InfoHub Logo

Mámen «Aqsholpan» kúıin ótken zamannyń atadan balaǵa jetken bir ańyz áńgimesin estigende shyǵaryp edi deıdi.

Qazaqtyń búıirine shanshýdaı qadalǵan qalmaq zamany bolsa kerek. ol kezde áıgili Tóle, Áıteke bıler tiri eken. Kúnderdiń bir kúninde Uly júz ben Kishi júzdiń japsaryndaǵy aýyldardyń arasynda kıkiljiń bolyp, Kishi júz jaǵynyń jigiti jazym bolady. Sodan, arada biraz ýaqyt ótse de, Uly júzdiń aýyly teńdik bermeı, ólgen jigittiń arty «bir arysymyzdyń quny suraýsyz qaldy-aý» dep, pushaıman bolyp júredi eken.

Osy jaǵdaı Kishi júzdiń Áıteke bıiniń qulaǵyna shalynady da, «qoı, aǵaıyn eldiń arasynda kóleńke bolmasyn, bitistirip qaıtaıyn» dep jolǵa shyǵady.

«Týra bıdiń dúbiri kúnshilik jerden estiledi» degen sóz ras bolý kerek, bir kúni Uly júzdiń Tóle bıine «Áıteke bı qun daýlap kele jatyr» degen habar jetedi. Bıge degen qurmet — elge degen qurmet. Tóle bı aýyly jurtyn jańǵyrtyp, kók maısaǵa arnaıy úı tiktirip, Áıteke bıdi qurmetpen qarsy alady.

Áıteke bı ábden jaıǵasyp, birer kún tynyqqan soń, sóz oraıy kelgende Tóle bı: «Iá, Áıteke, jolaýshynyń kórgeni kóp bolady, kórgeni kóptiń aıtary kóp bolady, sóılep otyr», — deıdi.

Sonda Áıteke de osy sózdi kútkendeı: «E, Tóke, ıisi qazaqtyń qamyn jegen aǵasysyń, elińe altyn tonnyń jaǵasysyń. Kópti kórgenniń aıtarynyń da kóp bolatyny ras. Kórgenimizdi aıtý bizden bolsyn. Kórgenniń bárin aıtý shart emes, túıgendi ǵana aıtqanǵa ne jetsin. Meniń túıgenim, el bolýdyń kepili — tirimen tanysyp, ólige bolysyp otyrý eken», — depti.

Qashanda jón sózdiń jaǵynda bolatyn Tóle bı rızalyq bildirip: «Ýa, Áıteke, bizdiń basymyz bir jaǵanyń, bilegimiz bir jeńniń ishinde emes pe?! Qyzmetińe daıynbyz, artyq-aýys is bolsa oǵan da qaıylymyz. Qolyńdy qaǵyp, jolyńdy shalar eshkim joq. Qylyshyń bolsa, moıyn basyq, qushaǵyń bolsa, qoıyn ashyq», — deıdi.

Bı aǵasynyń ulaǵat sózine rıza bolǵan Áıteke de jadyrap, jyly shyraımen: «Bı aǵa, sózińizden sadaǵa, buıryq sizden bolsa, jabdyq bizden bolsyn!» — dep sózin túıindeıdi.

Osymen áńgime bitedi. Áıteke bıdiń janyndaǵylar eshteńe túsinbeı ańtarylyp qalady. Sodan boı jazýǵa syrtqa shyqqan bir sátte Áıteke bıden janyndaǵylardyń bireýi: «Kelgen sharýamyzdyń sóz bolmaǵany qalaı?» dep surasa kerek.

Sonda Áıteke bı: «Kelgen sharýamyz sóz bolyp qana qoıǵan joq, sheshimi de aıtyldy. Tóle bı bizge jasaýly qyz beretin bolady», — deıdi.

Aıtsa aıtqandaı, Áıteke bı osy joly Uly júzge qadiri artqan Nazar degen kisiniń Aqsholpan esimdi qyzyn jasaýymen alyp qaıtady. Keıin osy Aqsholpannan áıgili Ótebas bı týypty deıdi.

Mine, ilgeri býynnyń osy sıaqty iri isterin estigen Mámen qatty tebirenip otyryp «Aqsholpan» kúıin shyǵarǵan eken.

---