InfoHub Logo

Qaıym Muhamedhanuly 1916 jyly 5 qańtarda Semeıde týǵan. Ákesi Muhamedhan Semeıde shyǵatyn «Saryarqa» gazetine, «Abaı» jýrnalyna mesenattyq kómek jasap turǵan (osy jýrnaldyń 70 jyldan soń qaıta jaryq kórýine, Semeıdegi «Alash arystary» murajaıynyń ashylýyna kóp eńbek sińirdi).

1940 jyldan KSRO Jazýshylar odaǵynyń múshesi boldy. Q. Muhamedhanulynyń ǵylymı-zertteý eńbekteriniń kóbi ádebı-ólketaný baǵytynda boldy. Qazaq ádebıetinde ólkelik ádebıet tarıhynyń qolǵa alynyp, zerttele bastaýyna M. Áýezov uıytqy bolsa, Q. Muhamedhanuly óziniń ǵylymı shyǵarmashylyq jolynda únemi osy baǵytty nazarda ustaǵan. Onyń tarıhı shyndyqty burmalamaı, derekterdi naqtyly dáleldermen bergen maqalalarynyń sany 400-den astam. Al, jalpy ǵylymı eńbekteriniń sany 500-den asady. Belgili áýezovtanýshy ǵalym Tursyn Jurtbaı óziniń «Qaısar ǵalym» degen maqalasynda: «Qaıym Muqamedhanuly — Abaı óleńderin jınaýshy, Abaı murasynyń jazylý, basylý tarıhyn zerttegen ıstorıograf, úsh-tórt basylymyna túsinikteme jazǵan bıblıograf, Abaı shyǵarmalarynyń durys jazylýyn júıelegen tekstolog, Abaı jáne onyń aqyndyq dástúri haqynda monografıalyq eńbek jazǵan teoretık, sol zamandaǵy qoǵamdyq qarym-qatynastardy zerttegen tarıhshy, sol dáýirdegi ádebı nusqalardy, el aýzyndaǵy óleń-jyrdy, áńgime-ańyzdy qaǵazǵa túsirgen fólklorıst», — dep baǵa bergen.

Ol sondaı-aq, qazaq aýyz ádebıeti, ejelgi dáýir ádebıeti, jyraýlyq ádebıet ókilderiniń ómiri men shyǵarmashylyǵy, ádebı baılanystary týraly 300-den astam ǵylymı maqalalar jazǵan. Ol dramatýrgıa salasynda da qarymdy eńbek etip, kóptegen pesalar jazdy. Qaıymnyń «Tolqyn» (1994j.), «Maıdannan maıdanǵa» (1947j.), «Komısar Ǵabbasov» (1960j.), «Er Bilisaı» (1974j.) pesalary kórkemdik jáne tarıhı shyndyqty tutastaı alyp, oqıǵa jelisiniń ótkir qurylýymen erekshelenedi.

---