InfoHub Logo

Ertedegi zamanda bir túlki, bir qulan, bir saýysqan úsheýi dos bolyp, joldas bolady. Bir-birine  jamandyq oılamasqa ant aıtyp, sharttasady. Sóıtip júrgende, bir kúni qulan tuzaqqa túsip, sharq uryp, bosana almaı, ólemin-aý dep qorqyp, túlki men saýysqan dostaryna qarap «aıla, lajdaryń bar ma?» – dep, jaltaq-jaltaq qarap jylaǵan soń, túlki tuzaqty qımaq úshin qulannyń qasyna taman keledi. «Osy qulannyń ólse etin jeıin, tuzaqshy soısa, ishek-qaryndaryn tastaıdy ǵoı. Munyń dostyǵynan maǵan eti tátti ǵoı» dep, qaıtadan aramdyq oılap, bir butaǵa baryp, qulannyń ólgenin baıqap, buǵyp jata berdi.

Saýysqan muny kórip qulanǵa kelip, bylaısha aqyl aıtty: – Qulan dosym, meniń tuzaq jibin qıatyn qýatym joq, óziń bilesiń, – deıdi. – Muny túlki tisimen shaınasa, qıar edi, ol seniń dostyǵyńnan etińdi tátti kórip, anaý jerde jatyr.

Endi bir aqyl aıtaıyn: «Osy tuzaqty salǵan adam kelgende, shynymen ólgendeı bolyp, qımyldamaı, siresip jatyp qal. Tuzaqshy seni baýyzdaýda tuzaqty moınyńnan aǵytady. Sonda tura qashsań, qolymen ustaı almaı qalady. Qutylyp ketesiń», – deıdi. Qulan muny aqyl kórip, aıtqanyndaı siresip jatty. Tuzaqshy kelip kórdi de aram ólip jatyr eken dep, pyshaǵyn qolyna alyp tuzaqty aǵytqanda, qulan julqynyp tura qashty. Tuzaqshy apyr-topyr oıbaı salyp, moınyndaǵy myltyǵyn julyp aldy da qulannyń ketken jaǵyna qaraı myltyǵyn basyp qalǵanda, qulan túlki jatqan jaqpen qashqan edi, qulan uzap ketip, myltyqtyń oǵy butanyń túbinde buǵyp jatqan túlkige tıip, ókpesinen oq ótip, túlkiniń jany shyǵyp, quıryǵy kóterilip bulań etipti. Tuzaqshyǵa túlki olja bolyp ketipti. «Kim oılasa dosqa qas, basyna tıer tas» degen maqal sonan qalǵan.

---