InfoHub Logo

Bıyl pedagogtterdi atestattaý 3 kezeńmen ótedi. Bul týraly QR Bilim jáne ǵylym mınıstrliginiń Mektepke deıingi jáne orta bilim komıtetiniń tóraıymy Maıra Meldebekova aıtty.

«Pedagogterdi atestattaý erekshe sanıtarlyq normalardy saqtaý talabymen ótedi. Jalpy, kabınetterdiń barlyǵynda árbir pedagogtiń arasyndaǵy 2 metrlik araqashyqtyq saqtalatyn bolady. Sonymen qatar árbir pedagog maska taǵady. Atestattaý ótetin aýdıtorıalarda sanıtaızerler men sensor termometr bolýy talap etiledi. Pedagogterdi atestattaý mınıstrliktiń 2 buıryǵymen belgilengen. Ol — pedagogterdiń barlyǵyna tanys 83-shi buıryq pen pedagogterdiń biliktilik sanattaryn berý jáne rastaý qaǵıdalary», — dedi Maıra Meldebekova mınıstrliktiń Facebook paraqshasynda onlaın rejımde ótken apparat jınalysynda.

Onyń aıtýynsha, atestattaý 3 kezeńmen ótedi. Birinshi kezeńde Ulttyq biliktilik testin tapsyrady. Ekinshi kezekte biliktilik baǵalaý júrgiziledi. Al úshinshi kezeńde jalpy pedagogtiń nemese bilim berý uıymy basshysynyń portfolıosyn taldaý ótkiziledi. Pedagogter atestattaýdan 5 jylda 1 ret, bilim berý uıymdarynyń basshylary 3 jylda 1 ret ótedi.

«Bıyldan bastap mektepke deıingi bilim berý uıymdarynyń pedagogteri men basshylary, qosymsha bilim berý uıymdarynyń pedagogteri, metodıkalyq kabınetterdiń ádiskerleri, sonymen qatar tehnıkalyq jáne kásiptik bilim berý uıymdarynyń pedagogteri men basshylary qatysady. Osy úsh kezeńdi sátti ótken árbir pedagogtiń, sonymen qatar bilim berý uıymy basshysynyń jalaqysyna ústemaqy tólenedi. Basshylar men olardyń orynbasarlaryna taǵaıyndalǵan sanatyna baılanysty 30-dan 100 paıyzǵa deıin, pedagogterge 30-dan 50 paıyzǵa deıin ústemeaqy qosylady», — dedi komıtet tóraıymy.

---