InfoHub Logo

Almatyda erekshe balalarǵa arnalǵan zamanaýı mektep ashylady. Bul týraly ustazdardyń tamyz keńesinde aıtyldy.

Almaty qalasynyń ákimi Baýyrjan Baıbek aıtýynsha, megapolıste jańa oqý jylynda zamanaýı mektep-gımnazıasynyń paıdalanýǵa beriledi. 1 200 oryndyq oqý ordasy ınklúzıvti oqytý júıesine baǵyttalǵan. Mektep qurylysy taktıldi joldar, lıft, shaqyrý batyrmasy qoıylǵan arnaıy sanıtarlyq bólmelerden turady.

Qala basshysynyń aıtýynsha bul Almatydaǵy biregeı mektep bolyp sanalady. Tipti respýblıka kóleminde sońǵy álemdik tájirıbege súıenip salynǵan jalǵyz ǵımarat.

«Biz taýly aımaqta ómir súrgendikten seısmoturaqtylyq saýaly mazalaıdy. Ásirese balalaryn balabaqsha men mektepke jiberetin ata-analardyń ýaıymy zor. Naýryzbaı aýdanyndaǵy jańa mektep seısmoqaýipsizdik talaptaryna saı. Mundaǵy jıhazdar qabyrǵaǵa bekitilgen. Bul tártipti barlyq bilim oryndaryna taratýǵa tıispiz. Biz halyqaralyq jetekshi elderdiń, onyń ishinde Japonıanyń tájirıbesine súıenemiz. Tótenshe jaǵdaılar bola qalsa jıhazdar qulap, balalardyń syrtqa shyǵýyna kedergi jasaıdy. Munyń kesirinen kóbi sol jerde mert bolýy múmkin. Bul kóp shyǵyndy talap etpeıtin qarapaıym ǵana saqtyq sharalary. Esesine oqý ǵımarattarynyń qaýipsizdigi arta túsedi», - dedi B.Baıbek.

Onyń aıtýynsha, Almatyda 4 mektepte seısmokúsheıtý jumystary júrip jatyr. Ótken jyly 28 mektepke osyndaı júıe jasalǵan.

«Jyl sońyna deıin taǵy 7 mektepte seısmokúsheıtý sharalary júzege asyrylady. Bul jumystar sabaqqa kedergi keltirmeýi tıis. Basqarma osyny aldyn-ala oılastyrý kerek », - dep nyqtap aıtty qala ákimi.

---