InfoHub Logo

Aqtaýlyq Erlan Shontabaev – erlikpen kóz jumǵan áke: bes balasyn jetim qaldyrdy

Aqtaýda taǵy bir qaıǵyly oqıǵa. Bir mezette bir adamnyń batyldyǵy – ózgelerdiń ómirin saqtap qaldy, biraq ózi ajal qushty. Bul oqıǵa – 41 jastaǵy Erlan Shontabaevtyń erligi jaıly.

Ol sol kúni dostarymen birge Kaspıı jaǵalaýynda demalyp jatqan. İshimdik ishpegen, jaǵada jaı ǵana demalyp otyrǵan. Biraq tynysh bastalǵan kún – aza tutar sátke ulasty.

Kenetten sý ishinde aıqaı shyqqan. Eki boıjetken sýǵa batyp bara jatty. Olardyń janynda bolǵan eki jigittiń biri kómekke júzip ketse, ekinshisi jaǵadaǵylardan járdem suraı bastaǵan. Dál osy sátte Erlan bógelmesten teńizge sekirgen. Aldymen qos boıjetkendi jaǵaǵa jetkizdi. Biraq qaýip áli tolyq seıilmegen edi – sýda qalǵan jigitti de alyp shyǵýǵa betteıdi. Osy kezde kenetten jaǵdaı ýshyǵady.

"Qyzdardy qutqaryp shyqqan soń, sýda qalǵan jigitke jetkende, álgi jigit úreıden Erlannyń aıaǵynan shap berip ustap alǵan bolýy múmkin. Sonyń saldarynan ekeýi de sýǵa batyp ketti", – deıdi Erlannyń jaqyndary.

Qutqarýshylar kelip jetkende – tym kesh edi. Eki er adamnyń da denesi teńiz túbinen tabyldy.

Erlan Shontabaev artynda bes balasyn qaldyrdy. Ol – tek otbasynyń asyraýshysy ǵana emes, el esinde naǵyz er azamat retinde qalmaq. Onyń áreketi – adamdyqtyń, jankeshtiliktiń, shynaıy batyrlyqtyń kórinisi.