InfoHub Logo

Halyqqa qyzmet kórsetý ortalyqtaryna anyqtama úshin keletin memlekettik qyzmetkerlerdiń sany azaımaı otyr. Búginde10-nan asa memlekettik qyzmetti elektrondyq formatta egov.kz-ten alýǵa bolady. Osyǵan baılanysty QR Memlekettik qyzmet isteri jáne sybaılas jemqorlyqqa qarsy is-qımyl agenttigi HQKO-daǵy kezekti azaıtýǵa qatysty usynys bildirdi.

«Halyqqa qyzmet kórsetý ortalyqtaryna keletin memlekettik qyzmetkerler men vedimistik baǵynyshty uıymdar ókilderin azaıtý maqsatynda «Azamattarǵa arnalǵan úkimet» memlekettik korporasıasymen birige otyryp, oqytý kestesin qurdyq. Qyzmetkerlerdi oqytý jumystary EKSPO aýmaǵyndaǵy HQKO-da ótetin bolady. Osylaısha, erikti tártipte úıretý jumystaryn júrgizetin bolamyz. Ózimnen bastap, oqýǵa baramyz», — dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Astana qalalyq departamentiniń basshysy Jazıra Jylqyshıeva.

«Eger de osydan keıin memlekettik qyzmetshiler egov-pen alýǵa bolatyn qyzmetti HQKO arqyly tapsyrys berse, onda bul mamandy jazaǵa tartamyz. Iaǵnı, osyndaı tásilder arqyly nátıjege jetemiz. Halyqqa qyzmet kórsetý ortalyqtarynda mekenjaı anyqtamasy úshin memqyzmetshilerdiń kezekte turǵany durys emes», — dedi J. Jylqyshıeva.

Onyń aıtýynsha, ótken jyly elektrondy formatta memlekettik qyzmetti paıdalaný maqsatynda oqytý jumystary men is-sharalar atqarylǵan. Bul HQKO-da adam sanyn azaıtyp qana qoımaı, qoldanýshylardyń ýaqytyn únemdeýge oń áser beredi. Josparlanǵan sabaqtarǵa bir aı ýaqyt beriledi. Memlekettik qyzmetshilerden keıin, vedimistik baǵynyshty uıymdardyń qyzmetkerleri de oqýdan ótedi.

«Byltyr biz «Azamattarǵa arnalǵan úkimet» memlekettik korporasıasymen elektrondyq nusqada memlekettik qyzmet kórsetý boıynsha sharalar ótkizdik. Osyǵan baılanysty, vedimistik uıymdarda oqytý jumysy júrdi. Alaıda jaqynda qaladaǵy tórt halyqqa qyzmet kórsetý ortalyqtaryna baryp keldim, burynǵysynsha sol jerde adamdar kezekte tur. Eń qyzyǵy, sol jerge memlekettik qyzmetshiler nemese vedimistik baǵynyshty uıym ókilderi baryp,  HQKO-larda kezekte turady. Eger de bizde elektrondyq sıfrlyq qoltańba bolsa,  HQKO-larǵa barýdyń qajeti qansha? Bul qyzmetterdi «egov» arqyly alýdyń múmkindigi bar ǵoı, ıaǵnı dástúrli anyqtamalardy elektrondyq úkimet portalymen alýǵa bolatynyn bilesizder», – dep túıindedi departament basshysy.

---