InfoHub Logo

QR Bilim jáne ǵylym mınıstrligi tótenshe jaǵdaı rejıminen keıin balabaqshalar qalaı jumys isteıtin málim etti.

«COVID-19 ınfeksıasynyń ósý deńgeıi jeti kún ishinde 7%-dan aspaǵan jaǵdaıda mektepke deıingi uıymdar sanıtarlyq qaýipsizdik sharalaryn saqtaı otyryp jumysyn bastaıdy. QR Bilim jáne ǵylym mınıtrligi jumys algorıtmin ázirlep, aımaqtyq bilim basqarmalaryna jiberdi. Mektepke deıingi uıymdar jumysyn bastaý týraly sheshimdi jergilikti bilim basqarmalary jáne bilim bólimderi ózderi qabyldaıdy.

Balalar men qyzmetkerlerge qaýipsiz jaǵdaıdy jasaýǵa, olardyń ómiri men densaýlyǵyn saqtaýǵa basshysy jaýapty», delingen habarlamada.

Balabaqshalarǵa birinshi kezekte ata-analary jumysqa baratyn jáne úıde jalǵyz qala almaıtyn balalar qabyldanady. Sodan keıin ata-analardyń qalaýy boıynsha keletin balalardy qabyldaıdy.

«Ata-ana balasyn balabaqshaǵa ákelgisi kelse, tárbıeshilerge aıtýy kerek. Tárbıeshi basshysyna balabaqshaǵa kelgisi keletin búldirshinderdiń sanyn habarlaıdy. Basshylyq kún saıyn birdeı jastaǵy nemese ártúrli jastaǵy balalardyń toptaryn quraıdy. Ár topta bala sany 15-ten aspaýy kerek.

Bala sanyna baılanysty jumysqa shyǵatyn qyzmetkerler tizimi jasalyp, kún saıyn túzetilip otyrady.

Ákimshilik ata-analarǵa balanyń balabaqshaǵa kelý máselesi boıynsha túsindirý jumystaryn júrgizýi kerek (jumys rejımi, jas toptary, densaýlyq jaǵdaıy, tıisti kıim, kún tártibin saqtaý jáne t.b.)», delingen habarlamada.

Búldirshinderdi tárbıeshi men medısına qyzmetkeri qabyldaıdy, balalardyń terisin qarap, temperatýrasyn ólsheıdi.

«Balabaqshada 3 kúnnen artyq bolmaǵan jaǵdaıda, ýchaskelik pedıatrdan densaýlyq jaǵdaıy týraly anyqtama usynylýy tıis.

Sondaı-aq, kún saıyn tańerteń medısına qyzmetkeri balabaqshanyń barlyq qyzmetkerin tekserip otyrady. Medısına qyzmetkeri kúnine eki ret toptardy aralap, balalardyń jaǵdaıyn baqylap otyrady.

Usynylatyn jumys ýaqyty — saǵat 9.00-den 18.00-ge deıin», delingen habarlamada.

---