InfoHub Logo

Ańshy Altaı taýynda an aýlap júredi. Ańshy bir shoqy tastyń basyna shyqsa, astynda bir top taýeshki jýsap turady. Ańshy taýeshkilerdi atýǵa qımaı qarap otyryp eshkilerge buqpantaılap kele jatqan aıýdy kóredi. Ańshy ne bolaryn kórmekke ańdyp otyrady. Aıý taıap kelip bir úlken tasty alady da, taýeshkilerge qaraı atyp jiberedi. Aıýdyń tasy bir eshkini julyp túsedi. Aıý qarbań – qurbań etip tastan júgirip túsip, ólgen taýeshkini ádeti boıynsha kóterip jerge bir soǵyp jeı bastaıdy. Ańshy aıýdy atýǵa oqtala berip, qarsy betten baýyrlaı jyljyp kele jatqan bórige kózi túsedi. Qasqyr baspalaı aıýǵa jaqyndaı beredi. Aıýǵa bes – alty qadamdaı qalǵanda qasqyr serpile sekirip aıýdyń astynan óte shyǵady. Ettiń qyzyǵyna túsken aıý ars etip óz baýyryn ózi qaýyp alady.

         Ańshynyń kózine alystan aıýdyń baýyrynan birdemelerdi alyp tastap jatqany kórinedi.

         Sonsha bolmaı-aq aıý óz oljasyn qusha jata ketedi. Álden ýaqyttan keıin qasqyr qaıtadan keledi. Bul joly qasqyr qasyna aıý qarsylyq kórsetpeı jata beredi. Ańshy aıýǵa bir sumdyqtyń bolǵanyn bilip qasqyrdy atyp túsiredi. Ańshy kelse aıý áldeqashan ólip qalypty. Qasqyr shapqan kezde onyń juqa shabyn jaryp ketipti. Dúleı aıý óziniń shabynan shyǵyp turǵan ishek-qarnyn ózi sýyryp alypty da ólim qaýypty.

 

****

         Taǵy birde ańshy ań aýlaı kele jatyp, myna bir qyzyqty kóripti. Jaıyla-jaıyla ininen uzap ketken sýyrdy jem etýge baıqaýsyz ańdyp kele jatqan qasqyrdy kóredi.

         Sýyrǵa ábden taqap qalǵan bóri kenet óz aldyna yryldap sekirip ala jóneledi. Sýyr alǵashqy kezikken inge enip ketedi. Al qasqyr ózinen ózi qarǵyp shorshyp arpalysyp júr. Muny kórgen ańshy shoshı bastaıdy. Ańshyǵa bóriniń alqymynda bir nárse jabysyp júrgen qusap kórinedi.

         Qasqyr biraz týlap baryp qulap túsedi. Ańshy baıqaı-baıqaı qasyna kelse, qasekeń ólip jatyr. Tamaǵynan qan josyp jatyr da anadaı jerde shaqar sasyqkúzen qarap tur.

         Qasqyr alǵash sýyrdy kórgende, qasqyrdy sasyqkúzen kóripti. Esil derti sýyr bop kele jatqan bóriniń alqymyna sasyqkúzenniń jabysa qalǵanyn da á, degende ańǵarmaı qalypty.

         Al ańshynyń mergen oǵynan sasyqkúzen de múlt ketpeı mert bolypty.

---