpegen jaǵdaı oryn alady. Kenetten bólmege eki qyz basa-kóktep kirip, "Kámeletke tolmaǵan qyzǵa tıispek boldy!" dep aıqaıǵa basqan.

Budan keıin qyzdar jigitti shyn máninde qorqytý operasıasyna kóshken. Olar:

"Ne bizge 800 myń teńge beresiń, ne túrmege túsesiń!" dep ses kórsetken.

Jeke kýáligi men júrgizýshi kýáligin tartyp alyp, aqshany tolyq tólemeıinshe qaıtarmaıtyndaryn aıtqan.

Qoryqqan jigit eki ret 50 myń teńgeden berip, aman qalýdyń amalyn oılaǵan. Biraq qyzdardyń bul qadamǵa ońaılyqpen toqtamaıtynyn túsingen ol polısıaǵa júginedi.

Polıseıler bopsalaýshylardy kelesi joly 30 myń teńge alyp jatqan jerinde qolǵa túsirdi. Qazir úsh boıjetkenge qatysty qylmystyq is qozǵalyp, tergeý júrip jatyr.

Bul oqıǵa áleýmettik jeli arqyly tanystyqtyń qaýipti bolýy múmkin ekenin taǵy bir dáleldedi.