InfoHub Logo

12-naýryzda Qazaqstannyń Ortalyq keńester komıtetiniń 2- jalpy jıylysy ashyldy.

Ortalyq komıtettiń bul 2-jıylysynyń ashylatyn kúni Nıkolaı patshanyń «basynan dáýlet qusy ushyp», ata-babalary 300 jyl qazǵan zyndanyna ózi qulaǵan kúnine dál keldi. Bul bir tarıhı qýanyshty is.

Jáne osy ortalyq komıtettiń 2-jıylysy 14-naýryzda komýnıs partıasynyń alǵashqy negiziniń salynǵanyna 25 jyl tolǵan ýaqytyna týra keledi. Ám naýryzdyń 15-nen ári qaraı Qazaqstannyń komýnıs partıasynyń 3-jalpy jıylysy ashylady. Bunyń bári osy naýryzda keletin aldaǵy is.

Ortalyq komıtettiń jalpy jıylysynda qaralatyn máselelerdiń eń zory aımaqtyq, jergilikti kúnbeli tyǵyz isterdiń isteletin jobasy. Olarǵa kerekti qarajattardyń qaıdan alynatyn ám qaıda jumsalatyn tártipteri.

Aımaqtyq ám jergilikti mekemelerdiń árıne eń aldymen qarap, bar kúshin jumsaıtyn isteri — oqý isi ám elderdiń sharýasyn jóndeý. Jıylysqa kelgen Ortalyq komıtet músheleri bul 2 máselege bar yntasyn salyp kirisip, osy 2 jumysty kórkeıtýge, kúsheıtýge kirisýleri kerek. Qazaqstannyń taǵdyry Ortalyq komıtettiń qolynda, Ortalyq komıtettiń músheleri qazirgi ýaqytta nashar tabyna neniń paıdaly, neniń zıan ekenin bilýleri kerek.

Oktábr tóńkerisi alyp bergen teńdik, bostandyqty paıdalanyp qatardan qalmaýǵa eń aldymen eki-aq nárse kerek.

Olar: oqý ám mal.

Jáne naýryzdyń 15-nen ári qaraı Qazaqstannyń komýnıs partıasynyń İİİ-jalpy jıylysy bolady dedik.

Bul jıylysta da túrli másele qaralmaq. Munda qaralatyn máseleniń bir zory el arasynda komýnıs partıasynyń nashar tabyn tárbıeleý isterin júrgizip, nasharlar tabyn komýnıs partıasynyń saıasyna meńgerip alý máselesi.

Árıne, bul týraly da túrli jobalar, túrli nusqaýlar bar. Túrli tásilder, túrli ádister bar.

Komýnıs partıasynyń Qazaqstanǵa yqpalyn júrgizip, nasharlar tabyn meńgerip alyp ketýine kóp bógetterdiń bireýleri — jandy bógetter, bireýleri — jansyz bógetter.

Jandy bógetter mynalar:

1. Baqqumarlyq, aram oılylyq.

2. Aram oıly ultshyldyq.

3. Otarshyldyq aram oılylyq.

Meniń oıymsha bul men kórsetken 3 túrli bógettiń qazirgi Qazaqstandaǵy komýnıs partıasyna eń úlken qaýipti bóget — baqqumarlyq, aram oılylyq ám otarshyldyq aram oılylyq.

Qazir bizge ultshyldyqpen kúresý ońaı. Al myna eki túrli: Baqqumarlyq pen otarshyldyqqa qarsy kúresý óte qıyn. Bular komýnıs partıasynyń eń qaýipti dushpandary. Bularmen baıqap arbasyp, qatty kúresý kerek. Bular joıylmaı Qazaqstanda partıa isteri órkendeýi óte qıyn. Muny partıa azamattary endi shyndap oılaýlary kerek.

Bularmen kúrespeı is ońbaıdy. Árıne, bul «azamattar da» qarap jatpas. Aram ýlaryn shashyp baǵar. Úıtse de kúresý kerek.

1923 jyl

---