InfoHub Logo

Jumystan qoly bos, erikken qaljyńbas jigitter birde Túıebaıdyń aýylyna kórshiles bir úıge jınalyp, et pisip, qazan túseıin dep jatqan kezde Túıekeńdi: «Kelip tabaqtas bolsyn, kútip otyrmyz», — dep shaqyrady. Ol kelgenshe bastyń quıqasyn sypyryp, kózin oıyp alyp, jalańash bas súıektiń ózin ǵana qaldyrypty. Dastarhan jaıylyp, tabaq kelgende álgi qýlardyń biri:

— Oıbaı-aý, myna bastyń quıqasy qaıda ketken? — depti túk bilmegensip, sonda ekinshi jigit:

— «Túıe boıyna senip jyldan qur qalypty» ǵoı. Túıeke, ýaqytynda kelmeı, bastan qur qaldyńyz, kiná ózińizden, buıyrǵany sol shyǵar, yrym bolsyn, ustańyz mynany! — dep jańaǵy jalańash basty Túıebaıdyń aldyna qoıypty.

Osyndaı ázil-qaljyńnan ábden zyqysy shyǵyp, mezi bolǵan Túıebaı aqyrynda qurdas-qurbylaryn shaqyryp, qoı soıyp, qonaq etip, burynǵy atyn ózgertip, jańadan at qoıýyn ótinipti. Joldastary muny bir aýyzdan qýattap, seniń atyń munan bylaı «Botabaı» bolsyn dep uıǵarypty. Úı ıesi buǵan qýana rıza bolyp, olarǵa alǵys aıtypty.

Qonaqtary ketken soń Túıebaı áıeline:

— Men jurtqa mazaq bolǵan buryńǵy atymdy ózgerttim. Álgiler maǵan «Botabaı» dep at qoıyp ketti. Qalaı saǵan unaı ma? — dep surapty. Sonda áıeli:

— Betim-aý, jurt qaljyńdap aıtsa, sonyń bárine sene beretin ashyqaýyz beıshara, búgin bota bolsań, kelesi jyly taılaq, odan arǵy jyly baıaǵy túıe bolatynyńdy túsinbediń be?! — depti.

— Qap, álgi qýlar endi burynǵydan beter ájýlap, kúletin boldy-aý. Basqa jaqqa kóship ketpesem bolmas, — dep Túıebaı sonda sanyn bir soǵypty.

---