InfoHub Logo

Qostanaı qalalyq soty jergilikti turǵynnyń moraldyq shyǵyndy óteý týraly talap-aryzyn qarady. Bul týraly sottyń baspasóz qyzmeti habarlady.

Ótken jyldyń kúzinde Qostanaı qalasynyń turǵyny jergilikti sýpermarketterdiń birinen kámpıt satyp alǵan. Qaptamany ashqanda, ishinen zıankes jándikterdi kórip, shoshynyp qaldy. Keıin mamandar kámpıtterdiń parazıttermen zaqymdalǵanyn rastady.

«Talapker ózine keltirilgen rýhanı kúızelis, jıirkenish sezimi jáne sapasyz taýar satyp alǵany úshin balalary aldynda kináli sezingenin aıtyp, 2 mıllıon teńge kóleminde moraldyq shyǵyn óndirip alýdy surady», - dep habarlady sottan.

Jaýapker sapasyz taýar satylǵanyn moıyndady, biraq densaýlyqqa zıan keltirilgeni týraly dálelderdiń joqtyǵyn alǵa tartyp, talap etilgen somamen kelispedi. Ol 200 myń teńge kóleminde erikti túrde tólem jasaýǵa daıyn ekenin bildirdi.

«Densaýlyqqa zıan kelmegenin, keltirilgen ótinishti, jábirlenýshige erikti túrde ótelgen shyǵyndardy eskere otyryp, sot ótemaqy mólsherin 2 000 000 teńgeden 250 000 teńgege deıin azaıtýdy oryndy dep tapty. Sot sheshimi zańdy kúshine engen joq», - dep túsindirdi sot ókilderi.

Buǵan deıin Aqtóbe turǵynynyń polıklınıkada «qaıtys bolǵany» úshin 200 myń teńge alǵany týraly habarlaǵanbyz. Ol qatemen óliler qataryna qosylyp, dári-dármek alý, nesıe tóleý jáne salyqtardy óteý kezinde qıyndyqtarǵa tap bolǵan.