InfoHub Logo

Jaqsyqylysh, Jamanqylysh Shora hannyń balasy desedi. Tursynbıke—Asan qaıǵynyń qyzy, Abattyń qaryndasy desedi. Aǵaıyndy eki jigit Shora hannyń balasy Jaqsyqylysh pen Jamanqylysh Tursynbıkege ǵashyq bolypty. Eki orta telegeı teńiz sý bolǵandyqtan, ǵashyqtar bir-birine qaýysha almapty. Eki jigit atpen jaǵalap, kúndiz-tún júripti. Tursynbıke baý qamystan shom baılap, saly aǵyzyp, ortaǵa sham jaǵyp, belgi berip sýǵa túsken kórinedi. Salyny arman-bermen jel aıdap aǵyza beripti. Jamanqylysh, Jaqsyqylyshtyń attary tereń sýǵa túspeı, salydaǵy Tursynbıkege qaýysha almapty. Salyny jel aıdap, taýdyń etegine kelip qaıyrlap toqtap qalypty. Qasynda joldasy joq Tursynbıke kúzgi qara sýyqta jaýrap, saly ústinde ólipti. Jamanqylysh Tursynbıkege qaýyshýǵa ant etip, atty keshtirip jaqyndaı túsip kelgenimen bir jetideı sý ústinde arman-bermen óte almaı yldıǵa túsip ketip, sý jutyp óledi. Jaqsyqylyshta atty dúzdirip, keshtirip keıin qaıtpaıdy. Bul batys betti jaǵalap joldy uzartyp alyp, bul da sý jutyp óledi.

Abat batyr qaryndasy Tursynbıkeniń osyndaı halge dýshar bolǵanyn sezip, atyn minip, naızasyn sýǵa boılatyp bıik-bıikti jaǵalap, ótkelden-ótkelge atty dúzdirip ótip kelse, taýdyń eteginde saly qaıyrlap, ústinde qaryndasy Tursynbıke ólip jatqan ústinen shyǵady. óz basy shaqqa kelgen Abat batyr Tursynbıkeni aýylǵa alyp qaıtýǵa múmkindik taba almaıdy. Sol taýǵa aparyp qaryndasyn jerleıdi. Sol taý «Tursynbıke taýy» atalyp qalady.

Endi Tursynbıkeniń batys betin jaǵalap, atty sýdan keshtirip, dúzdirip kele jatyp, taýdyń eteginde jas jigit ólip jatqanyn kóredi. Abat batyr ólikti jerlep, «Jamanqylysh tóbesi» atandyryp ketedi.

Abat batyr sharshap, sý ústinde kúndiz-tún júrip, elge qaıtýǵa kirisedi. Naızasyn sýǵa boılatyp, taıyz jerdi keship, tereń jerden dúzip otyrady. Taýǵa jaqyndap, endi qurǵaqshylyqqa shyǵam deı bergende, taýdyń eteginde sulý jas jigit ólip jatqan ústinen túsedi. Buny da Abat batyr qoltyqtap ákelip, taý basyna jerleıdi desedi. Bul taýdy «Jaqsyqylysh taýy» atandyryp ketedi. Bul úsh ǵashyqtar bir-birine qaýysha almaı telegeı teńiz sýdan jol taýyp júre almaı, kúzgi qara sýyqta sý ortasyna túnep ólipti.

---