Astanada muǵalimderdiń jalaqysy qalaı kóteriledi

Astana qalasynyń ákimi Áset Isekeshev jańa texnologıalardyń negizinde qansha qarjynyń únemdelgenin jarıalady.

Ákimniń sózine qaraǵanda, mektepterde «bultty býxgalterıa» atty jańa texnologıany engizýdiń nátıjesinde bir jylda 350 mıllıon teńge únemdeldi. Osy aqshanyń 80 prosenti muǵalimderge syıaqy retinde taratyldy. Aldaǵy ýaqytta atalǵan jobaǵa kolejder men basqa da mekemeler qosylady.

«Al jan basyna qaraı qarjylandyrý júıesi arqyly muǵalimderdiń laýazymdyq jalaqysyn kóterýge bolady. Astanada ondaı júıege 8 mektep kóship jatyr. Taldaýǵa sáıkes, qarjyny tıimdi taratýdyń nátıjesinde árbir mektep búdjettiń 20 prosentin únemdep, soǵan muǵalimderdiń jalaqysyn kótere alady. Mysaly, byltyr muǵalimderdiń ortasha jalaqysy 100 000 -110 000 teńge bolsa, bıyl jańartylǵan bilim mazmuny úshin beriletin ústemaqy men jan basyna qaraı qarjylandyrý júıesimen birge ortasha jalaqy 150 000 teńgeden asýy ábden múmkin», - dedi Á.Isekeshev bilim basqarmasynyń uıymdastyrýymen ótken Tamyz konferensıasynda.

Búgingi jıynda qala ákimi qaı muǵalimderge páter beretinin aıtty.

Áset Isekeshevtiń aıtýynsha, aldaǵy bes jylda ondaǵan jańa mektep ashylady. Sonyń bárine 5 000-nan astam muǵalim qajet bolady. "Osyǵan baılanysty qala ákimdigi myqty mamandardy tartyp, olarǵa jaǵdaı jasaý jaǵyn oılastyryp keledi. Sońǵy on jyldyń ishinde memlekettik baǵdarlama aıasynda astanalyq muǵalimderge 2 500-den astam páter berildi. Degenmen, qala ósip keledi. Endi, bizge barlyq salalar boıynsha myqty mamandardyń korpýsyn qalyptastyrý qajet. Olardyń ishinde muǵalimder, polıseıler, dárigerler, órt sóndirýshiler jáne taǵy basqa mamandar bar. Qazir Memleket basshysynyń bastamasymen "7-20-25" baǵdarlamasynyń qolǵa alynǵanyn bárimiz jaqsy bilemiz. Kásibı mamandar korpýsyn qoldaý maqsatynda biz osy sanattaǵy qyzmetkerlerdi baspanamen qamtý tetikterin ázirleımiz. Sóıtip, Turǵyn úı qurylys jınaq bankimen birge búdjettik salanyń 10 myń qyzmetkerin pátermen qamtamasyz etemiz. Sonyń ishinde 3 myńdaı páter muǵalimderge taratylady", - dedi Á.Isekeshev bilim basqarmasynyń uıymdastyrýymen ótken Tamyz konferensıasynda.

Búginde respýblıka boıynsha bir mektepke shamamen 800-1500 oqýshy keledi. Al elordada atalǵan kórsetkish 1500-ge jetip otyr. Aldaǵy bes jylda Astanaǵa taǵy 120 myńnan astam oqýshy keledi degen boljam bar.

«2011 jyly elorda mektepterinde 75 myń oqýshy oqysa, byltyr atalǵan kórsetkish 140 myńǵa jetti. Bıyl 155 myń oqýshy bolady dep otyrmyz. Osyǵan baılanysty aldaǵy bes jylda memlekettik búdjettiń esebinen 24 mektep salynady», - deıdi Á.Isekeshev.