InfoHub Logo

“Áke kórgen oq jonar,

Sheshe kórgen ton pisher, - deıdi dana qazaq. Adam boıyndaǵy barlyq adamı qasıetter men rýhanı qundylyqtar otbasynan bastalady. Sol sebepten “áke, ana” sózderi adamzat úshin eń qadirli sózder bolsa kerek. Kóp jerde ananyń orny bólek ekenin, ol bárinen bıik turatynyn estip jatamyz. “Ákeniń jaqyndyǵy jezdedeı aq” degendide estip, kórip jýrgen bolarsyz. Biraq men bul maqalmen kelispeımin. Sebebi, men úshin asqar taý ákem bárinen bıik. Iá, men ákemniń qyzymyn. Jáne meniń oıymsha, barlyq qyz balaǵa, ákesiniń meıirimi, qamqorlyǵy, tárbıesi mańyzdy.

Ákemniń sózderi maǵan qanat beretin, jigerlendiretin. Sol sózderdiń arqasynda alǵa umtylýdy, bireýdiń ala jibin attamaýdy, sabyr saqtaýdy jáne eń bastysy Qudaıdan kúder úzbeýdi úırendim. “Adamǵa aıtsań kúledi, Allahqa aıtsań biledi” - deıdi ǵoı. Óse kele osy sózderdiń bárine mán kirgendeı bolady. Ákem únemi, ”qyzym eshkimge álsiz tusyńdy kórsetpe”, “qınalyp tursań, Alladan kómek sura” dep aıtyp otyratyn. Kishkentaı bolsamda, Qudaıǵa jaqyn boldym, onyń bar jáne bir ekenine sendim. Barlyq aýyrtpashylyqty Allanyń synaǵy dep sabyrlyqpen qaraýdy úırendim. Mine, osy úshin meniń ákeme aıtar alǵysym sheksiz. Balalardyń er minezdi, namysshyl bolýyndaǵy áke tárbıesi úlken ról atqarady. Sol úshinde qazirgi ákelerge aıtylar syn joǵary. Elimizdegi ár bir adam bizdiń bolashaǵymyzdyń aınasy. Bolashaǵymyz bulyńǵyr emes, ashyq ári jarqyn bolýy úshin, tárbıeni ózimizden bastaıyq!

Turǵanbekqyzy Ásel

---