InfoHub Logo

Daırabaıdyń jamaǵaıyny Kóben degen baı jalǵyz ulyna Qanjyǵaly jaǵynan qyz aıttyrsa kerek. Ata saltynda quda men qudanyń bastary saı kelip, sózderi jarasqan soń, bolashaq kúıeý bala jón-joralǵysymen qyz kórýge barady. Sol saltpen Kóben baıdyń balasy da qyz kórýge shyǵady ǵoı. Bul ózi, ata dáýletimen alshańdap ósken, ómirdiń ystyq-sýyǵyn kórmegen bos belbeý, borkemik jigit bolsa kerek. Sonsoń da, Kóben baı syrminez balasynyń janyna sol kezdiń ózinde-aq ónerimen el-jurtqa moıyn burǵyzyp, sal-seriligimen tanylǵan Daırabaıdy qosady.

Kóben baıdyń balasy men Daırabaı Ereımen taýyn en jaılaǵan Qanjyǵaly eline kelip túsedi. Kórýge kelgen qyzy sol eldiń qadirli bir baıynyń mápelep ósirgen jalǵyzy eken. Esimi Ajar bolsa kerek. Ajar dese degendeı, atyna zaty saı arý edi deıdi.

Mundaıda qyz berýshi jaqtyń da, qyz alýshy jaqtyń da bir-birine syn kózben qaraıtyn ádeti. «Qoıannyń túrin kórip, qaljasynan túńil» degendeı, Kóben baıdyń balasyn alǵash kórgennen-aq Ajardyń kóńili tolmaıdy. Bas qosqan otyrystarda ári-beri sóılesip, qylyq qasıetterin baıqaǵan soń, tipten túńile túsedi. onyń esesine, kúıeý joldas bolyp kelgen Daırabaı óziniń túr-tulǵasymen, aqyl-parasatymen Ajardyń yqylasyn aýdarady. Ásirese asta-tók arqaly ónerin kórgende Ajardyń názik júregi bulqyna soǵyp, jastyq sezimniń jalynyna sharpylady. Daırabaıǵa qarap júzi nurlansa, Kóben baıdyń balasyna qarap muńaıady. İshteı taǵdyryna nalyp, ońashada kóz jasyna erik beredi.

Ajar qyzdyń jan bulqynysyn Daırabaı jazbaı tanıdy. Jaı tanyp qana qoımaıdy, bul da Ajardyń aqyl-kórkine súısinip, sulý sezimge boı aldyrady. Ásirese Ajar qyzdyń jan jadyratar ázil-nazy, júrek eljireter erke qylyǵy, endi birdegi qıalǵa qanat bitirer syrshyl suhbaty Daırabaıdy aıryqsha arqalandyryp, shabyt tuǵyryna qondyrǵandaı bolady.

Mine, osyndaı bir shaqta Daırabaı óziniń sezim kúıi men Ajar qyzdyń qylyq-qasıetin dombyraǵa salyp edi deıdi. Bul kúıi el ishinde «Daırabaı» degen atpen taraıdy.

---