InfoHub Logo

Birde Mámen kúıshi jolaýshylap kele jatyp, Sholpan atty qyzdyń uzatylý toıyna tap bolady. Sholpan atyna zaty saı, tóńiregine aqyl kórkimen unaǵan aıaýly arý bolsa kerek.

Sonsoń da el-jurtqa erkin, erke bolyp boı jetip edi deıdi. Toı ústinde, bir jaǵy sol erkeligi bar, bir jaǵy qımastyq sezimi bar, Sholpan qyz tóńiregindegi qurby-qurdastaryna bir bazyna aıtady: «Qadirli kóz kórgen qurby-qurdastarym, qyz dáýreni qyzǵaldaqtaı kelte eken, baýyr basyp, boı jetken el-jurtymdy qımaı, kóńilim alaburtyp otyr. Meniń osy bir kóńil-kúıimdi kúı tilinde sóıleter kim bar?!» — depti.

Oıyn-toıdyń ónerpazsyz bolmaıtyny qashanǵy ádeti emes pe, sol jerde aqqý moıyn dombyra qoldan-qolǵa kóship, nebir ásem kúı kúmbirleı tartylady. Biraq bul kúılerdiń eshqaısysy Sholpannyń kóńilinen shyqpaıdy. Bári de buryn talaı tartylyp, talaı estilip júrgen kúı bolsa kerek. Sholpannyń názik júregi jańa saz, tyń saryn tilep, qazirgi kóńil-kúıine úndeser kúı izdeıdi.

Osy kezde dombyraǵa Mámen qol sozady. Otyrǵandar alǵashqyda kóldeneńdi kók attynyń úırenshikti qonaqkádesi bolar dep mán bere qoımaıdy. Biraq Mámen dombyrany baptap alyp, lekite qaǵyp jónelgende úıdiń ishi siltideı tynady. Kúı sulý sazyna qosa muńdy syrymen jan terbeıdi. Sol qalpynda qyzýy basylmastan lekildep kelip tynady. Sholpan qyzdyń janaryna tańǵy shyqtaı móldirep jas irkiledi. Rızashylyǵynyń belgisindeı, Sholpan ornynan turyp, óz qolymen Mámenniń ıyǵyna shapan jabady.

Osy joly tartylǵan kúı el ishine «Aqsholpan» degen atpen taraǵan eken.

---