InfoHub Logo

Janazaǵa bara jatqan eki molda birine-biri bilgishtigin kórsetkisi kelip, dinı áńgimelerdi kezektesip aıta beripti. Sózden sóz shyǵyp, biri Buhar moldalaryn, ekinshisi Ýfa moldalaryn maqtaıdy. Aqyry sóz arty keriske soǵyp, tóbeleske aınalady. Ekeýiniń tóbelesine kele jatqan Musa degen jigit tap bolady.

Taıaq jeńkiregen molda Musany kórgennen-aq:

— Qyryqtyń biri Qydyr dep edi, oń nıetime Allanyń jibergen adamy bolarsyń. Ádil tóreligińdi aıt, saǵan júginemiz. Syna, kúnáhar molda Buhar moldalaryn balaǵattap, dinge tilin tıgizdi, — dep qaqsaı bastaǵanda, ekinshi molda da qarap qalmaıdy. Ol da óz sózin qýattaı túsip, ana moldany jamandap:

— Ýfa moldalary eń Qudaıǵa berilgen moldalar edi, olardy jamandaý Qudaıǵa shúbá keltirgendik, — dep muńyn shaǵa bastapty.

Musa az oılanǵan bolypty da:

— «Bul bir kúnqatpa» degen qıyn daý eken, sonda da sizderge ádil tórelik bermeı bolmas. Biraq aıtqanyma kónesińder, — dep sózdi ábden pisirip alypty.

Eki molda jarysa sóılep:

— E, báse, «biter istiń basyna jaqsy keler qasyna» degen, aıtqanyńa kóndik, ne isteseń de erkińdemiz, — dep Alla atymen ant etipti.

Jigit kúbirlep, birdeńe aıtpaq kisideı az otyrypty da:

— Men oılanyp bolǵansha, sender anaý qyrǵa shyǵyp, beri qaraı júgirip kelińder, — dep shyjyp turǵan ystyq kúnde bir júgirtip alady. Sonan keıin qara terge malynǵan eki moldany kúnge qarsy otyrǵyzyp qoıyp, basyndaǵy sáldelerin alyp, jalańbas qaldyrady. Sóıtedi de:

— Aıttym ǵoı bul kúnqatpa degen qıyn daý, áli oılaný kerek. Men de óz atyma minip, senderdiń attaryńdy jetektep, ana qyrdyń basyna baryp kelemin. Sender osylaı qozǵalmaı otyra berińder, — dep, atyna minedi de:

— Buhardyń moldalary aıýan, Ýfanyń moldalary aram. Oılaný kerek dedim ǵoı, oılanyp keleıin, — dep shaýyp ketedi.

Sol ketkennen jigit te, moldanyń attary da, sáldeleri de qaıtpaıdy. Jigitti kútip uzaq otyrǵan moldalar shóldep óletin bolǵan soń, tatýlasady. Jigitti qyrdyń astynda otyrǵan shyǵar dep kelse, jigit joq. Onyń «kúnqatpa daý» degen sózine moldalar endi túsinedi.

Jigittiń bul qýlyǵy elge tarap, sodan ol «moldany aldaǵan Musa» atanyp ketipti.

---