InfoHub Logo

Barsha halyq bolyp qýanyp, er esimi ulyqtalar Jeńis kúniniń orny qashan da aıryqsha. Asaý ýaqyt tizginimen Uly Otan soǵysynyń kózkórgen ardagerleriniń qatary jyldan-jylǵa azaıyp barady. El basyna kún týǵanda etigimen sý keshken erlerdiń batyrlyǵyn óskeleń urpaqqa úlgi etý árbir azamattyń mindeti. Osy maqsatta T.Júrgenov atyndaǵy Qazaq ulttyq óner akademıasynyń oqý teatrynda «Er esimi el esinde» atty konsert ótti.
    Elbasynyń «Bolashaqqa baǵdar: rýhanı jańǵyrý» baǵdarlamasynyń aıasynda uıymdastyrylǵan kesh tarıhı qoıylymnan bastaldy. QR eńbek sińirgen qaırateri, profesor Tolqyn Zabırovanyń jetekshiligimen akademıanyń talantty stýdentteri óner kórsetti. Konsertte ánmen qatar, qysqametrajdy fılmder kórsetilip, krermen kózine eriksiz jas aldy.
Konsertmeıster Semón Baevtyń súıemeldeýimen ónerpazdar soǵys jyldaryndaǵy eskirmes ánderdi oryndap, horeografıa bóliminiń bıshileri keshtiń sánin keltirdi.
Tolqyn Zabırova, ánshi: – Konsertti Kıno jáne televıdenıe, Horeografıa fakúltetiniń ónerli jastarymen ardagerlerge taǵzym etip, alǵys bildirý maqsatynda uıymdastyrdyq. Surapyl soǵys jyldary, erlerdiń jankeshti eńbegi eshkimniń jadynan umytylmaýy tıis. Bul – bizdiń tarıhymyz. Keshegini umytýmen bolashaq bolmaıdy dep oılaımyn. Jeńis kúni – barshamyzǵa ortaq kún. Beıbit kúnde ómir súrip otyrǵanymyz úshin ardagerlerge bas ıemiz.  Soǵystan qaıtqan soldattar azaısa da, olardyń batyrlyǵy umytylmaıdy. Uly jeńis qutty bolsyn! Tek qana osyndaı beıbit zamanda ómir súreıik!     

    Uly Otan soǵysy batyrlaryn eske alý maqsatynda ótken konsert barsha qaýymǵa erekshe áser syılady. Kesh sońynda ardagergerlerge gúl shoqtary tabys etilip, kópshilik estelik sýretterge tústi.
   SÝRET-DEREK

Araı JUMATAI

---