InfoHub Logo

(Aǵa-jeńgeler tilegi)

Ekeýi de birdeı joǵary bilim alyp, ekeýi de adam janyna arashashy bolar mamandyqty óz ómirlerine serik etip alǵan, Astana qalasynda eńbek etip jatqan inimiz ben kelinimizdiń ómir jolǵa birge qadam basqan toılarynyń da, mine, búgin ósip kele jatqan keıingi urpaqqa úlgi berer shamshyraǵy jaǵylǵan sát. Alty ata Álimnen órbigen Asannyń Baımyrzasynan taraıtyn osy úıdegi aǵamyz ben jeńgemizdiń, on eki ata Baıulynyń Jappas atty irgeli bir elinen órbigen qudalarymyzdyń kóziniń qarashyǵyndaı qos perzenti búgin bas qosty. Osynaý Toı ıelerine qýanyshtaryńyz qutty bolsyn deı otyryp, búgingi toıdyń sebepkeri bolyp otyrǵan eki jas – endigi otaǵasy atanar inimiz ben Baımyrzadaı irgeli elge kelin bolyp túsip otyrǵan kelinimizge búgingi kótergen Aq otaýlaryń qutty bolsyn deımiz! Búgingi ózderińe tapsyrylǵaly otyrǵan Nekeniń kýáligi kýálandyratyn aq nekeleriń óz ómirlerińde qanshalyqty zańdy bolyp tabylsa, bolashaq jubaılyq ómirleriń de sonshalyqty mándi bolsyn! Endigi ózderińniń jubaılyq ómirlerińe serik bolǵaly turǵan Nekeniń qos júzigi qanshalyqty sándi bolsa, júrektegi sezimderiń de sonshalyqty máńgi bolsyn! Búgingi toıda aǵa-jeńge bolyp tilerimiz: osy toıda aıtylǵan barlyq aq tilekter senderdiń keleshek ómirlerińdi jaqsylyqqa qaraı biriktirsin, otaýlaryńa árdaıym da yrys pen baq, dáýlet pen nesibe kúlip kirsin! Ata-ananyń adal perzenti bolyńdar, qurǵan otaýlaryńnyń ishine jubaılyq adaldyqtyń shyraǵyn jaǵyńdar! Yrystaryń kóbeıe bersin, keregeleriń keńeıe bersin! Árbir istegen isteriń berekeli tabys bop elene bersin! Taǵy da tilerimiz: búgingi Jas jubaılar bolashaq ómirlerinde baıandy baqytqa kenele bersin! Búgingi jas otaý ıeleri, qurylǵan zańdy nekeleriń qutty bolsyn!

Jetti, mine, ul men qyz taǵy baqqa,
Shyrqaldy ásem sazdyń áni baqta.
Sýmuryn Jappas eliniń bir erkesi,
Kelin boldy Baımyrza atty shańyraqqa.

Kóńilde sezim oty oıandy shyn,
Aıtady ata-ana da aq alǵysyn.
Qadirlep, qasterleıtin qudalar da,
Uzatyp berdi bizge aıaýlysyn.

Shattyǵyn shańyraqtyń uǵady shyn,
Sondyqtan aıtady jurt myń alǵysyn.
Búgingi toı ıesi aǵa-jeńge,
Bólisti elmen birge qýanyshyn.

Mundaıda shyn tilekshi eken elim,
Biledi baba paryz ótelerin.
Jubaılar, senderge endi qutty bolsyn,
Aq Otaý qurǵan zańdy nekeleriń!

---