InfoHub Logo

Nú-Iork, BUU — Palestına-Izraıl qaqtyǵysyna qatysty jańa kezeńniń shymyldyǵy túrildi. Nú-Iorkte ótken halyqaralyq konferensıada Batystyń 15 eli Palestına memleketin resmı túrde moıyndaýǵa daıyn ekenin málimdedi. Bul – sońǵy onjyldyqtardaǵy eń salmaqty dıplomatıalyq qadamdardyń biri.

Fransıanyń syrtqy ister mınıstri Jan-Noel Barronyń sózinshe, qujatqa qol qoıǵan memleketter qatarynda: Fınlándıa, Ispanıa, Irlandıa, Slovenıa, Portýgalıa, Lúksembýrg, Islandıa, Norvegıa, Aýstralıa jáne Kanada bar. Olar Izraıl men Palestına arasyndaǵy uzaqqa sozylǵan daǵdarysty tek áskerı emes, saıası jolmen sheshýge shaqyryp otyr.

Málimdemede 2023 jyldyń 7 qazanynda oryn alǵan HAMAS shabýyly qatań aıyptaldy. Qol qoıǵan elder beıbit turǵyndardyń kepilge alynýyn – adam quqyqtaryn óreskel buzý dep tanyp, olardyń tez arada bosatylýyn talap etti. Sondaı-aq, Gaza sektoryndaǵy gýmanıtarlyq apattyń ýshyǵyp bara jatqanyna nazar aýdarylyp, áskerı áreketterdi toqtatýǵa úndedi.

Batys elderiniń bul bastamasy jaı ǵana saıası málimdeme emes – olar naqty talaptar qoıyp otyr. Atap aıtqanda:
– Gaza sektoryn qarýsyzdandyrý,
– HAMAS-ty basqarýdan shettetý,
– Palestına ákimshiligine erkin saılaý ótkizý men bolashaq memlekettiń beıbit damý jolyna kóshý týraly jaýapkershilik júkteý.

Bul málimdeme halyqaralyq qaýymdastyqtyń Palestına máselesine qatysty kózqarasy ózgerip kele jatqanyn ańǵartady. Alaıda bul qadam Izraılmen qarym-qatynasqa qalaı áser etetini ázirge belgisiz.