InfoHub Logo

Ekindi kezi edi. Aqbota áldekimnen qorqyp qashqandaı artyna alaqtap, ekinshi qabatqa júgirip shyqty. Aptyǵa kep esik tutqasyna jarmasa bergende, mektepke bara jatqan apasyna qarsy ushyrasty.

— Aqmaral... Aqmaral! — dedi kózi jypylyqtap. Artyna bir qarap aldy: — Dına surasa, meni joq deshi.

— Nege?

— Men onymen oınaǵym kelmeıdi

— Joq dep ótirik aıta almaımyn. Men pıonermin, — degen apasy mektebine ketip qaldy. İshke kirgen soń stolda sabaǵyna daıyndalyp otyrǵan aǵasyna kep jalyndy. — Ánýar... Ánýar! — dedi stolǵa asylyp.

— Ári tur. Qolymdy buzasyń, — dep aǵasy qabaq túıdi.

— Dına kelse, meni joq deshi.

— Nege?

— Men onymen oınaǵym kelmeıdi

— Men ótirik aıtpaımyn.

— Sen de pıonersiń be?

— Joq, men oktábrátpyn.

Aqmaral burtıyp ashanada shaı iship otyrǵan ájesine bardy.

— Áje, — dedi erkeleı asylyp. — Dına kelse, meni joq deshi.

— Nege, botashym-aý?

— Men onymen oınaǵym kelmeıdi. Ol jaman, úıińnen konfet ákelmeseń, oınatpaımyn dedi.

— Oınatpasa oınama, — dedi Aıymkúl ájeı, — joq joq dep ótirik aıtýdyń qajeti qansha?

— Sen de pıonersiń be, áje?

— Joǵa...

— Sen nege ótirik aıta almaısyń?

— Úlken basymmen ótirik aıtyp ne kórinipti maǵan?

— Men kózimdi jumyp jataıyn, áje... Sen meni uıyqtap qaldy deısiń be? — dedi amaly taýsylǵan Aqmaral.

Nemeresiniń qylyǵyna máz bolǵan Aıymkúl ájeı:

— Aıtaıyn... Aıtaıyn, — deı berdi.

---